محد يحس فيني ومحد يباني ليش؟؟؟ .

والله يا بنات من الضيجة اللي فيني بكتب مشكلتي يمكن حد يحس بمعاناتي وما أدري بعد اذا كانت مشكلتي تافها أو ما لها معنى أو مغزى……
المهم بدخل فالموضوع على طول
يا بنات والله محد يحس فيني مثلا كنت على أيام الجامعه يوم اتعرف على بنات أيلس معاهم وأسولف ولكن بعد فترة يتغيرن علي يعتبرني مب مهمة حتى يوم أكلمهن يلبسني ما ادري شو سالفتهن مع انه والله ما سويت فيهن شي والله اني طيبة زيادة عن اللزوم المهم مرت الايام وخلصنا من الجامعه وكلهن لبسني المهم مب اربيعاتي بعد حتى بنات عمتي ما يعطوني اهتمام يوم ايلس وياهن والله اني ودي اسولف وياهن واشكي همي لهن بس هن بولباس حتى يوم أخذ أرقامهن يتصلن مرة وحده عقب بولباس ومب جي المشكلة أي حد بتعرف عليها تعتبرني شي عادي بالنسبه لها ما ادريليش يمكن لاني طيبة زيادة عن اللزوم وله ما عندي سالفة والله يا بنات انه من كم أسبوع كانت اربيعت بنت عمتي مسويه حفلة وعزمتنا كلنا المهم يوم سرنا الحفلة في وحده اهناك ما اعرفها يلست اطالعني بنص عين وعقب كلنا يلسنا انسولف مع بعض وناكل وله قامت اتفشلني جدام البنات وانا ما أعرفها يلست اتقولي مب حلوة قصة شعرج مب حلوة الصبغة عليج أنا هنيه عصبت عليها كان ودي أعطيها بوكس فعينها بس أنا ما احب أزعل حد ما أدري ليش أسكت عن حقي المهم والله حتى اتصلت حق الدريول وطلعت من الحفلة ولا عبرني حد
والله يا بنات مب جي السالفة انا بخبركم لدرجة انه مرة وحده من بنات عمتي طلعت عني رمسه عند خطيبي والله انها قطعت رزقي من الحسد اللي فيها مع اني والله ما سويت فيها شي ولا زعلتها بشي والله اني اطرشلها مسجات مرات واطمن عليها بس هيه ما تهتم فيني تهتم فبنت عمتها الثانية اللي ترمس عليها واتعق رمسه عليها شفتي عاد يمكن هالزمن اتغير الواحد يركض ورا اللي ما يعطيه ويه واللي طيب ما يبونه
والله يا بنات استوتلي مشاكل وايد وطحت فمشاكل وايد حتى لدرجة انه محد وقف معاي لامن اربيعاتي ولا بنات عمتي وطحت مريضة يومين فالفراش محد سئل عنيوالله يا بنات ما عندي أحين لا صديقة ولا أكلم حد تلفوني حتى ما يرن بالمرة بس مجرد شكل يالسه بروحي فالغرفة ويه هاللاب توب يوم يضيج صدري ايلس عالنت من الملل حتى محد ايي يزورني البيت والله يالسه فغرفتي وحيدة ما عندي غير رب العالمين واقرا قران ومرات اشوف التلفزيون بس
والله يا خواتي ودي بصديقة اتحس فيني واتحس بمعاناتي واتكون سند لي واحس انها أخت أكثر من انها صديقة وودي أشكي لها همومي والضيج اللي فيني بس وين هالزمن حد يحصل صديقة جي وشكلي هالطيبة بخوزها من قلبي يمكن حد يحس فيني أو يمكن أنا احس جي ويا بنات حد صارله موقف مثلي وله أنا بس أحس بهالشي اللي هو عدم المبالاة من ناحية الغير
سوري طولت عليكم أدري اني ما عندي سالفة

الغاليه خلج على طيبتج ولا تتخلين عنها وثقي في نفسج وعلى فكره الله يحبج عشان عرفتي حقيقة هالبنات المترابعه وياهن..انتِ طيبه وتستاهلين ربيعه مثلج…الله يرزقج بوحده تقدرج لشخصج واتكون متواضعه ولا تهمين عمرج ولاشئ.

شخصيا عانيت من موضوع المصادقه للمصلحه…البنات كانن يرابعني عشان تفوقي اثناء الدراسه والحقيقه ان بعضهن خقاقات ومايستاهلن الربعه وانا ماكنت اشغل عمري بهن..كنت عايشه في عالم الدراسه والتفوق وبس.

السلام عليكم ورحمة الله وبركاته

مرحبا اختي

فديتج اول شي ما طولتي ولا شي ..

اختي ما اعرف شو اقولج .. بس ما حبيت اطلع بدون ما ارد ..

شوفي اختي .. الطيبة مب عيب .. وخلج على طبيعتج ولا تغيرين طبعج ..

انا برد مرة ثانية عقب ما اجمع افكاري وان شاء الله البنات ما يقصرون وياج ..

ربي يعينج ..

دمتِ بود ..

ولا يهمج اختي ولا تضايقين عمرج احنا كلنا خواتج وربيعاتج في هالمنتدى واللي ما يباك لا تصيح تباه

أختي بعطيج نصيحه بسيطه جدا

قبل ما يكون عندج صديقة تعرفي على نفسج أكثر

أنتي ما تعرفتي على نفسج.. أنت مب بحاجة لصديقه فالوقت الحالي أنت بحاجة لنفسج

اتخذي نفسج صديقه. على الأقل اقرأي كتب يفيدج في تقوية الذات. وتعرفي على مكامن الضعف فيج ومكامن القوة.. ما

تلاحظين كيف يتعاملون معاج الاخريات.. يحسسونج أنج مالج قيمة.. لأن اختيارج غلط…

ارفعي من قدرج… وابتعدي عن نوعية الي تحط من قدرج.. لا اتخلين أي وحده اتشد خيوطج.. أنت لازم اشدين خيوط حياتج

كوني مع نفسك.. وعرفي شوه انتي.. وشوه تريدينه.. ترى أنا مريت بهذي التجربة.. سبحان الله يوم تعرفت على نفسي

وعرفت أني شمعة نور.. وأني لازم أغير أولوياتي.. واخترت أن أقدم المساعده للضعفاء.. وأدعو لهم بالخير.. ابحري مع

نفسج شوفي شوه أولوياتج.. ورب العالمين ما خلقج عبث.. وهو يمكن رادج أنج تذكرينه أكثر من ربيعاتج وتشغلين وقتج

برب العالمين من خلال الأعمال الصالحه..لأنج في يوم من الأيام بتكونين شخصيه لامعه.. ورب العالمين قال" أم للإنسان

ما تمنى فلله الآخرة والأولى" هو أدرى بما يحصل لج.. وتعرفي على نفسج وأكررها لج

والله يرزقج بالحلال ويرزقج الصحبة الطيبه

نصيحتي لا تفكرين و تعورين راسج و خليج ع طبيعتج احسن لج و عليج بالدعاء والله يوفقج

تدرين انا طبعي ووايد انطوائيه يعني ماحتك ويا الناس بسهولة ولا ويا ايحد من عايلتي حتى حد خواتي بس ومااثق في اي احد وانصحج لاتردين ع الي جي لانه والله الدنيا دواره وبتشوفين اليوم الي بيكونو في موقفج واخسس

عندي بنت خالتي وحده الي وياه ا اوكي اما الباقيات شرات بنات عمتج واخسس والحمدلله عندي ربع مايقصرون مع اني مب من النوع الي اتواصل وياهم دوم ولااعطي حد اسراي لاني مااثق في حد

ااختي انا بكون لج رفيجه ويشرفني هالشي تراني شراتج لاشغل ولامشغله وكله ع الاب وفي الغرفه ولاحد يسال عليه
اذا تبين طرشيلي ايميلج