اخاف من المستقبل

السلام عليكم ..
بداية ابى اقول انه هاي مشكله وحده اعرفها و تبى الحل و انا ما اشارك بس احب اطالع هل المنتدى بس عشانها راح اشارك

المشكله اهي ربيعتي من اماره و تزوجت واحد من اماره ثانيه و الزواج كان تقليدي يعني لا اتعرفه و لا ايعرفها و حتى الملجه صارت قبل العرس باسبوعين يعني ما يمديلها اتكلمه او بالاحرى ما كلمته بالفون ابد ويمكن لو كلمته يتعرف حالته و بتنفصل ..
المهم ربيعتي من النوع البارد يعني وفرت على ريلها وايد لا سوت حفله خطوبه و لا ملجهولا فرقه اللهم دي جي ولا سفره ( بدوله بس ) و ماطلبت مهر يعني الي ايبونه >>>>>يابلوها 80 الف
يعني وايد قنوعه و طيبه بالحيل ..
المهم بعد العرس حبته وايد لانه كان طيب وياها و هو بعد تعلق فيها وايد وايد ابد ما ايخشون شي على بعض و حتى الحين ايحبون بعض الله يديم المحبه انشاءالله قولو آمين …>>>>>> وين المشكله عيل

المشكله يا بنات اكتشفت انه ريلها فقير يعني راتبه اشوي و المصيبه عليه اديون فوق 400 وهاذا بعدهم ما كونوا اسره يعني بعد يبى ياخذ قرض للبنى و ما إلى ذلك و اهي يا بنات عندها شهاده جامعيه بس تخصصها رياضيات وما اداوم و كل ما تبى اتقدم مكان ايقولون ما نبى تخصصج لانها تبى اتساعد ريلها لانه وايد مهموم هو ندم انه حط عليه اديون بس ما ايروم اسوي شي و هي ما اداوم …
و المصيبه يا اخوات انه اهو كريم يعني يعطي اخوانه و اول اسبوع ايكون راتبه طار

وهي حامل وجريب اتربي و وايد خيفانه اتقول على اني احبه و اموت فيه بس ما اقدر اعيش هالعيشه يعني بعيده عن اهلي ( الوحده ) و هو وايد يطلع و الحين سالفة البيزات اتقول انا بحرم عمري من وايد اشياء عادي عندي بستحمل بس جو ذنب الي في بطني ..
و اتفكر تطلق و تتنازل عن كل شي >>>>>>>>>> الاخت ما تبى اتكلف عليه ازياده

بس اتعيش عند اهلها هي و الي في بطنها عسب ما اتحسس الي في بطنها بالنقص و تبى اتعيشه احسن عيشه …
و للعلم اهله نفسي نفسي و اتحس عمرها ولا شي لانه اهله كلهم يشتغلون ان كانو ريياييل و لا حريم …و يلبسون مار كه و لبس وجيه و هي تلبس حتى الحين من الزهبه

فهي تبى منكم النصيحه و المشوره لان عينها غدت حنفية من كثر الصياح ..
>>>>و طلب اخير اتقول لا تجرحون ريلها مهما كان اهو ريلها و حبيبها

وشو هالعقليه ! تحبه وتبا تتطلق بس لانه فقير .. مايسدها حبه لها ؟ معقوله نست تعامله وأحسانه عليها وطيبته؟

تحمد ربها أنه فقير مادياً وهب فقير عاطفياً .. غيرها يتمنن هالشي ..

لا ترفس النعمه بريولها .. ومحد يعلم الغيب .. يمكن الحال يتبدل في يوم وليله ..

الله يهديها ..