السلام عليكم خواتي … سوري ع العنوان بس صدق تعبت نفسيا ومب عارفه شو اسوي … انا عندي ولد مفروض انه يدش KG 1 السنه اليايه .. بس ولا مدرسه او روضه راضيه تقبله … بتقولون لي ليش … لانه فديته عنده السكر ويلبس سماعات ( سمعه ضعيف ) … يعني يباله ممرضه تكون متواجده طول اليوم علشان تقيس له السكر ( بس مرتين خلال الدوام ) ولازم العين تكون عليه عن ياكل حلويات ويرتفع عنده السكر … يعني يبى عنايه طبيه خاصه اما عن السمع مب مشكله بالنسبة للمدارس .. اتصلت فبعض المدارس في الشارجه بس الكل متخوف وما يبى يتحمل المسؤولية .. على فكره هو حاليا في مدينة الشارقة للخدمات الانسانية ويبون يدمجونه عالسنه اليايه فمدرسه عاديه .. انا ما ابى اخليه فالمدينه لانه بدى يتعلم الاشارات وهالشي وااااايد ضايجني بس بصراحه المدرسات اللي عندهم قمة في التعامل والاهتمام ، حتى انه تعلم وايد اشياء منهم تخيلوا حضانه وعلموه اسمه الرباعي ، الالوان ، الحيوانات ، الفواكه ، الخضروات ، واشياء وايده يوم دخل عندهم كلمات بسيطه كان اللي يعرفها و انا الوحيده اللي افهم عليه ، المهم طولت عليكم ادري بس كلي امل انكم تدلوني على مدرسة في الشارجه او عيمان خاصة او حكومية عندهم ممرضه متواجده طول وقت الدوام المدرسي … ودعواتكم 
هلا إختي الله يخليلج ولدج ويحفظه يارب / استغربت انه ولا مدرسه راضيه تقبله مع انه المعروف انه في كل مدرسه لازم تتواجد ممرضه وبشكل دائم وقت الدوام لين نهايته وهذا الي حاصل واشوفه شخصيا في مدارس عيالي سواء الاولاد او البنات / إختي حاولي تخلين حد متواجد في المدرسه حتى لو تيبين ممرضه خاصه فيه تراعيه خصوصا هالفتره من عمره لين ما يتفهم طبيعة المرض الي فيه (السكر)ويتجنب الاشياء الي تضره وما اعتقد المدرسه بيرفضون هالشي لانها مابتكون وياه في الفصل وقت الدراسه لا بتكون وياه في الساحه وقت الاكل (او حتى انتي كوني وياه إذا ما تشتغلين )كان بودي اساعدج .
الله يطمنج عليه ويخليه
الله يطمنج عليه ويخليه
الله ايعينج حبيبتي و يسهل امورج …. استخيري حبيبتي و الله بيسرلج طريج الخير 
حاولي مع مدرسه الرساله..
بالنسبه للاكل انتي حطي له الوجبه.. وفي مدرسه الرساله ممنوع اييبوون حلويات او شبس…
وربي يوفقج