سيدات منتدى الإمارات, أعرفكم على نفسي,أنا الصديقة المقربة لوجدان الفجر وأختها في الله, وأنا داخلة تحت لقبها وقاعدة الحين أستخدم لاب توبها بعد
.gif "12 (73)")
وبإذن الله جريب بصير عضوة في هذا المنتدى الرائع.المهم الموضوع اللي ما خلاني أصبر لين أصير عضوة وأكتبه موضوع مهم , وأنا أتصفح المنتدى شفت كثير حالات إحباط ويأس بسبب تأخر الزواج فحبيت أكتب لكن تجربتي الشخصية اللي أتمنى تستفيدن منها .
أول شي باركو لي الخميس الفايت إنخطبت الحمدلله
.gif "12 (43)")
أنا عمري 38 سنة( لا تنصدمن) , من سنوات تقدم لي ناس بس ماكانو مناسبين( من الناحية الدينة والأخلاقية) علشان كذه أهلي رفضوهم, وشغلت نفسي بالشغل والدراسة والحمدلله, كانت تمر على أوقات أحس فيها بالحزن وأوقات أقول خلاص مستحيل أتزوج وأوقات أحس إني غير مقبولة و بس كنت أستغفر الله وقول الحمدلله يمكن الزواج ما مكتوب لي لأنه شر لي. كنت أدعي بالزوج الصالح صح , بس عايشة حياتي, أقرأ , أدرس أطلع ويا الأهل , أحضر دروس دينية, أمارس هواياتي, بس شيئين ما حبهم سيرة الأسواق والأعراس.وايدادت قالن لي إذا ما بتروحي الأعراس ولا الأسواق مابتتزوجي!!!! بس بعد ما غيرت راي ( الأسواق أكره الأماكن عند الله, والأعراس مع الأسف موسيقى وغنا ورقص وتجيب لي صداع )على فكرة أنا ما متدينة ذاك التدين أنا تديني عادي. سنة 2024 بدأت دراسات عليا, ودراستنا كانت مختلطة, وهناك كان واحد من الزملاء, إنسان محترم ومتدين وملتزم إضافة إلا أنه تبارك الرحمن وسيم جدا وذو منصب مرموق وإبن عائلة معروفة وبصفاته هذي كان محط أنظار كل الزميلات ولكنه والله العظيم كان ملتزماأخلاقيا وماعطى ولا وحدة وجه وبعضهن قالن عنه متكبر وشايف عمره و.بصراحة أنا فعلا الشاب شدني كل شي فيه, وكان حريص على أداء الصلاة بوقتها, وكنت في داخلي أتمناه زوج لي, بس كنت أرجع وأقول أنا وين وهو وين, بلاش أحلام يابنت أصحي!!!. ويشهد الله إني ما قلت له كلمة ولا حتى تجرأت أنظر له مباشرة وخلصنا دراسة وكل واحد راح لحاله وهو من إمارة وأنا من إمارة . ودعيت الله بما معناه إذا الشخص هذا ما من نصيبي , الله يقدرني أنساه وأشيله من بالي ويرزقني الله أحسن منه , والحمدلله مرت السنوات وبعدي ماتزوجت مع إني كنت أدعي الله يرزقني بالزوج الصالح , وقبل أسبوعين فوجئت بزميلتي في العمل تقولي فلانة تسأل عنج شكلهم يبو يخطبوج لحد من أولادهم!!! تعرفو منو فلانة هذي؟؟
.gif "12 (63)")
أخت الشخص اللي أنا كنت معجبة فيه!!!!!!!!!!!!!!!!!!!!!
والفرحة الأكبر والحقيقية إنهم جو وخطبوني له هو نفس الشخص وأهلي وافقو عليه وأهله فرحانين فيني !!!!! والله يا بنات لو قارية هذي القصة بقول قصة من الخيال, بس القصة صارت معاي وأحسها أكبر من الخيال ومرات أحس أنها ما حقيقية , لله الحمد والشكر والفضل الحسن في هذي النعمة العظيمة اللي من بها عليَ, أحس أني أسعد إنسانة بالوجود.الحمدلله. هذا قصتي , بس أبغي أقول لكم لا تيأسن من رحمة الله والله العظيم الله مخلي ليكن الأحسن والأفضل.لا تقولن إذا ما طلعت مابتزوج ولا تقولن لازم أحطي مكياج وأطلع شعري علشان أتزوج ولا تقولن صار عمري ثلاثين ما تزوجت, ولا توافقن على شخص ما ملتزم دينيا وخلاقه مب زينة بس علشان تهربن من العنوسة,ولا تحاول تنشئن علاقات وتدخلن في قصص حب علشان تتزوجن حتى لو كنت معجبات بالشخص. التزمن بأخلاقن ودينكن وحافظن على سمعتكن وسمعة أهلكن وخلكن دايما مع الله, الله بيكون معاكن . في الأخير , إدعن لي الله يتمم لي ولخطيبي على خير ويرزقنا السعادة والذرية الصالحة.
( شكر خاص للغالية وجدان الفجر اللي شجعتني أكتب قصتي وسمحت لي أدخل بإسمها وعقبالج يارب يا أختي )
الله يوفقج ويسعدج ويتمم لج على خير
ربي يوفقكم في الدنيا واخرة ويرزفكم الذرية الصالحة يارب
.gif "12 (7)")
والله يرزقني وكل البنات الي ف قائمة الانتظار بالزوج الصالح يارب