الرضاعة وأكل الطفل

السلام عليكم يا أمهات يا صاحبات الخبرة

أدري غثيكم بكثر أسئلتي بس اتحملوني ،، تراني جديدة على ساحة الأمومة وخايفة على بنوتي وايد ،،

المهم ،، اليوم عندي كم سؤال حابة أسألهم عن الرضاعة وأكل الطفل ،، أنا طبعا بنتي توها كملت أسبوعين ،، وطبعا أعتمد على الرضاعة الطبيعية في تغذيتها ،، وأسئلتي هي:-

متى أقدر أعطيها وجبات تكميلية،، حليب وغيره؟؟
لين متى أتم أعتمد على تغذيتها من الرضاعة الطبيعية،، الدكاترة يقولون 6 شهور مب لازم ياكل شي إلا من صدر الأم،، هل هالكلام صحيح؟؟
إذا بعطيها أكل ثاني غير صدري،، شو أعطيها واشكثر؟؟
سؤال ثاني وايد مهم،، أنا صدري مافي حليب وايد،، يعني الحمدالله فيه بس أحس مب الكمية اللي تحتاجها بنتي خصوصا اني أحسها تتعيب وهي تمص لين يوصل لها حليب،، وحتى أنا لما أعصر ما يطلع وايد،، وساعات ما يطلع إلا لما هي تمص،، فهل في شي يخلي الحليب يزيد عندي؟؟

امم هذا اللي على بالي حاليا واسمحولي ان طولت عليكم،،

هلاااااا حبوبه من اتخلص الاربعين حاولي تعطينها حليب صناعي بس مو كل يووم لانها توه نونو
يعني خليها تتعود على مرضعه عقب وايد بتعبج ….
بالنسبه للاكل يقولون الاحسن يوم ادش 6 عسب معده تتهيا للاكل ثاني غير الحليب بس في بعضهم يعطون عيالهم من يدشووووووون 4

بالنسبه للزياده حليب كثري من اكل المعجناااات ووعصاير فرش ودياااااااي
ووبس وان شاءالله الي عندها معلوومه زياده بتفيدج

حبيبتي .. إذا كنتي تشتغلين عوديها على المرضعه و الحليب من صدرج على الأقل لين شهرين و بعدين إبدي إعطيها حليب صناعي

الأكل الأفضل بعد 6 شهور و تبدين في الفارليز البسكوت و السيريلاك و بعدين عصير الموز و التفاح و الكمثرى و الأرز المهروس و البطاطا المهروسه .. هذا الكلام من الطفوله و الأمومه أنا بنتي توه مكمله ال6 شهور عشان جيه بديت أسأل شو أعطيها أول شي

عن زياده الحليب … اكلي رهش .. و حطي كمادات حاره على صدرج و انتي تشفطين الحليب أو والنونو يرضع

اختي اذا كنتي تشتغلين تقدرين تعطينها الحليب الصناعي مرتين في اليوم في فترة الصبح بس وباقي اليوم يعني بعد ما تردين من الدوام ما تعطينها الا طبيعي واذا كنتي ما تشتغلين وتبين اترضعين بنتج طبيعي فتحذري انج اتدخلين الحليب الصناعي لان هذا بقلل من الحليب في صدرج وبنتج بترفض الرضاعة الطبيعية وهذا كلام مثبت علميا لان الرضاعة تخلي الياهل يعتمد على نفسه وعلى عضلات الثم في المص وهذا الشي (سبحان الله) يخلي الجسم يتنشط ويدر حليب يعني كل ما رضعتيها اكثر كل ما زاد الحليب في صدرج اكثر والمرضعة جاهزة ويوم يشرب ما يبذل اي مجهود عشان جذي بيفضلها على الحليب الصناعي
وحبيبتي انتي توج في الاسبوع الثاني يعني كل ما كثرتي من الرضاعة ان شاء الله بيزيد الحليب عندج وسالفة انه الحليب ما يكفيه هذا غير صحيح اذا كنت معتمدة على الرضاعة الطبيعية بس لان جسمج يعرف احتياجات البيبي وعلى هذا الاساس يفرز الحليب كثر ما يحتاج الياهل (هذا الكلام اذا انتي معتمدة على الحليب الطبيعي فقط)
والاكل لا تدخلين الاكل ليت تدخل الشهر السادس لانها تكون جاهزة من ناحية الهضم للاكل الجامد

مشكورين وايد عالردود،،
أنا الحمدالله معتمده على الرضاعه الطبيعية 100% وهالشي اللي أباه
بس لأنه أمي وعمتي (أم ريلي) حشروني لما يشوفون بنتي تصيح وايد يقلون صدرج مافيه حليب والبنت ما تشبع وطلبوا مني أعطيها صناعي عقب تكمل شهر وأنا رافضة هالشي،، بس خوفوني لما قالوا بنتج ما تشبع،، بس كلامكم طمني،،