انــت لا طـقّـت بـراسـك جـيـت تحبّـنـي

ياخي.. إما تحتفظ بـي صـح ّ.. ولاّ.. ذبّنـي
ما انت مجبور ٍ علي.. وماني مجبور ٍ عليـك

شاطر انك بس من وقـت ولوقـت.. تشبّنـي
وتنبسط لا صرت انادي: واللي يرحم والديـك

حس فيني.. لبّ احاسيسي ونـداي.. ولبّنـي
شوف انا وشلون صرت اموت.. وتعلّقت فيـك

كنّ قلبي حالفٍ: ما غيـرك انـت .. يطبّنـي
ْفلا تعلّقني كذا .. ما بيـن احبـك واحتريـك

خلّني بينك وبين الصـدر اعيـش.. وخبّنـي
ولا تطلّعني.. لانّي لو طلعت اصلاً .. باجيـك

لا تجاملنـي بوجـه.. ومـن وراي تسبّنـي
ولا تسوّي لي (متيّم) .. وانت تخفي ما لديـك

ما انت ناقص تربيـه حتـى تقلّـي: ربّنـي
وانت مثبت لي من اول.. تربية أمـك وابيـك

لو انا ماني بكفـوَ.. اتركنـي عنـك وكبّنـي
واعتبرني مرحله.. واغسل من الرجعه يديـك

يعني لا طقت براسك "حـب" .. لا لا تحبّنـي
ما اعتقد لا غبت بعد اليوم .. ممكـن ألتقيـك