حليب سيميلاك كمفورت منو تعطي ولدها

السلام عليكم بنات
انا ولدي الله يحفظه عمره سبع شهور وبديت ادخل له الاكل بس ما يتقبل أكله وايد يبغي يأكل من اكلنا العادي يوم يشوفنا يتم يصارخ والحليب من نولد طبيعي وادخله احيانا صناعي اللي هو سيميلاك بعدين رحت لدكتورة ووصفها كمفورت وقالت اريح لطفل منالغازات وعادي نفس العادي بس المشكلة انه الحليب لما أسويه يتم كتل ما يذوب وتميت استخدمه فترة وللحين بس هو ما يشرب غير 60 او 40 فقط للحين محتارة ليش ولدي كره الحليب مع انه لما كان حوالي شهرين لين 3 شهور يشربه انا محتارة حاولت اعطيه سيلاك العادي غير المكفولة ما تقبله ابدا
اليوم اشتريت ابتاميل كمفورت مع أني حاولت وياه قبل ولا طاع
ساعدوني هل فيه حد يستخدمه وشو تنصحوني بحليب وكيف انظم أكله مع الحليب وهو الحين بيدخل الثامن هل عادي الروب وكيف الفواكه غير الموز
وطالع بجسمه نفس حبوب الباعوض هل هذا تحسي من اكل وهل ادخل له لحوم وكيف بس دياي ياليت تفيدوني انا اشوف اليهال ما شاء الله صحتهم زينه الا عيالي بنتي عمرها 3 ووزنها 12

حبيبتي انا استخدمت لبنتي قبل ابتاميل وسيميلاك
ابتاميل سوالها امساك
وسميلاكًً. اتزوعه عطيتها نان ومشى وياها واحين اعطيه اخوها
عن الاكل انا ادخللهم البسكويت من الخامس اذوبه في الحليب ومن السادس ابدا اكل ويا الروب
خضروات وعيش ومن الثامن قطعة دياي صغيره تقورينها واتحطينها ويا العيش والدياي وتضربينها ففي الخلاط
اعطيه الظهر غداه وعقبه شوية حليب وبينام
العصر هرسيله موز ولا تفاحه ولا اعطيه بسكويت الاطفال
فليل سسويله سيريلاك اخف ع معدته وعقب العشا بساعتين اعطيه حليب وبيناملج
يعني وجبتين لين ثلاث في اليوم
انا بنتي الله يحفظها من كل شر احين سنه ونص ووزنها ١٢هذا وزنها بعد ما مشت وضعفت
وولديه احين تسع شهور ووزنه ١١بس
حليب نان انا مشو وياهم صراحة والاكل نوعيله مره كوسا مره بطاطا واذا تبين تعطينه من اكلكم عادي من الثامن
ضربي عيشكم في الخلاط ويا روب واعطيه
والهريس والمرقوقه عادي اعطيه
الله يحفظه لج

انا كنت اعطي ولدي وسواله غازات السميلاك وابتاميل ماتقبله مع انه بنتي كانت تشربه يعني يفرق من طفل لطفل

وماشي احسن عن حليب الماعز بيرتاح عليه الطفل انصحج بحليب ألوما هو صح شوي غالي بس بيحبه الياهل

مرحبا اختي كركر

ولدج بعده صغيرون فديته يعني لاتتوقعين بيبدا يتقبل الاكل من كل شي
انتي امه وادري بالاشيا اللي تناسبه

شوفي بخصوص الحليب ..
كل ياهل وطبيعته ولازم اتجربين كذا نوع لو ولدج ماتقبل نوع معين…

و الكومفورت سيميلاك .. هو شوي يتغير طعمه عن النوع العادي ويكون ثقيل شوي ع معدة الطفل لانه فيه الياف اللي بتمشي بطن الياهل
انا ولدي نفس الشي كنت اعطيه ابتاميل العادي . وعقب غيرت لابتاميل كومفورت لانه ياه امساك.. بس حسيت ماتقبله وبالغصب يكمل 60 مل بالغصصصصب ..
طعمه يتغير عليه شوي.. فعادي اتوقع نفس حالة ولدج

حاولي ترجعين تعطينه سيميلاك العادي مرة ومرتين وثلاث . واذا ماتقبل عقب غيريه
لاتغيريله كل شوي لانه هالتغيير بيسويله امساك >_<

وبخصوص الحبوب اللي ع جسمه هذي احتمال كبير حساسية ، شكلج مابديتي تعطينه الاكل حبة حبة
و أكلتيه من اكل البيت مرة وحدة واحتمال بعض الخضار سوتله حساسيه.. لازم بداية اكل الطفل تكون كل نوع على حده
مرة عيش وبطاط لمدة 4 ايام
مرة عيش وكوسا لمدة 4 ايام
اذا كل شي اوكي وماحسس جسمه وماصابه اسهال مثلا
مكسي له عيش و جزر وبطاط
وهكذا .. كل مرة زيدي نوع يديد وجربي

((وبخصوص الاكل والوصفات ))
بتكلم عن وايد اشيا يمكن باجي الامهات بيهاجمووني هههه
لاني بتكلم من ناحية صحية وشو المفيد للطفل وشو العادات الغللللط في الاكل ونعطيها عيالنا ونقول مايمتنون >_<
وكل اللي الوصفات اللي بكتبها مجربتنها على ولدي ^_^

1- اول شي الحليب مالنا ومشتقاته مثل الروب والاجبان ممنوووعة في هالعمر لين يكمل على الاقل سنة او قريب السنة
( الروب عالاقل 9 شهور او 10 شهور,, اما الحليب الفريش لاا ممنوع)

2- البسكويت مال الياهل – فارليز – والسيريلاك من الاشيا اللي مامنها فااايدة ترا وايد واستخدميها وقت الضرورة وانتي طالعه وماشي عشا له مثلا
بس احنا تعودنا نعطي عيالنا سيدة سيريلاك من يبدا عمر الاكل
انتي اعتمدي عالوجبات الطبيعية اللي تسوينها بيدج لانه مفيدة لجسمه وصحية ومافيها هالمحليات والسكريات الصناعية اللي فالبسكوت والسيريلاك ، كلها سقم

3- البسكوت اللي نحطه فالحليب من الاشيا اللي تسد جبد الياهل وتزيد معدل تناوله للسكريات الموجودة فالبسكوت وهالشي ضااار ضاااار على اسنانه
(حليب الياهل كفاية ويسده ويشبعه) اذا تبين تشبعينه سويله وجبة مفيده فيها فواكه لانها افيد للياهل

***وصفات للاكل***

1- للريوق : بديل للسيريلاك – خذي شوفان كامل مب شوفان ابيض العادي اللي ناخذه ، ويكون موجود في نفس رف الشوفان فالجمعية ..
المهم ودني الشوفان بماي دافي نص او ربع ساعه ع حسب وقتج (لو كان شوفان كامل ) وعقب اغليه لمدة 5 دقايق تقريبا
واخر شي ضيفي له حليب صناعي 60 مل او حليبج لو بغيتي + مع تمرة وحدة .. وخليه دقايق بس لا اتطولين
وفالخلاط
لذيذ ومفيد لانه يحتوي على التمر وحليب وشوفان . وبعد فيه حليب بما انه ولدج لاحظتي مايتقبل الحليب وايد.

2- للريوق : من يكمل 8 شهور كاملة ابدي عطيه شوية صفار بيض .. مخلوط مع شوية حليب
ولازم تلاحظين عليه اذا يسويله حساسية او لا ..

3- للغدا : عيش مصري مطبوخ مع قرع – القرع كل الاطفال يحبونه وجداااا مفيد له ويتقبلون طعمه
( وكل مرة غيري بنوع الخضار: مرة قرع لمدة 3 ايام .. مرة قرع وبطاط .. مرة كوسا وبطاط ..) انتي جربي وبتلاحظين الخضار اللي يحبها ولدج اكثر شي

4- للغدا : عيش مع حليب صناعي .. حلو وخفيفو ويشبعه ،،
واذا تلاحظينه مايشرب وايد حليب ، دوم دخلي الحليب في وجباته للتعويض

4- للغدا: خليه يكمل 8 شهور كاملة ، وعقب دخلي على وجبة العيش والخضار >> دياي شوي .. ومرة لحم
وبتكون وجبة مفيدة ومشبعه للطفل من اكل البيت اللي مامنه فايده هههه

5- للغدا: عدس مع عيش مصري وطماط وكوسا .. وضيفي له شوية كمون لتجنب الغازات اللي يسببها العدس
والكمون بعد يعطي نكهة حلوة فالاكل ، لو ولدج من النوع اللي مايعيبه اي شي

الفواكة لوجبة العصر:
1- الافوكادو جداااا جدااا مفيدة للياهل وتغذيه ، لازم يكون بالغ ولين
وفالخلاط مع شوية حليب صناعي او حليبج

2- اغلي التفاح لدقايق وعقب اخلطيه فالخلاط مع شوية حليب صناعي او حليبج
او سويله تفاح مع خوخ

3- او موز مع حليب بعد مفيد ومشبع

انتي تفنني فالوجبات وحاولي تحطين كل مفيد فيها بحيث تغذي الطفل اكثر مما يكون هدفنا انه يشبع وبس
:
:

وبما انه ولدج توه بادي ياكل لا تعطينه اكثر من وجبتين في اليوم .. ولا تجبرينه يخلصها ، اذا ماكمل بوسيه هههه عادي الحياة حلوة
وعطيه حليب
مع الوقت بيتقبل الاكل اكثر عن الحليب
واهم شي في كل الوصفات ، لاتعطينه كل شي مرة وحدة ، شوي شوي عليه وعشان تتجنبين الحساسية لازم كل نوع خضار تجربينه ل4 ايام عالاقل

انصحج اتابعين هالحساب على الانستغرام
b_recipe
اخصائية تغذيه مختصة بالاطفال

والله كل الوصفات اللي فيه عجيبه وفنانة
وجربتها ع ولدي وتقبلها لانه مقاديرها تعطي طعم فالاكل ^^

وسوري طولت فالشرح بس حبيت افيد الكل (:

انا بمسح مشاركتي عيل دام كله الي فيه ممنوع انا جربت هالاشياء ع عيالي وفي نظري الياهل بادم يتعود ع الاكل لان خلاف ما بيروم ياككل وما بيتقبل الاكل 
بس كل واحد ووجهة نظره في تربية طفله وانتي احتاري الي يعيبج
الله يحفظلج ولدج حبيبتي

مًشكورات فديتكم وما قصرتوا
لا فطامي ما يحتاي تمسحيها أستفيد من تجاربكم بالعكس
وأختي ام طحنون مشكوووووووورة علا المعلومات القيمة
وبحاول هو ما شاء الله وزنه وقت الولادة ٣ ونص والحين بيخلص السابع وبيدخل فالثامن عقب أسبوع وبس وزنه ٧ لانه قام ما يشرب الحليب وكله يمرض والسيريلاك بالعافيه كمن ملعقة ما ادري شو اسويبه وهو حركي بعد الله يحفظه

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.