دردشه مع شيطان أثناء الصلاه

(موضوع عجبني حبيت انقله)

السلام عليكم
هذا هو الحوار الذي دار بين صاحبنا والشيطان في الصلاة

ــ الإمام يُكبّر تكبيرة الإحرام ويشرع في قراء الفاتحة ..

** ويُكبّر صاحبنا ، وتبدأ الدردشة :

ص / الله أكبر .. ليتني ما وقفت عند هالهندي ، ريحته ثوم ، وثيابه كنها وسخة .
ش / يا رجال خلك أنت الحبيب وهذه عظمة (الصلاة) ما فيه فرق بين المصلين
ص/ صادق والله ، حتى الشخص الثاني على يساري شكله (سوداني) عرفته من ثيابه وأكمامها ..!!
ش/ وش رأيك بالمسجد ؟
ص/ المسجد نظيف وبارد بس المشكلة كثرة (العمال) اللي يصلون فيه ، وبعدين (الرخام) اللي عند (المحراب) عاجبني بالمرّة ..
ش/ الرخام اللي تبغى تركبه لبيتك أحلى وأجمل ..
ص/ والله إنك صادق ، بس أنا راح أركب لون أبيض ، وهذا (مشمشي) ..!!
ش/ الإمام هذا يطوّل في الصلاة ..!!
ص/ هذي مشكلتنا مع هالأئمة ، يتحكمون في الناس ويطولون فيها ، على بالهم (خشوع) الله يهديهم ، ما يشوفون (المأمومين) كيف أجناسهم ما بين طفل وعاجز وحديث إسلام ..الخ ، هذي مشكلة فعلا ، على الأقل إمام المسجد هذا صوته زين ويخلي الواحد يخشع ..!!
ش/ لا تنسى تتصل على (أمك) عشان تعتذر لها عن إنشغالك اليوم ؟
ص/ صحيح والله ، ذكرتني الله يعافيك ..!! لازم أتصل عليها على طول بعد الصلاة عشان ما تزعل ، كل شئ إلا (الأم) حقها كبير عند الله ..
ش/ بس لو الوالدة تترفق بالحرمة كان كل شئ زين ..؟
ص/ والله صحيح ، هذي مشكلتي الأزلية إني عجزت أوفق بين (زوجتي) و (أمي) ..!
ش/ يا رجال أنت ما قصرت مع زوجتك ولا مع أمك ، بس (الحريم) مشاكلهن كثيرة ..
ص/ تذكرت (زوجتي) أوصتني أجيب أغراض للبيت ؟
ش/ أكيد (خبز) صامول و (فول) ..
ص/ لا والله أكثر من الخبز والفول : خبز ، وطماط ، وخيار ، وبقدونس ، ودجاج ، وشطة ، وزيتون مبشور ، وجبن مبشور (عشان البيتزا) و .. و .. فيه شئ نسيته .!! أها تذكرت ، كرتون تونة ، وفيه شئ ثاني .. نسيته بعد .. نسيته موصاي بعوال..
ش/ لا تنسى شئ ، وبعدين كيف تخلص نفسك من (أم العيال) ؟

** (فـجـأة) : الإمام يُكبر للركوع ثم السجود ثم القيام ، وصاحبنا لا يزال يحاول أن يتذكر الشئ الذي نسيه من (أغراض البيت) ، ولكنه لم يستطع ..

** الإمام يبدأ بالركعة الثانية والأخيرة (صلاة الجمعة) .. وتعود الدردشة :

ص/ أها … تذكرت الحاجة المهمة اللي بقيت من الأغراض ..
ش/ أكيد أدوات مكتبية ..
ص/ لا … الأدوات المكتبية لاحقين عليها بعد كم يوم ، الوصية المهمة ، هي أنني أمـرّ على المشغل عشان أسأل عن (عبات) المدام خلصت وإلا لسّه ..
ش/ إيش رأيك (بمصر) الرجال اللي قدامك ؟
ص/ حلو … أكيد (نصف تورمة) ، وإلا (تورمة) ، لا لا أكيد (شاتوش) ، والله طلعت علينا أسماء وأشكال بعضها زين وبعضها . ..
ش/ فيه إزعاج في خلف المسجد ..
ص/ يمكن (أطفال) يلعبون في مؤخرة المسجد ، وإلا مراهقين .. الله يهديهم ..

(( فجأة)) ـــ يرن (نقال) صاحبنا .. فيُسكته بسرعة وبحرج شديد …

ص/ مين اللي يتصل في وقت الصلاة هذا ؟ والله ناس ما تعرف توقيت الإتصالات ، طيب معروف إن هذا الوقت وقت (صلاة) ، الحمدالله إني طفيته بسرعة ، بس عسى ما يـدق ثانية ..الله يستر ..
ش/ ليه ما تشوف هوية الشخص المتصل ؟
ص/ لا يا شيخ (حرام) أطالع في الرقم والإسم ، وبعدين أفقد (خشوعي) ..
ش/ صحيح ، إتركه حتى تنتهي الصلاة ..
ص/ فيه موضوع قرأته قبل الصلاة في (الأنترنت) عبارة عن نصيحة لأصحاب (النقالات) ومستخدميها ، والمفروض إني تركت (النقال) على الصامت ..
ش/ إلا إيش صار على موضوعك الجديد في عن (الخشوع) متى راح تنشره في المنتدى ؟
ص/ الموضوع شبه جاهز ، يبغى له مراجعة أخيرة ويصبح جاهز للنشر .. يمكن أنشره بعد (الغداء) ..
ش/ الله يعطيك العافية / موضوع ثمين وممتاز ومتعوب عليه ..
ص/ طبعاً .. الله يثبتنا ويرزقنا الخشوع في الصلاة ..

** (( الإمام )) يبدأ بالركوع والسجود للركعة الثانية ، وصاحبنا في دردشته :

ص/ الله يعين على زحمة الخروج من المسجد ، والحمدالله سيارتي وقفتها بعيد عن الزحمة ..
ش/ بس وقفتها بعيد عن المسجد ؟ والجو حار والشمس حارقة ..
ص/ بعيدة صحيح ، لكن ما حولها زحمة سيارات وأوادم ..
ش/ طلع( مصر) الرجال اللي قدامك (صوف) ..
ص/ أها .. بس باين علية (غالي) وفيه لمعة حلوة ، أحاول أشتري مثله إن كان إنه رخيص ، يعني حول (الستة) ريال ، ممكن أدفع (سبعة)
ش/ وأخيرا (سـّلم) الإمام … مع السلامة ..

** قام صاحبنا من فوره بعد التسليمة الثانية ، وقد ودّع (الشيطان) بالحفاوة والطاعة ، وخرج إلى (السوق) ثم إلى (الخياط) و (المخبز) ، وحين عاد إلى بيته وزوجته ، سألته :
ــ لماذا تأخرت كثيرا ؟
ــ فقال لها :
ــ لقد ذهبت للصلاة في المسجد الكبير والجديد الموجود في حارّة (أهلك) .
ــ فقالت : ولكن مسجد (أهلي) بعيد .
ــ فقال : صحيح أن المسجد بعيد لكن الصلاة فيه تُساعد على الخشوع ..
ــ فقالت له أم الأولاد / صحيح … الله يهديك ويثبتك ..منقوووووووووول بتصرف

اللهم إجعلنا ممن يخشون في صلاتهم .. اللهم آممين

تسلمن خواتي عالمرور والله يجعلنا من الخاشعين

يالله ماخلا شي ما ذكرة الشيطان بة و قت الصلاه
حشى صدق انه شيطان
"أعوذ بالله من الشيطان الرجيم"

انزين خواتي كيف نكون خاشعين وما يصير فينا مثل الاخ انا وااااايد يستوي فيني جذي و الله ….

كيف؟؟؟ ياليت حد يجاوبني

اعوذ بالله من الشيطان الرجيم…

(فَإِذَا قَرَأْتَ الْقُرْآنَ فَاسْتَعِذْ بِاللّهِ مِنَ الشَّيْطَانِ الرَّجِيمِ (98) إِنَّهُ لَيْسَ لَهُ

سُلْطَانٌ عَلَى الَّذِينَ آمَنُواْ وَعَلَى رَبِّهِمْ يَتَوَكَّلُونَ (99) إِنَّمَا سُلْطَانُهُ عَلَى

الَّذِينَ يَتَوَلَّوْنَهُ وَالَّذِينَ هُم بِهِ مُشْرِكُونَ )

سبحان الله ..
اعوذ بالله من الشيطان الرجيم ..