السلام عليكم ورحمة الله وبركاته
يسعد لي صباحكم و مسائكم بكل الخير حبايب قلبي
ثاني ايام العيد توجهنا .. الى الدانة الثانية من السبع دانات …
دانة مميزة … بسرعة العمار و التطور فيها … ما شاء الله ولا قوة الا بالله
طبعا دبي الكل يعرفها من المحيط الى الخليج …
يالله خلونا نبدا على بركة الله
حياكم الله و بياكم في مدينة …..
طبعا حجزنا لخمس ليال … في فندق معروف و قريب من مول دبي
الي هو القصر داون تاون او مثل ما هو معروف The palace dawntown
في منطقة بلوفارد محمد بن راشد ال مكتوم
وصلنا دبي الساعة 2:00 الظهر
الاستقبال كان ما شي احلى عنه في الفندق
و هني منطقة اللوبي في الطابق الثالث …
بس اول ما ندش لازم تعظيم سلام لابونا الشيخ خليفة و اخوه محمد بن راشد
يابوا لنا الفوط بس كانت باردة و امبونا كنا بردانين من مكيف السيارة … و عصير ليمون بالنعناع يمي يمي
كان لذيذ و صدق عيبني وايد …. اما العيال فما طاعوا يشربون شئ … وزعوا عليهم دفاتر تلوين و اقلام تلوين
عسب ما يملون لين ما نسوي جيك اون ،،،بسبب الزحمة ما شاء الله وايدين اجانب ومن دول الخليج
بعد ربع ساعة او اقل دشينا الغرف …
وهاي بعض المناظر و انا سايرة دبي مول
طبعا حصلنا في سوق البحار سبينس … و شكسبير اهم شي كنت احتاجهم …
هي نسيت اقول لكم حنا كنا حاجزين غرفتنا فاونتن فيوز … بس للاسف عطونا
غرف تطلع على هالمكان بس بعد لا باس ….
المهم تغدينا و حجزنا تذاكر ل برج خليفة
حق ثاني يوم للكبار تقريبا ما اتذكر 125 و للصغار 90
برج خليفة
هالمجسم الجميل لبرج خليفة اول ما ندخل ات ذا توب
الصراحة جدا حلوة و خاصة هالجملة صدق من قالها … من الرمال الى السحاب
فندق القصر من الطابق 124 من اعلى قمة في البرج
و هني بعض المناظر من اعلى البرج
و اخر ما نظهر … بكل لغات العالم ،،، مكتوب ،،، مع السلامة
بكل لغات العالم حبيتك و الله العالم
بس الصراحة ما اقدر اسير اي مكان في دبي مول قبل لا آختصف على
واشرب و امزمز الشاي المغربي … ادمان إلى حد الثماله الصراحة …
ولازم مكروني حق العيال ….
و عقب اتجهنا إلى اكواريوم و شفناهم يايبين تماسيح ،،، ما قد شفناها من قبل
قالوا لنا يابوه يديد بقراطيسه …
بس ما نقلت الصور للحين من الميموري للاب فالسموحة منكم
بحاول هاليومين انقلهم ،،، لاني ولهت على ست الحبايب ،،، جنتي ،،، امايه الغاليه
نسيت اقول لكم تم الاعلان عن عطر قوتشي عود و 007
و عقب ردينا الفندق
وشربنا مرة 2 الشاي المغربي من كافيه al bayt
صدق دبي غير حتى نحن عيدنا كان في دبي والحمدالله استانسنا خاصة في عالم مدهش
بالنسبة لبرج خليفة التذاكر من وين خذتيها اونلاين او من دبي مول ؟ وكم كلفتج وهل الرحلة لقمة البرج مناسبة للاطفال ولا ؟
