يسعد لي صباحكم و مسائكم بكل الخير
كانت رحتنا مميزة .. بديناها بيوم الخميس و لمدة يوم واحد فقط ،، الوجهات
دبي القرية العالمية
الشارقة والذيد و خورفكان و مليحة
الفجيرة بكافة مناطقها و انتهاءا ب راس مسندم في عمان ،،،
طبعا الرحلة كانت وايد مميزة بالرغم من بساطتها ،، بس حلو الواحد يكتشف الامارات الاخرى
و يستانس بمناظر الجبال و الوديان مثل وادي الحلو .. وادي شوكة و سيجي طبعا للاسف
الكاميرا كنت ناستنها في الفندق فصورت صور لا تتعدي العشرين او اكثر بالهاتف
اولا اهديكم هالوردات الحلوة من مكان اقامتنا في روز ريحان روتانا دبي
و نحن طالعين من بعد الاستراحة القصيرة ،،، صوب القرية العالمية
شوفوا شو حصلنا في المنطقة الي جريبه من الفندق
سبحان الخالق ما اجمله ….
وصلنا للقرية العالمية و صوت القرية المفضلة عند بنتي ،،، عسب بيجامات
مميزة على ما اعتقد اسمها بيجامات كوادور
طبعا تمينا في القرية من الساعة 4 العصر لين الساعة 10 كل شوي طبعا كنت اخذ بريك
و ايلس ،،، بس الصراحة الي تروح القرية لازم يكون عندها مبلغ و قدره
شوفوا المنظر ما أحلاه نسيت احطهن قبل
شو اسوي عن الهيازة كملت ما فيني اعيد و اكتب شوفوا المنظر قبل و بعد
الوجهة : الامارات الشمالية
شوفوا الصور و احكموا تستاهل انكم تروحون لها الشارقة … الذيد ،،، الخور ،،،مليحة،، كلباء
الوديان ،،، سوق الجمعة الفجيرة ،،،الفواكه يمي يمي لذيذة و فرش … طبعا ما قصرنا
صعدنا العراجيب ،،، الصراحة رووووعة ،،،
انا ما خليت شي ما خذيته الميني مبخرة حق توزيعات اليوم الوطني حق بنتي
مندوس عود حق اغراضي … خضار حق الشباب يتسلون به في الفندق عسب ما ياكلون
اشياء غير صحية مثل الشوكولا فخذيت لهم مانغو و جوز الهند و يح ،،،
و هني صور من خورفكان ،،،
صورة ل وادي على درب دبي الفجيرة
نسيت اقول لكم مرينا على سكمكم ،،، ما كنت اعرف هالمنطقة الصراحة
كنت اسمع عنها من المرحوم ابونا انا كنا نروح لها قبل ،،،
،،،،،،
و أخيرا و ليس اخرا مو في خاطرها مشاكيك من عمان ؟؟
طبعا تاخذون فيها لفة بدون بطاقات هوية لانج بس بتدخلينها و بتظهرين
منها ،،، على فكرة بعض البيوت عليها علم عمان و الامارات
و هذا ان دل على شي فهو يدل على روح الاخوة بين الاشقاء في دول
الخليج العربي
تم بحمد الله
حبيت تقريرج وحبيت إماراتنا أكثر وأكثر
تسلمين ويعطيج العافية
بس هالصور ؟
حبيييييت خورفكااااااان والوادي 
يبالنا سيرة وياج 
تسلمين قلبي ع هالتقرير البسيط والراقي شرات راعيته
وايد اماكن فاتتج مامريتي صوب البداير والفايه وحتا وشارع الفين
ومن الذيد لمسافي لشارع الموت لدبا
دبا ثلاث دبا الفجيره ودبا الحصن تابعه للشارقه ودبا البيعه تابعه لعمان ومسندم اضن تقصدي خصب عندهم فندق حلو
عندج فنادق حلو في راك في الجزيره الحمره وجريب منه مول الجزيره
ربي يعطيج العافيه على التقرير 
