كيف خليت ريلي يتعلق فيني!

حريم شخباركم يايبتلكم اليوم طريقتي والاسلوب اللي اتبعته لين ما صار ريلي عينه مليانه مني
والحين انا مرتاحة وياه وهو ما يشوف غيري بهالدنيا يقولي انا مرتاح معاج ومحظوظ فيج! مع انه جمالي عادي .

الموضوع ترا ما يخصه بالفراش ابدا!!

الموضوع يتعلق بالشخصيه
كل حرمة عشان تجذب أي ريال فالوجود لازم فيه شروط أساسية تكون فيها :

أولا :
الجاذبية البصرية :
يعني اول ما يشوفج يحس بالرغبة فيج
وهالشي ما يعتمد على الجمال الخارجي هو شي يتعلق ب طريقة الكلام والصوت ، الحركة ، النظره ،اللمس تعابير الوجه كيف تجذبينه بجسدج.
أمثلة:
يعني اذا يلستي تحطين ريل ع ريل اذا مسكتي شي ايدج تتحرك برشاقة اذا شربتي العصير تشربينه بأناقة و برقة تخلينه يتمنى يكون مكان العصير 😂😂
اذا يحكي لي عن شي أحط أيدي ع خدي واسمع واتمقل فيه وهو يستانس جي.

ثانيا:
تحسسينه بقيمتج كيف هو محظوظ انه معاج في حريم يوم تشوفينهم تقولين ما شاالله سنعة و ذربه ومهتمة ف عمرها ويوم تروح عند ريلها ما يسويلها سالفة لنه هي مب حاسة بقيمة عمرها ف هالحالة اخلقي لج حياة مستقلة عن حياتج وياه صادقي بنات اطلعي مرة كل اسبوع وياهن خذو بريك من بعض هو يروح يوم ف الأسبوع ويا ربعه وانتي بيت هلج او صالون او سينما مثلا هو بيحس انه عنده وحدة واثقة بنفسها عندها ربيعات عندها حياه مب بس يالسة ف البيت تترياه يرجع لا شغله ولا مشغلة كل ما طنشتيه هو بروحة بيستوي يطلب منج تطلعون يبا يسرق من وقتج شوي عشان يحسسج بالحب.يوم ف الاسبوع ها مب 24 ساعة هياته.

ثالثا:

يحس انج صعبة منال تحسسينه انج مب سهلة "ها الشي تطبقينه ف ايام الملجة" انا كنت اذا اتصل اول مره أخلي التيلفون يرن وما ارد عليه عقب أرد عليه وكنت كل ما كان يبا يتقرب مني أقوله لا حتى مسكت الايد أقوله ل!!ا يننته هذيج الايام 😂😂😂
لنه الريال يحب يحتفظ بكل شي تعب لين حصل عليه وصار ملك له صدقيني بيقدرج تقدير مب طبيعي.
مره قالي: أسميييج سحبتي علي و لعوزتيني ايام الملجة وأنا: أقوله والله! احسن عقب يضحك.

رابعا:
التواصل
لازم تقدرين تتواصلين مع ريلج بطريقة سلسه تخلقين جو مرح مثلا يكون لكم كلمات وجمل انتو بس تفهمونها لها معنى خاص فيكم يعني مثلا يوم اقول حق ريلي خلاص لازم افتح لي مشروعي الخاص يضحك لنه هاي الجمله ورآها موقف يضحك محد يعرف عنه إلا انا وهو.. ف يوم اقول هالجملة احنا الاثنين نضحك واللي حولينا يستغربون شو بلاهم استخفو ولا شو هههههه.

هاي هي الأربع نقاط المهمة
الجاذبية البصرية .
اعرفي قيمة نفسج.
كوني صعبة بالنسبة له.
والتواصل.
**********
وهاي الأشياء ع فكره سمعتها ف اليوتيوب من خبير العلاقات العاطفية اسمه ماثيو هاسسي Matthew Hussey
من قبل لا أعرس وقررت أطبقها وبالفعل سوت مفعول عجيب معاي واتمنى تستفيدون منها.

ودمتم**

في بنت احين ف هالوقت وما فيها هذا كله ويا ريلها ؟؟؟؟؟؟؟؟؟؟؟؟؟؟

شخباري !!!!!!!!!!!!!!

عيل ليش مواضيع الخيانه تارسه المنتدى؟؟!!! وليش أمثال ناعمه الهاشمي وغيرها تخصصو ف العلاقات الزوجيه ؟؟!!
اذا انتي مثلي ويا ريلج الله يهنيج خلي اللي يبا يستفيد يقرا الموضوع ومشكورة حبيبتي

هي في صراحه انا

وصراحه استفدت وايد من موضوعج وخزنته عندي وبحاول اطبقه

للاسف كنت دلوعه وانا فبيت اهلي واسوي كل ها بس من عرست ويبت يهال وزاد وزني تركت كل هذي السوالف اهملت نفسي وذاتي
بس عسوالف الطلعات ويا ربيعات ماروم لن ريلي مانعني من هالسوالف
بس ابي اتغير صراحه وابي ارجع نفس اول

الخيانه حبيبتي حبه للدنيا والشهوات

شي خاص فيه مع التزامه ويا ربه

لو الريال خليتيه ( يا دهينه لا تنكتين )

اذا في باله يخون ف بيخون

ف ابد ما يخص الخيانه بتقصير سلوكيات الحرمه ويا ريلها

وابد موضوعج ما فيه شي

بس قصدت بكلامي ان طبيعي أي حرمه جذي ويا ريلها ومع الناس بعد .. طبيعه كل انثى جذي كل النقاط اللي ذكرتيها

بالتوفيق

ياليت تساعدوني ارد شرات قبل لن ارادتي ظعيفه مستويه للاسف

الطبيعي جي بس التطبيق شوي لج عليه صراحة ..مب كل الحريم يطبقن هالشي انا معاج مب دايما الخيانه بسبب اخلاقيات الحرمه بس احيانا تؤدي حق هالشي انا أقصد بموضوعي اهتمي بعمرج سوي لج حياه" اكبر غلط انج تعاملين ريلج بأسلوب ‘*يا دهينه لا تنكتين" لا تعطينه اكبر من حجمه انا قصدي كوني يعني ربيعة ريلج فكره حلوه تكونين ربيعة ريلج هالشي له طعم خاص وإضافة لحياتكم