مستشفى راس الخيمه،،ومستشفى صقر والدكتوره عايشه؟؟

السلام عليكم ورحمة الله وبركاته
مرحبا خواتي،،اشحالكن؟؟
خواتي بغيت مشورتكن؟؟شوروا علييه الله يخليكن
انا حامل وهذا اول حمل لي والحمد لله،،وانا من راس الخيمه
مقرره باذن الله اني اربي ف مستشفى الزهراء ف الشارجه
بس على كلام امايه تقول اني لازم افتح لي ملف احتياط ف راس الخيمه
بس انا محتاره مب عارفه وين افتح لي الملف
ف مستشفى صقر او مستشفى راس الخيمه اليديد؟؟
بتقولوا لي ليش كل هالحيره وانت مقرره تربين ف الشارجه؟؟
انا ما عندي حد ف الشارجه
ومب عارفه حزة الولاده بلحق اسير الشارجه والا لا
واخاف اييني عوق وانا يالسه ف راك
ف طبيعي بسير لواحد من هالمستشفيين الله لا قاله ان شاء الله
بس بغيت اعرف الدكتوره عائشه تولد ف المستشفى اليديد والا لا؟؟
وهل حد منكم عنده رقمها؟؟ومتى تكون موجوده ف مستشفى صقر من اي فتره لأي فتره ،،اقصد ساعات دوامها عشان افتح لي ملف ؟ وكم الرسوم المطلوبه لفتح ملف ف مستشفى راس الخيمه؟؟

راك افضل واختاري راما

مشكوره اختي
بس انا اذا كان غصبن علي اربي بواحد من هالاثنينه
ما راح اربي ويا دكاتره يدد،،بربي ان شاء الله مع الدكتوره عائشه والا الدكتوره وفاء
هذيلا خبرة سنين ما شاء الله عليهن وعارفين شغلهن
وطيوبات

انتو الحين الحريم وعندكم بيت وعيال ماله داعي هالاسلوب فى الرد..

والبنت ما غلطت تسال ما فيها شي ..

الغاليه اتصلي مستشفى صقر وشوفي مواعيدهم ..

عموما…
الدكتوره عايشه يمدحونها والله.. و هي فمستشفى صقر احيدها..
بس ماعرف دوامها متى لاني اراجع فمستشفى راك.. بس تقدرين تتصلين فالمستشفى و تسألينهم..
و عن الرسوم مال مستشفى راك ما اذكر بالضبط لاني من كم شهر فاتحه الملف عندهم
بس اللي احيده انها ما تزيد عن 300 درهم و يعتمد اذا عندج انشرنس…

للرفع

الله يقومج بالسلامه مستشفى راك ما عليه كلام بس على ما اسمع ما عندهم حضانات لليهال اذا لاقدر الله صار شي
ونصيحتي افتحي بصقر وراك انتي مب خسرانه وين الله ما سهل بتربين…