وقت الولادة منو كان وياج؟؟

السلام عليكم جميعا يا أمهات ويا صاحبات التجارب

أبا أعرف لما ولدتي كمنو دخل وياج؟؟
ومنو تفضلين يكون معاج؟؟
طبعا اللي بيدخل وياج غرفة الولادة لازم يكون شخص مريح ترتاحين له ويقدر يطمنج ويهديج،،

أنا عن نفسي ما عندي حد ممكن يدخل غير أمي وعمتي وريلي

بس امي فيها السكري والضغط وأخاف عليها
وعمتي فيها القلب وأخاف يستوي بها شي
وريلي أستحي منه الصراحة فشيلة أحس

زين شو أسوي؟؟

واللي دخل وياها ريلها شو سوت وهو كيف كانت ردة فعله أول مرة

صح في بنات بيقولون ريلي وعاجي وإنه ما بيشوف لأنه بيكون صوب راسج بس أحس الموقف كله يفشل

شو سويتوا انتوا؟؟

وبعد عندي سؤال محرج وايد بس أبا أسأل:

بالنسبة لتنظيف المنطقة الحساسة وايد صعب على أشهر الحمل الأخيرة، زين فأكيد على وقت الولادة التنظيف بيكون أصعب، شو كنتوا تسوون وشو تستخدمون ؟؟

أعرف انه أسئلتي سخيفة بس هاي أول مرة حامل

الحمد لله بو العيال جزاه الله خير

مي….وريلي…و عمتيه…..لا عيب ولا مستحى في هاذيج اللحظه….وهم مب متفيقين يطالعون…الي يقراا عليج والي ماسك يدج والي يهمزج =)
الله ذكريات حلوه الصراحه..الله يهون علي كل حامل

الفليل وانا راقده طرا عليه انظف نشيت الساعه 2….لول قعدت عل كرسي في الحمام انظف بحلاوى طبعا صعبه واااايد….آآآآآآآآآآآآآآآآآآآآآآخ معاناه…..و يوم سرت ارقد الساعه 4…تميت افكر اب شو بسمي البيبي…وعيت ريلي…جان اقوله ابا اسميها الريم…جان يقولي رقدي…..رقدت…و عل ساعه 5 نشيت اوعيه حق الدوام…اول ما وقفت جان يتبطل الماي عليه! ذكريات

انا هذا أول حمل لي.. بس لازم ريلي يحضر الولادة و يشوف معاناتي و يشوف كيف روح تطلع من روح.. عالعموم أنا هيئته للولادة و راويته فيلم وحده تربي :} و قلتله تراه جذيه الولادة عشان ماينصدم ههههه… و أنا مادري ليش الحريم يستحن من أزواجهن يعني ماشاف جسمج و شفتيه؟!!!!! خلاص بعد ليش المستحى.. أنا الصراحة أستحي من أمي و خواتي بس ما أستحي من ريلي. بالنسبه لشيل الشعر.. ييبي منظره و حطيها جدامج عشان تشوفين و شلي بالحلاوه

في ولادتي الأولى كان الكل داخل معاي
يدتي اله يرحمها وعمتي وحمياتي اللي ما عرسن وامي بس قبل ما اولد بنص ساعة طلبت انهم يطلعون .. كنت بصراحة ابغي امي ويدتي بس .. لكن اهل ريلي ما فهموا فطلبت من النيرس الأجنبية انها تطلع الكل.. وريلي كان في غرفة الانتظار يقرأ القرآن

وفي ولادتي الثانية
امي كانت معاي بس وريلي كان يبركن السيارة ولما وصل الغرفة قالوله اني ربيت

أمي فديتها كانت واقفه على راسي وماسكه ايدي وتقرا عليه آية الكرسي والمعوذات وأذكر كانت تقولي راح الكثير حبيبتي وما بقى شي )) فديتها والله حسيتها تعبت وايد خاصه ان فيها السكري واختي الكبيره بعد وقفت معاي طول الوقت في غرفة الولاده مع انها مش متزوجه بس حلفت الا تدخل الغرفه وتكون ينبي هذيج الحزه مع ان الممرضات طردوها كم من مره ههههه يحليلها وبخصوص بو الشباب حضرته قاعد في غرفة الانتظار مع اخوي وداقينها سوالف ونكت وأنا صريخي شال المستشفى بس فوق هذا كانوا متوترين وايد ويغطون السوالف على خوفهم واختي صايره لهم مرسال من غرفة الولاده لغرفة الانتظار ههههه والله انها حاله وبعدين شو اللي يفشل حبيبتي هذيج الحزه يعني أنا خليت الغرب والأجانب يشوفوني وأمي اللي يابتني ما تشوفني بالعكس أمي كانت كل حين تطالع وتشوف عشان تخبرني اذا الراس طلع ولا لا ما فيها شي هذي أمي مش غريبه ..
وبخصوص شيل المنطقه الحساسه صدقج يكون صعب على الوحده في شهورها الأخيره وفي هذي الحاله ما كان عندي غير واحد يساعدني اللي هو زوجي وصدقيني ما فيها شي لو طلبتي منه يشيل حقج انتي وياه متزوجين وكل اللي يصير من بينكم بالحلال والحمد لله فليش المستحى وبيني وبينج راح يفرح لو طلبتي منه هذا الطلب وما راح يمانع هههههه اسأل مجرب