مستلزمات المولود الجديد

السلام

أنا حامل في الشهور الاخيرة و ما عندي حد يساعدني فيا ليت يا ليت القى المساعدة من عندكم

للحين ما اشتريت شي للبيبي و ما جهزت اي شي الصراحة مب عارفة و هذا اول مولود لي

تلففت في المولات بس ما شريت شي شو اشتري شو الكمية شو القياسات شو الاشياء الاساسية و شو بحتاج اول الايام في المستشفى

بليز ساعدوني وايد احاتي

للعلم البيبي ولد ان شاء الله

تقوم بالسلامة حبوبة
شوفي اهم شيء انج تشترين للبيبي شنطة ومدس اللي يليبنج باج عشان وانتي طالعه من المستشفى تشلين البيبي فيه وبتحصلينه في بيبي شوب. تلاقين اطقم الشنطة والمدس نفس الديزاين فرصه الحين بيبي شوب تنزيلات
وطبعا خذي للبيبي تقريبا 3 او 4 قطع افرولات قياس نيوبورن و4. قطع 0-3 ﻻن البيبي بسرعه يكبر ونفس الش وطبعا مع الافرولات ﻻزم تاخذين كاب لراس البيبي كذا لون .. خذي اندرويرات (شلح داخليه) 0-3 …. وبما ان الحين برد خذي صوف احسن … وبعد لاتنسين قماطات ملونه خذي كذا لون عشان تناسب ملابس البيبي…. وفوطتين حق البيبي… واهم شيء حوض حق تسبحين البيبي عندج. انواع واشكال بكل مكان …

وحقج انتي ﻻتنسين جلابيات. ودلاغات بوقت الولادة بتحسين ببرودة لبسيهن إذا احتجتي
وطبعا ادوات النظافة الشخصية … وستيانات رضاعه بتحصلينها بماركس سبنسر او بيبي شوب او مذركير
امممم هذا اللي يحضرني حاليا اي شيء اتذكره برد اكتب لج ان شاء الله

الله ايقومج بالسلامة

بالسلامه حبوبة وربي يسهل وييسر لج

**

وعليكم السلام اختي
الله يقومج بالسلامة
لا تحوطين ولا تدورين
سيييييدة مذركير قياساتهم حلوة (بيبي شوب قياساتهم صغيرة) وبعدين بيبي شوب للاغراض

من مذركير:-
خذي الفانيلات اللي يسكرن من تحت وكمه قصير عملي ويسوي حماية لباط البيبي
واوفر اول للبيت طقم مع الفنايل:
نيوبورن ( 3 حبات من الفنايل و3 من الاوفر اول)
عمر 0-3 (6حبات فنايل و6 اوفر اول)
*ماتحتاجين قفازات لان اغلب الاوفراولات لهم ثنية عند الكم تلفينه على كف البيبي فهو بديل عن القفازات قبعات القطن يكفي 2 وقت النوم بس عشان التدفئة والا في النهار خليه يتهوى

2 طقم خروج عمر 0-3 مع جوارب مناسبة وقبعة ( عند التاجرة little steps جوارب كأنها احذية واااايد حلوات خذت علبتين كل علبة فيها 6 ازواج جوارب)

6 قماطات قطن

2 قماط كبير مخرم للخروج

سلة موسى ( تناسب الطفل اول ثلاث شهور بس) او ( اشتري منز يناسب الطفل من الولادة لعمر سنة ونص تقريباً بس خذي اللي ينزل من جهة وحدة اسهل وقت تشلين البيبي من المنز)

فوط استحمام للبيبي ( cuddledry) ممتاز تلفينه على رقبتج وبعد ماتسبحين البيبي تحطينه على صدرج وتلفين الفودة عليه وهو في حضنج عشان ماتتخرسين ماي

من بيبي شوب:-
*صابون بودرة لغسل ملابس الاطفال وملطف ( احسن شي اللي لونه وردي)

شنطة مع مدس طقم ( سليبنج باج) للبيبي

حوض استحمام للبيبي

baby wash من سيباميد طبي

shampoo من بيجون احسن ( مش كل مرة تسبحين البيبي تحطين له شامبو بس وقت تحسين ريحت راسه مب زينة)

مناديل التنظيف من سيباميد طبي ( تحتاجين المناديل وقت تكونين برع البيت او بالليل اذا تعايزتي تغسلينه في الحمام)

قطن طبي ( بتحتاجينه لتنظيف ويه البيبي بعد ماتبللين القطن ماي دافي)

مرهم بيبانثين عدد 2او اكثر ( بعد كل مرة تنظفين منطقة الحفاظة تكفي كمية صغيييرة وبعد مناسب للحلمات المتشققة ومايحتاج تغسلينه للرضاعة) تجنبي سودو كريم يسود

حفاظات الثدي من بيجون ( احسن شركة عن تجارب البنات في المنتدى) بعد كل رضاعة تغسلين الثدي بالماي وتحطين الحفاظة داخل في السنتيان بتحتاجين كمية كبيرة خاصة اول شهرين عشان ماتتوسخ ملابسج من الحليب اللي يسرب

فوط صغيرة قد الكف في مجموعة خمس او ست او عشر حبات مع بعض ( تحتاجينهن وقت الرضاعة تحطينه تحت ذقن البيبي وتحطينه على صدرج ومرات ممكن تنظفين البيبي بالفوطة المبللة بالماي الدافي اذا ماقدرتي او تعايزتي تسبحينه في الحوض وبعد تسونهن كمادات ماي معتدل للبيبي اذا عنده حرارة

مقص اظافر للاطفال ( عندنا مانقص الاظافر في الاربعين عشان مايطلع حرامي خخخخ)

شفاط للانف ( عشان تنظفين خشمه اذا مزجم )

ميزان الحرارة عن طريق الاذن من براون ( الكل يمدحه وقراءته دقيقة)

يلاسة كرسي هزاز ( نابض) يصلح من عمر شهر ونص لين 8 شهور تقريباً،، اختاري اللي يتنظف بالمسح احسن

حفاظات بامبرز الابيض ( الاصفر يقرص بعد كل تبول) ممتاز قياس 1 الكيسة الصغيرة حق الايام الاولى
حفاظات بامبرز الابيض قياس 2 الكيسة الكبيرة عدد 2
حفاظات بامبرز الابيض قياس 3 عدد 1

من الصيدلية:
infacolعدد 2 او اكثر بتحتاجينه عشان مغص البيبي اذا ابتدى يصيح ومايكون يوعان او بردان او متوسخ
عطيه في البداية مرتين في اليوم قبل الرضعة واذا ماكفاه عادي تعطينه قبل كل رضعة

محاليل tonimer انابيب ماي وملح بحري معقم عشان تنظيف عيون البيبي وخشمه اذا احتاج وعشان بعد وقت ختانته ( ختنيه في الاربعين اريح لح وله بالحلقة بس اليوم اللي بتختنينه سبحيه ولا تحطين له لا زيوت ولا كريمات ولا حتى مرهم الحفاظات لين تطيح الحلقة بعد الختانة بحوالي خمسة ايام،، ومن يتختن وعليه الحلقة كل مايتبول صبي عليه من هذا المحلول الملحي واذا تبرز عادي غسليه في المغسلة بالماي ونقطة من بيبي ووش مال سيبايد للمؤخرة بس لاتين صوب جدام بالصابون وقبل ماتلبسينه الحفاظة صبي علي مكان الختانة من المحلول)

مانصحج ابد تحطين كريمات للبيبي في شهوره الاولى ( المستشفى نبهونا وقالوا الزيوت الطبيعية تقوي مناعة البيبي) ادهنيه بشوية من زيت الزيتون كامل جسمه وراسه وتجنبي ويهه كل مغرب واليوم الثاني الضحى سبحيه

(( هذي من تجربتي مع عيالي،، بجري اشتريت له اشياء كثيييرة وماستخدمته،، اللي ذكرته لج يكفي اول 3 شهور وهذي الاشياء اساسية لكل طفل))

بالنسبة لج خذي سنتيانات الرضاعة ( ماركس اند سبنسر قياساتهم مريحة ماذر كير وااايد يمسك) وملابس لهم فتحة من جدام او لاستيك ممكن ترضعين وانتي لابستهم وقطن للنفاس ومشد خاص لبعد الولادة ويفضل لو خذتي الاندر وير من ماذر كير اللي ينلبس مرة وحدة وينرمي بتحتاجينه اول اسبوع بس خذي قياس اكبر من قياسج لانه صغير اذا على القياس اللي متعودة عليه وفي مريلة كبيرة نلبس على الصدر تسترج وقت ترضعين البيبي في مكان عام اختاري لون اسود اذا تلبسين عباه عشان مايلفت الانتباه

اذا كنتي تسوقين سيارة بروحج وماحد يسوق عنج ضروووووري كرسي اطفال للسيارة يكون مخصص للمواليد الصغار
في الغالب بتحصلين من عمر 0-9 او 0-12 اختاري اللي له حماية للراس عند الجوانب

الكرسي اللي ينحط على العربانه فكرته حلوه لكن من تجربتي غير عملي ياخذ وقت ومجهود في الفك والرفع والتركيب وعقب فك ورفع وتثبيت بالحزام يعني شغلة طويلة وممكن البيبي يصيح عليج وانتي تبين تخلصين

افضل الكرسي يكون على طول مثبت في السيارة بس تحطين البيبي عليه وتحزمينه

وقت تروحين العيادات والمراجعات او حتى تتسوقين بتتعبين اذا بتشلينه احسن لج تحطينه في العربانة
اختاري stroller اللي ظهره ينسدح وتكون له مظله وشبك من تحت طبعاً السترولر وزنه خفيف وسهل الفتح والتسكير وقبضات الدفع منفصلين فتقدرين تعلقين الاغراض عليه

تجنبي bushchair لان وزنه ثقيل وياخذ حيز اكبر في السيارة وماتقدرين تعلقين اكياس التسوق او الشنط عليه

اذا كنتي تشتغلين فبتحتاجين مراضع وشفاط حليب وباقي الملحقات خبريني بحط لج رابط فيه التفاصيل

نبا بس دعواتج الحلوة الله ييسر عليج ولادتج ويقومج بالسلامة