انا يايه عندي مشكلة بسيطة وابغيكم تساعدوني وتقولون لي شو لازم اسوي
لان التفكير كلا مخي وراسي
الله يسلمكم انا اشتغل وراتبي زين ولله الحمد
ريلي من فتره قدم استقالته و وافقو عليها بعد رفض كم مره
الشغل ما كان عايبه وكان عنده مبلغ ف البنك قال بقدر ادبر عمري الين الاقي لي شغل ف مكان ثاني
احينه صار له اكثر عن سنه بدون شغل غير جيه راح كل مكان وحط اوراقه وف توطين واكثر عن مكان بس محد طايع يقبله لان شغلته قبل شوي حساسه
المشكلة احس صار يتحسس من هالشي انه مايشتغغل وصصايرة تستوي وايد مشاكل بينا احس هو متوتر ويحاتي
وانا بين فتره وفتره احاول اشيك ع حسابه من المسجات اللي اتييه من البنك
احينه مووووووول لي عنده مايسد شهرين قدام
انا مستوية مول ما اطلب منه وهو وايد يضايق من هالشي بس انا مابا اكلف عليه انا يالسه اصرف ع عمري وع العيال بس هو مب طايع يشل درهم واحد حق عمره
ويتم يحسسني انه انا وهو مب واحد
غير جيه بنات اخوه يشتغل وحرمته تشتغل ويرد يطلب منه فلوس ومابتصدقون يطلب مبالغ كبيره من ٥٠ الف وفوق وريلي يعطيه
الين احين خلاص ماصار عنده شي ويوم يقول لاخوه رد لي عليك يقوله عقب احينه ماعندي
المشكله اخوه يطلبه ف اشياء كماليه
يعني تخيلو قبل كم شهر خذا عن ريلي ٦٠ الف عشان يشتري يخت 
وريلي عطااااه واحينه ولا يشوفونه حتى حرمته مول ماتشوفه ٢٤ ساعه ف البحر
اي شي يبونه يقوولون لريلي وهذيل اهله وماباه يقصر وياهم بس كله ع راسه وكله هو يسويليهم
والباقين ولا كانه له خص
—-
اخر شي بقول موقف صار وحسيت اني لازم اسوي شي
اخوه كل مره يطلع فيها البحر لازم يخسر اقل شي ٤٠٠٠ بترول ع تنظيف مكاين وغيره ،،،، ريلي تم يغلط ع اخوه بكلمات ويسب لانه يطلع ربعه وهو يدفع عنهم كل شي ،،،،، يقول ولا واحد من ربعه قاله لا خلها علينها وهم يوومياااااااا يطلعووووون قال شو من ربع هاييل مايستحون
>> يتكلم عن عمره يقول انا لو طالع ويا ربيعي بسيارته ويسير يعبي بترول احلف عليه اني انا لي اعبي ع حسابي ويوم نسير نتعشى انا لي ادفع
ف حسيت ماعرف وايد اضايقت من كلامه يمكن هو مايقصد شي بس انا حز ف خاطري لان ماقد قلتله تبا شي ولا ف خاطرك شي
انا مابقصر
بس مره صار موقف وجد عقبها ماتجراءت اسويها
كنا طالعين نتغدا ويوم يا وقت الدفع انا دفعت ،،،، تعرفون طالعني بنظررررة خلاني اصيح منها 
ويلس يقول كلام وايد ماذكره لانه من فتره وايد طويله
ومره ف العيد ماعرفت شو ايب له هدية قمت سويت له باقة كلها بيزات تعرفون شو سوا ف البداية ماطاع ياخذها وقللتله شفيك هاي عيديتك ،،، قام سحب من حسابه دبل المبلغ لي حطيته وعطاني ،،، انا زعلت ع الحركة
بس احس هو كانه يقول انا ماشي ناقصني وهو بالعكس احس الموضوع ماثر فيه
واخر موقف صار قبل كم شهر اخوه لي اصغر عنه كان شخص يطلبه بدين حول لا١٠ الاف وراح ريلي وسدده عن اخوه ،،، وعقب هالسالفه اخوه توظف ف مكان حلو ما شاء الله وبراتب حلو ،،،، اخوه اول ماستلم الراتب يا عند ريلي قاله شي ف خاطرك ،،،،، تعرفون شو ردت فعل ريلي ،،،،، يا عندي معصب يقول شو هاييل يتحروني بحاجة حد منهم ؟؟ الحمدالله مابا شي من حد واقدر اعيش واعيشكم لحد ايي يسالني عن حاجتي ولا شو ناقصني
اعرف وايد رمست ودخلت ف اكثر من موضوع واغلبكم مايعرف شو السالفه هههههه
بس لي ابا اعرفه شو لازم يكون موقفي ،،، اعطية حتى لو هو مايرضى ياخذ عني؟ اطلب منه مثل قبل عشان لا يتحسس ؟ لان اعرف والله لو اقوله ابا الشي الفلاني بيبه لو شو عشان جيه ما اطلب واقوله يوم بيكون ف خاطري شي بخبرك
خبروني كيف اتصرف وياه
عفواً اختي لا تعرضين عليه اي مبلغ مالي
لانج تطعنين في رجولته (هذا من وجهة نظره) و بعد تزيدينه احساس بالنقص و العجز
ما شاء الله على ريلج طيب و قد مسؤولية لكنه تسرّع بأن يقدم استقالته قبل مايحصل على فرصة وظيفية ثانية
الله يسهل أموره و يحصل على وظيفة مناسبة له
المهم انتي شو تسوين؟؟!!
لاتعرضين عليه فلوس نقد نهائياً
اذا حاسة انه ممكن يفتح تجارة و يديرها ممكن تعرضين عليه فكرة مشروع او تطلبين منه فكرة مشروع و هو يستثمر فيها فلوسج
بس حسسيه انه مب مساعدة لكن لأنه هو "أذكى منج و قادر على تحمل هذي المسؤولية و انتي ماتثقين تعطين حد غيره هذا المبلغ و لأنه ريّال بيراكض و يجابل المشروع و انتي ماعندج و قت لان بعد دوامج تجابلين عيالج" طبعاً هذا الكلام اللي بتفهمينه اياه اذا حبيتي الفكرة
اذا ما رضى ممكن يستغل هذي الفترة ياخذ دورات ممكن تفيده في شغله مستقبلاً
وقت هو مب موجود في البيت استغلي هاتي اغراض البيت بسرعة قبل ما يوصل
لأن مشهد انج انتي اللي تسدين حاجة البيت و العيال بتكون مؤلمة بالنسبة له
حسسيه انج محتاجه له حتى لو تقولين له مشتهية عصير مانجا من الدكان او ايس كريم صدقيني بيسارع و بييبه لج.. اطلبي منه أشياء بسيطة عادي مابيثقل عليه بس بيعطيه احساس بالرجولة
انتي اللي عليج انج بالخش والدس حطي في بوكه 500 .. خرده مب 500 كاملات
يوميا حطي عشان ما يكون محتاج او يتحسس منج وانتي تعطينه او تحطين في حسابه
جذي بتساعدينه وتقدرين تطلبين منه أشياء بسيطه
وحسب حاله بوكه اذا في مثلا 100 حطي 100 زياده او 200 زياده
عشان ما يشك
بالتوفيق
اختي في رأيي حاولي لا تضغطين عليه بشي خصوصاً ان حسيتي انه يضايقج من هذا الشيء في رأيي لو انج تساعدينه انه يلاقي وظيفة يكون احسن يعني من غير علمه طبعاً خلي واحد من اهلج يتوسط له ويلاقي له وظيفة أو حد من معارفج في الدوام ربي يعينه ويسهل اموركم
بس حاولي تقدرين ريلج لان ريلج فعلا انسان طيب …خليه يقدم في أدنوك الحين يبن وايدين
الله يوفقكم يارب
وقفتج مع ريلج بهاي الظروف و سعيج لمساعدته اكبر دليل على حبج و اخلاصج له و طيب أصلج
و ريلج طيب و راعي واجب
و نفسيته حاليا شي طبيعي يمكن اي ريال في وضعه يتاثر و يظايج
لان طبيعة تكوين الريال و أهم اهتمامه انه يوفر المصرف حق اسرته
لا تزعلين منه و لا تظايجين على ردود أفعاله و تحملي شوي
و انا أفضل المصارحة و الحديث بشفافية و حب في هالموضوع
كلميه اختي و ان شاء الله بترتاحين و بتتصرفين بالطريقة الصح و بتسوين اللي هو يباه
مهما قلنا لج و اقترحنا عليج افكار يظل الشي اللي يباه ريلج هو الوحيد اللي يعرفه
بالتوفيق