المقادير:
– نص كيلو لحم عجل مفروم (مب المثلج لأنه ما بيتكور وياج)
– بقسماط
– حزمة شبت مفروم (ممكن أقل إذا ما تحبينها وايد..مثلي)
– زيتون أخضر مقطع
– ملح وفلفل أسود حسب الذوق
مقادير الصلصة:
– معجون طمام (اللي يكون في غراش مثل العلالي..مب مال البيتزا أو المعكرونة)
– ماي
– حبة ماجي
– زيتون أسود مقطع
– ملح حسب الرغبة
الطريقة:
عقب ما تغسلين اللحم, ضيفي المقادير كلها ما عدا مقادير الصلصة. كمية البقسماط والزيتون على كيفج. يعني حطي الزيتون لين ما تحسين إنه كفاية. مب وايد ولا شوية. والبقسماط ينحط لين ما تقدرين تكورين الكبة بدون ما تتفتفت وياج. اعجني المقادير كلها واضيفي الملح والفلفل الأسود وكوري الكبة.
ييبي جدر وصبي ماي فيه وحطي صلصة الطماط لين ما تشوفين لونه شوي غامج وطعم الطماط ينطعم في الماي. خليه يفور شوية وحطي الماجي والزيتون والملح إذا يحتاج. وبعدين حطي الكبة حبة حبة داخل الجدر وخليها تطبخ. كمية الماي لازم توصل لين نص مستوى الكبة. عشان يوم ينشف الماي شوي, الصلصة تكون غليضة شوية. قدميها ويا الخبز عقب ما تستوي وبالهنا والعافية.
وتسلمين
تسلم يمناج الغاااااااالية ..