بنتي تدعي المرض!

السلام عليكم بنات،
اتمنى تساعدوني احصل الحل.
عندي بنت في الثاني الابتدائي عمرها 7 سنوات تقريباً، من فترة تشتكي من الم و دوخه مستمرة في المدرسة، كل يوم تقريبا يودونها عند الدكتور ، لا وبعد تقول انها ما تشوف الكلمات في السبورة.
الاول اعتقدت انها بسبب الشقيقة لانها كانت زمان احيانا تعاني من الشقيقة، بس كانت بفترات متباعدة مش يوميا مثل الحين.
والبيت مشاء الله عليها ابدا ما تيها هاي الاعراض، دوم على الاب توب او آي باد و تذاكر الا غصب.
المهم وديتها عند دكتورة اعصاب سوتلها اشعة MRI و طلعت النتيجة ان الحمدلله ما فيها شي و حولوها عند دكتور نظر ، سوالها فحص، بس الغريب ان اثناء الفحص ما شافت ولا صورة حتى الصور الكبيرة؟!
الدكتور سوالها فحص مرة ثانية و بعدين سوالها قطر توسيع الشبكية، بعد ما شافت؟!
بعدين الدكتور طلب مني انها تطلع من الغرفة شوي، و لما طلعت، قالي ان اللي فيها حالة نفسية 100%، يعني لا يمكن الضعف البسيييييييط اللي عندها يخليها ما تشوف لهاي الدرجة حتى الصور الكبيرة.
و بعدين سألني اذا كان عندها اخوان اصغر منها ، رديت ان الحمدلله عندها اخت اصغر، قالي ان بنتج ما تبا تشوف، هي مش كذابة بس هاذي محاولة لجذب الانظار لها لانها حاسة ان ما لها اهمية في البيت.
من كلام الدكتور بديت اراجع تصرفاتي ، انا غير بناتي عندي ابن اخ يتيم الابويين عايش عند أمي، اكبر من بنتي و انا وووايد اهتم لأمرة ، هو اكبر منها ب5 سنوات ووايد يضاربون ويا بعض و اغلب الاحيان تكون بنتي الغلطانه و اغلطها، بس هو لما يكون غلطان اغطله بعد بس اسلوبي يكون لين معاه عشان ما اجرحه.
هذا بالاضافة اني لما يبت الصغيرة انشغلت عنها واايد بس يشهد الله اني ما اهملتها ، بس الصغيرة بعدها عمرها سنة و تحتاج رعاية اكثر من ناحية النظافة و الاكل.
انا واايد اهتم ببناتي و خاصة هاي البنت لانها اكبر ، انا وابوها دوم نشتريلها العاب و ملابس و ما اعتقد اني اقصر معاها بشي ، ادرسها و امشطها و اسبحها و احيانا انيمها لما يكون ابوها في الدوام ، غير اني اعصب عليها و احيانا اضربها بسبب شقاوتها و عدم اهتمامها بالدراسة.
بس والله احترت شو اسوي ، اليوم خبرت مدرستها عن السالفة ، قالتلي انهم كل يوم يعطونها بندول لما تكون تعبانة ، طيب الحين شو يسون؟ اذا طنشوها ما تهتم بالحصة و تتم دايما تتألم من راسها؟
والله احترت و انا ما قصرت مع حد و الله.
شو اسوي ؟ هل اواجها بكلام الدكتور ؟ و الله اني تعبت و انا بروحي فيني اللي مكفيني.

أختي ربي يعينج . ما أقدر أنصحج نصيحة ممكن تكون نتيجتها عكسية , بس اللي أشوفه أنج تستشيري طبيب نفسي أحسن . خذي رأيه أول وشوفي شو بيقول .

صباح الخير اختي ام احلى البنات..شحالج..ماحبيت اطلع وانا مب معلقة على موظوعج. لا تزعلين ولا شي. انتي ما قصرتي فحد. وساعات تصير اشياء مش بيدنا. واليهال ماشا الله عليهم ينفننون بتعذيبنا هههه.
المهم. امس كنت اسمع قناة نور دبي. وكانوا مستظيفين دكتور نفسي مواطن يشتغل في مستشفى حكومي فدبي بس ما ركزت في اسمه لاني كنت اسوق. بس كلامه وايد كان حلو ونصايحه ممتازه للمستمعين. كان في برنامج "يعتمد" مال المذيع عبدالله اسماعيل. ووايد مستمعين طلبوا رقمه وانا سجلته. اتصلي فيه على العيادة واعرضي عليه مشكلتج مع البنوته واكيد بيفيدج. بطرشلج رقمه على الخاص. الله يطمنج عليها يا رب. نهارج سعيد. غزالة.

اختي غزالة، الف شكر على المشاركة ، و بكون بانتظار رقم الدكتور.

العفو حبيبتي..طرشته.

معقول 32 مشاهدة و مشاركتين بس من الاخوات وجدان الفجر و غزالة.

اول شي سويه اتقربي منها لا تسأليها عن دراستها وسأليها عن ربعها مثلا أشحال فلانه وشو سوت أبلة الرياضيات اليوم بس انتبهي لجدولها عن يكون ما عندها رياضيات

من هنيه بتحس إنج مهتمه فيها مب تسألينها عن نفسها هي جيه بتحس انه محد يعرف أخبارها بتضايق

اذا طلعتي مكان خلج طفوليه شراتها اسأليها شو نسوي خليها هي تختار اللي تباه اللون والأكل وإذا شي مب صح خبريها ليش

اذا رمستج اطالعيها ورمسيها لا تكلمينها وانتي تطالعي التلفزيون او مشغولة بأختها هي شكلها تبي تحس بالاهتمام

المدرسه يمكن عندها مشكلة في الصف او الأبله او وحده من ربيعاتها حاولي تحضنيها وخبريها إنج معاها يمكن تفضفض عن اللي بخاطرها

يمكن مستصعبه الدراسه خله الدراسه لعبة في حياتها افتحي كتابها مثلا العلوم وشوفي الصورة وعلميها بطريقة الرسوم ادري انه هذي شغلة الأبله بس صعب عليها تركز اهتمامها على طالبة وحده

حاولي ترسمين وتقولين لها هذي انتي ونحن معاج ونحبج قربي العلاقة بينج وبينها

بوسيها وخلي خواتها يبوسونها هنيه بتحس معنى البيت

الله يحفظها