والله يا خواتي ماتوقعت انه ايي اليوم الي انزل فيه مشكلتي واطلب منكم انكم تساعدووني لاني وصلت لحالة صعبه جدا جدا ونفسيتي تأثرت وايد ويوم عن يوم اتعب زياده من التفكير ..!!
ما اعرف كيف اكتبها واحس كل الابواب تسكرت في ويهي مالي غيركم بعد الله سبحانه وتعالى
زوجي حبيبي بو عيالي طلع يحب وحده ويرمسها من وراي وانا يا غافلين لكم الله ..!!
تغير علي فجأة مع انه كان يموت فيني ومايصبر على فراقي..استوى انسان ثاني وانا حرمته صرت ما اعرفه واكرهه من تصرفاته..قلت يمكن عين وماصلت على النبي (مع العلم انا محافظه على قراءة سورة البقرة والاذكار واحصن بيتي) حاولت اتقرب منه وهو يبتعد عني .. وكثرت مكالماته وطلعاته بحجة انه مع ربعه وكان كل مرة يستغل انه عندي اجازة ونسير نغير جو ونسافر وهالمرة غير غييير يقول لي ما اقدر اخذ اجازة وايلس وياج ونغير جو ونسافر .. ويوم عن يوم صار عصبي مايتحمل مني كلمه وقبل كان يتمنى اني احمل وهالمرة يوم عرف بخبر حملي ماعبر عن اي مشاعر بس قال مبروووك غير عن الحمل الاولي الي كان طاير من الوناسه فيه..!!
كله سرحان ويفكر ويخش موبايله عني وانا الحمدلله مب من النوع الفضولي الي يحب ينبش من ورا حد.. بس ربي راد وكشفه وعرفت انه يحب ويرمس وحده و24 ساعة يفكر فيها ويبا يشوفها ويقعد وياها ويتعنى يضرب خط لآخر الدنيا بس عشان ييب لها الاغراض الي خاطرها فيها وغير عن انه فلوسه كلها عليها .. وكل ما ياخذ لي هديه يكون لها نصيب بنفس الهديه
يوم اكتشفت انهرت وصحت لين نشفت دموعي حسيت قلبي بيوقف..تمنيت اني اموت ولا اشوف مسجاتها عنده.. حب وغرام وخربطيشن وانا حرمته مستبخل علي هالكلام.. آآآه يا حرقة قلبي راويته المسج وانا ميته من الصياح ..قعد يصيح يترجاني اسامحه سألته طلعت وياها.. قال لي لا بس كنت اواعدها في الكوفي .. قعدت اصييح من كل قلبي وسأله انا في شو مقصره قالي مب مقصره في شي وقعد يستسمح مني ومسح رقمها من تلفونه وانا ادري انه مابيمسحها من قلبه 3/>
عقبها بفترة اكتشفت انه هذي فلانه كانت تحبه قبل لاياخذني وهي تصير له من بعيد.. وللحين الله مارزقها بولد الحلال وهي حضرتها متعلقه فيه وهو ودرها فترة ورد لها وتعلق فيها.. تخيلو صار يكلمها عن كل شي يخص حياتنا مشاكلنا مناسباتنا مشروعاتنا مخططاتنا وحتى عن البيبي.. وهي صارت تعرف وايد اشياء عني وانا ما اعرف عنها غير اسمها ..
يوم عن يوم توصلني رمسه انه بعدهم على تواصل مع انه قلل طلعته بس انا مب عارفه ش اسوي اخبر منو والا منو .. رد على نفس حركاته الاوليه صاير جاسي مايحس فيني متعبني متعبني ويقتلني في اليوم الف مرة..!! اتصل فيه في الدوام مايرد علي وعقب اكتشف نه يرمسها .. من يرمسها ينقلب علي ومايحبني مايتصل فيني ولا يسأل عني
انا مب مقصره فيه الحمدلله ..ليش ما صاني مثل ما انا صنته في حضورة وغيابه.. ليش كلمها عني وعطاها ادق التفاصيل عن حياتي ويشاورها في كل كبيرة وصغيرة تخص حياتنا ؟؟كيف يا بنات احل هالمشكله و لو انحلت كيف برد اعطيه الثقه وكيف بكمل حياتي معاه؟؟ تغيرت مشاعري تجاهه على كثر ما احبه احس انه يطعني ويجاملني فكرت بالانفصال بس مب هاين علي بنوتي وولدي الي فبطني!!!!!!
انا وايد تعبانه يمكن لاني توني اعيش الصدمه الله لايحط وحده منكم في موقفي ولايخليها تذوق مرارة الي ذقته ..ادعولي بنات ان الله ياخذ حقي منها ابا اواجهها و اوقفها عند حدها لان مبين عليها قوية عين وزوجي العزيز كيف اتصرف معاه؟؟ اخبر امه والا خواته ولا منو؟؟
دايره فيني الدنياااا وحسبي الله ونعم الوكيل على كل وحده تخرب بين زوج وزوجته..
الحمدلله على كل حال 
صدمه كبيره
ان شاء الله تعرس وتفتكين منها
ويرد لج ريلج احسن عن قبل
بس لازم تاخذين موقف من الي سواه
راويتيه المسج واعتذر ورجعتي له عادي!!
هذا اكبر غلط بيحس ان الوضع عادي عندج
المفروض ماتياسين كوني اقوى عن جيه
تغيري عليه .. حسسيه بالذنب وان الي سواه مب شويه
انشغلي عنه .. انتي بعد غيري من نفسج
خلج ذكيه لاتخلين الصدمه تاثر عليج
استهدي بالله
صح ان الامر صعب بس عشان عيالج والي في بطنج طنشي واهتمي في بيتج وعيالج ولا تنسين عمرج تعدلي وضحكي ويا عيالج والعبي معاهم وخليه هو صفر على اليسار لا يضر ولا ينفع
بس لا تقصرين في حقوقه كل الي تسوينه مش عشانه عشان رب العالمين
ومرده بيرد
لان مهم كان الريال لعاب يحب الحرمه الي تكون ستره وغطاة
وكثري الاستغفار والدعاء
وما بيصيبج الا الي الله كاتبنه
والله يهديه ان شاء الله
الله يسخرلج زوجج ان شاء الله
وبطاعتك عن معصيتك ، وبفضلك عمن سواك ،
اللهّم لا تكلنا إلى أنفسنا طرفة عين ،
اللهّـــم آميـــن .
انزين بما أنج تقولين أنه كان متعلق فيج … انزين انتي عاملي بالمثل يعني طنشيييييه و حرميه من الدلع والإهتمام ، بس فنفس الوقت ما تهملين نفسج اكشخي بزياده يعني غيري نفسج كوني شخص غير إللي متعود عليه .
بقولج عن مثل وموقف أحب اذكرهم :
أول شي المثل :
إذا تبغي تجنن بريال دز عليه حرمه
وإذا تبغي تجنن بحرمه دز عليها طفل …
والموقف :
هذي وحده كاتبه قصتها ويا ريلها إللي يخونها ، لما اكتشفت السالفه شو سوت ؟؟؟
عندها رقم موبايل جديم وما تستعمله قامت واتصلت على حبيبة ريلها وقالتلها أنا حرمت فلان ، فالثانية سوت عمرها عبيطه وقالت ما أعرفه ..
المهم ردت عليها وقالت لها أنا مش متصله علشان أنازعج أو أسبج لالالالالالالالالا ، أنا متصله بس علشان أقولج كلمتين :
أنا بخليكم تسوون إللي تبونه بس انتبهي لشي إنتي لج فيه الحرام وأنا لي فيه الحلال ، أنا أم عياله ، وأهله مايعرفون وحده غيري ، والمجتمع يحترمني أنا لأني زوجته ، وإنتي خليج فالظل وسوي الحرام وعيشي عيشة الفئران واسرقي واشردي .
وسكرت الخط فويها ، تحلف بالله أن عشيقة زوجها طرشت له مسج تقوله أنا انسانه وصخه وما استاهلك وحافظ على إللي عندك ، وبجذه رد لها زوجها بدون ما تتعب نفسيتها …….
وفي شي لصالحج أنها مش متزوجه فأكيد أنها راح تخاف من التشهير …