حياته معاها مشاكل لن هي تربت في بيئه غير عن الامارات يعني مكان ثاني و جو ثاني عشان جي هي مو قادره تربي عياله مثل ماهو يبا …. وطبعا تعب منها و قرر يتزوج غيرها … والحظ طاح علي انا … المهم تزوجته وعرفت انه عنده علاقات مع بنات واااااااااااااااااااايد …وهذا شي طبيعي من انسان حياته كانت مثل ما انا ذكرت … حاول اني اغيره وابعده عن الغلط و تقريبا نجحت وفشلت بنفس الوقت …في البدايه كنت اتصور انه ناقص حنان و قلت مع الوقت بيتغير بس مافي فايده كل يوم احصل رقم وحده عنده و طبعا كل مره العذر اشكال و الوان …. غير رقمه فوق 3 مرات و لازلت احصل مسجات او ارقام بنات عنده و هذا الشي الي اقنعني انه مستحيل يتغير …. على فكره هو انسان وسيم ورياضي و ماخذنه الغرور بشكله يعني اي وحده تشوفه بنظر خلاص مايقدر الي انه يبادلها نفس الشي ….يعني السالفه صارت ادمان باختصار …. حتى اتذكر مره برمضان في العشر الاواخر يايني ساعه 3 قبل السحور بشوي بكندوره كلها مكياج و روج من برا ….. و حاول يقنعني انه من زوجته الاولى بس ماقدر واخرتها اعترف انه من وحده كانت معاه سهرانه …..!!!!!! اقدر اقولكم انه لين البارحه وانا محصله عليه مسجات المهم هذه جزء من مشاكلي …
من ناحيه ثانيه انا وحده اداوم و دوامي متنفس لي …يعني بدال ما الدوام شي متعب لا صار بالنسبه لي مكان لشرده من حياتي ,,,, طبعا انا شاله نفسي و مصاريفي و مصاريف ابني وشغالتي علي …. هو مايدفع غير السكن الي انا عايشه فيه …. و هو دايما يهددني اذا انا عاندته ولا ماطعت اساعده انه بجعدني في البيت و اذا انا يلست معناته مافي شغاله و لا في مصاريف نفس الناس ….يعني مابعيش مثل ماانا عايشه حاليا ….بس بيعطيني الاكل و الشرب على قولته وبس ….. و اظن مستحيل انسانه هالايام تعيش بهذه الطريقه ….وبنفس الوقت يقولي لو تبين تداومين لازم انتي تساعديني نبني مستقبل لعيالنا …واضطر اني اقطع نص راتبي واحطه في حساب توفير ..
من ناحيه ثانيه يباني اكون ام لعياله من زوجته الاولى ….و اانا والله ان معاملتي زينه معاهم وحتى هو يحبني اكثر عن امهم مو لني ادور رضاه لا والله بس انا انسانه اخاف ربي … ولا احب طفل يشل في قلبه علي لني في النهايه انا الي رضيت اتزوج ابوهم وانا اعرف ان هو متزوج وعنده حرمه ثانيه ….. بس عياله من النوع الي صعب احد يتحملهم ….وايد مشاغبين ….يعني متعودين على التكسير و السب …وانا بيئتي الي تربيت فيها عكس هذا كله ….واحس بتعب خلاص مااقدر اتحمل …. خصوصا ان هو نفسه مو قادر يتحمل صدعتهم ….احياننا يفرهم عندي ويطلع مو قادر عليهم ……
فكرت وايد في الطلاق …بس هو دايما يهددني اني بشل ولدي وبسوي وبسوي ….وانا احس اني اكرهه واني مجبوره اعيش معاه بس عشان مااخلي ابني الي طلعت فيه من الدنيا ….
في شي ثاني بعد …هذا الانسان مايحترم واجباتي ولا يحترم الي …يعني زيارات لاهلي بحدود و خواتي طبعا شبه ممنوعه منهم وفوق هذا لو يتني عزمه لعرس او حفل من صوب اهلي ….يتم يخترع المشاكل بس عشان يقول عقاب لج مافي حفله ….
بالنسبه لاهلي انا سبق و اتضاربت معاه و رديت لاهلي و هو ضربني وانا حامل …. ورديت ورضيت ورديت له و عاكست رغبه ابوي …..وانا الحين ندمانه لني رديت …. وهي المره الوحيده الي شكيت لاهلي فيها منه لني خلاص تعبت …..
والله اني اصلي وادعي ربي يفكني منه ولا يغيرلي حياتي معاه لني خلاص احس لو اني مو مسلمه عادي انتحر لن نفسيتي صارت زفت …..
يا ناس ياعالم في احد عنده نصيحه لي ولا حتى دعاء انا والله بوصل للجنون
شوفي يمكن ريلج عنده مرض او حاله نفسيه على حسب لي ذكرتيه انه هو وسيم وجي وتزوج وحده عكسه فمثل ما قلتي شي طبيعي انه يرمس
لكن هو مستمر في هالشي ويدل انه بعده يحس بالنقص (ما اقصد انج مقصره معاه الحين) بس اقصد النقص لي كان يحس فيه قبل ما اثر عليه للحين
ممكن تشوفين استشارية نفسيه او اسريه تعطيج حلول للمشكله
والله يفرج همج ويسخر لج ريلج
و يقول ما تعجبني تربية مرتي البدويه لعيالها ؟!
كفو ع تربيتك انت عيل يا ولد الاجواد
مثل هالريال مو بس تطلقينه ، تفلي عليه بعد و دوسي بنعالج
و ع فكرة الدنيا مب فوضى يقعد يهدد باخذ الولد.
الحضانة للام مالم تتزوج ، هذا القانون الماشي في الامارات
حسبي الله عليه و نعم الوكيل
وترضي ربج ، وربج بيرضيج
وعليج بكثرة الاستغفااار كل وقت
تقلبين زواجج في تفكيرج من زواج حب وغرام ووووووو الى زواج مصلحه فقطططط يعني انتي محتاجه له وبدومين معاه للاسباب ( مثال : محرم لج في سفرج ولا في معاملاتج )
مثل مايقلون اخونا المصرين الله يفرج كربهم يارب (ظل رجل ولاظل حيطه)
عشان جي لاتعورين قلبج ولاشي ترى مثل ماخذاج عاااااادي ع طبعه بتشوفين الثالثه داشه والربعه
الله يفرج كربج يااااارب