مرحبا خواتي الغاليات،عساكن بخير وصحه وعافيه يارب.
أنا أول مره أدخل عليكن بموضوع ودي أطرحه وحابه أشوف وجهات نظركن ورايكن فيه والموضوع مهم بدرجه كبيره للمرأة بشكل عام والزوجة بشكل خاص وأنا الصراحه ماحبيت أطرح هالموضوع إلا من بعد مامريت على أغلب المواضيع والمشاكل وطرح الخوات لهذا الباب وما بين استنكار ورفض وانتقادات ، وأغلبها تدور لصالح الطرف الأول اللي هي (الزوجة الأولى) وتظلمها واستنكارها ورفضها لوجود شريكه ثانية في حياة زوجها..
حبيباتي أبغي أنوه في البدايه وأأكد لكم شغله وحده أني ماطرحت هذا الموضوع لسبب خاص أو يمكن وحده منكن تقول بأني ماره بهالتجربة أو لي علاقة بالعكس..
أنا لله الحمد مامريت فيها ولاقصدي من ورا طرحي هذا بأني أشجع أو مؤيده لأي طرف ، لكني من خلال قراءاتي وسمعي ومعايشتي لبعض الحالات سواء من قريب أو بعيد اللي يكون فيها الزوج تزوج على زوجته ودخلت فحياته زوجة ثانية ، شفت ودرست حالة الشريكتين اللي كلنا نسمع ونشوف بأنهن في عراك وحروب دايمة لاستمالة الزوج لوحده فيهن وحتى في الأفلام والمسلسلات وأغلبها تعطي مفهوم واحد لاغير ـ الغيرة والكره وافتعال المشاكل مابينهن حسبة إجبار الزوج على طلاق وحده منهن (يا أنا ياهي)..
(الزوجة الثانية) و مادورها في حياة الزوج وشو اليديد اللي بتضيفه على حياته والسبب الرئيسي لزواجه الثاني..
الأسباب تعددت وتفرعت وتكاد تكون معدومه عند البعض من الرياييل ولكن لفكره أو خاطره أو حتى سبب تافه زرع في داخله وجوب الزوجه الثانيه فحياته أو الثالثه ولكن الثالثه هنيه بتكون تحصيل حاصل لوجود الزوجه الثانيه اللي صفت فطابور الزوجه الأولى وأصبحت مجرد رقم.
شي مهم وهام وضروري اتعرفونه يابنات حواء عن ابناء آدم وتركيبتهم الفطرية ويمكن البعض منكن يعرفنه واللي عشانه وله شرع رب العباد للرجل وحلل له بالزواج من أربع لحكمه ودرايه بخلقه سبحانه وتعالى .. بأن الريال يستطيع بكل سهوله ويسر وبدون أدنى تأنيب للضمير وهذا مب منه طبعاَ من تركيبته الفطرية اللي أنعم بها عليه ربه ،يستطيع أن يحب أكثر من وحده وتكون لها مساحه منفرده باحاسيس ومشاعرتختلف فيها عن غيرها وغيرها فنفس وقلب هالريال الواحد وكل وحده لها ميزه ،ويقولج هذي فيها صفه ماحصلتها عند الثانيه مع أنها الثانيه بعد فيها صفه مب موجوده عند هذيك وكل وحده تجنني وحاب فيها شي وماأقدر أستغنى عنهن ،ولو قالت الحرمه بأني أحب شخصين فنفس الوقت بتكون كاذبه ومخالفه لفطرتها وغير صادقه فمشاعرها ولكن لو قال الريال بأنه يحب ثنتين وإلا ثلاث ومتعلق فيهن بيكون صادق وماينلام بس في عالمنا نحن الحريم نستنكر هالشي ونرفضه وماانصدقه لنه مو مخلوق فينا ولا نقدر نستوعب (شوهالقلب اللي يقدر يشل أكثر عن حب فوقت واحد…قلب نظام غرف..هههه)
المهم حبيباتي..نرجع لموضوعنا،الزوجه الثانية
اتعرفن بقوللكن شغله..أنا شفت كمن حالة وعن قرب وسمعت بأن الزوجه الثانيه تكون هي المظلومه وحالتها تكسر الخاطر وفوق كل هذا حتى الزوج في بعض الأحيان يكون متجبر وظالمنها ومعيشنها الويل وفنفس الوقت عاطي كل اهتمامه وحبه وكامل واجبات الزوجة الأولى
طيب ليش وانته بكامل إرادتك وعقلك اخترتها تكون لك زوجة ثانية وتعرضت لانتقادات سواء من الأهل واللي حولك طبعا من غير حرب البسوس اللي خضتها مع زوجتك الأولى وأم عيالك والطاحونه اليوميه اللي كانت تفرمك وتعصرك فيها لمجرد علمها بفكرة زواجك عليها وانك بتدخل عليها بضرة..هذا لو سمعت بس.. فكيف وانت تقوللها حبيبتي أنا تزوجت عليج؟؟!؟!؟
صدقوني وانا مايبت هالكلام من عندي ولا قلت بطرح هالموضوع عبث وإلا من قلة المواضيع فهالباب لا، أنا اتكلم عن واقع وواقع نشوفه ونستنكره ونرسم جدامه علامات الاستفهام لغرابته
الزوجه الثانيه فبعض الأحيان تتنازل عن أهم حقوقها للزوجه الأولى وعن رضا..صدقوني عن رضا ورضا تام بس عسب تكسب الحياة الهادية والاستقرار فزواجها من ريال متزوج وهي عارفة شو معنى الضره أو العديله وهي داخله لحياه وجاهله ردة فعل الزوجه الأولى وتعاملها لها حتى لو كانت مستقله بسكنها عن الأولى ولكن الأعاصير لازم تولد تيارات وسحب وأحيانا أمطار وزوابع تاتي أثرها على البيت الثاني وأولها نفسية الزوج وتذمره وشكواه وانتقاداته وأحيانا الهروب من البيتين واللجوء للربع وكثرة خروجه وتأخره حتى لو المشكله المفتعله من بيت واحد اتلاقونه فج النار على البيتين واهنيه يقول عدلت لاهذي ولاذيج!!! انزين شو ذنب الثانيه وليش؟؟ انت بجذي تخلي كل وحده تقول في نفسها من خلال تصرفك :هذيك خذته عني والحين راح لها ويجذب بأنه مع ربعه وهوعندها عسب ما أتكلم وأشتكي والثانيه نفس الشي وتكبر وتزيد المشاكل والباقي والاستنتاجات الكل عارفنها والحياة تنقلب نكد في نكد وتصبح شبه مستحيله..
هذا شي الزوج مسؤول عنه بتصرفه وردة فعله لمواجهة مثل هذي الأمور وكيف يقود بلد فيه وزارتين للداخليه (وحده وياالله) هذا بالنسبة للزوج.
أما الزوجة الأولى تقول أنا الأولى وأنا أولى بوقته واهتمامه وليش وليش..والثانيه وأغلبهن واللي شفته تقول: شوبعد ؟ يادوب يمرعلي إذا محتاجه شي وإلا ياي بيأدي واجب جني عشيقته وإلا ياي وراسه وارم من صدعة البيت الثاني وبيرقد وما يبا ازعاج ولاله خاطر يجابلني وإذا قلتله بنسير مكان وإلا بنظهر يقوللي أنا روحي ياي أبا الفكه من الصدعه وسير وتعال وانته وانته وبعد هنيه مااحصل أرتاح شو هالعيشه!؟!
والله يابنات اني مريت على حاله /الزوجة الثانية يابت عيال والعيال من كثرإنهم مايشوفون ابوهم لما يدخل عليهم البيت يتراكضون عنه ويخافون منه جنه غريب والياهل يصرخ لما يمد يده عسب يشله ومتقبض في الخدامه مايبا الأبو يشله كأنه اللي جدامه جني أعوذ بالله ، وعياله من الأولى ميت عليهم ومايفارقهم وكل طلباتهم مجابه وحتى أصغرالعيال عمره كم شهر متعلق في الابو لدرجة انه يشله في السيارة روحه ويوديه واييبه ولو تشوفون عياله من الثانيه بس يدخل البيت تقولون عصافير شافو قطو..
مع ان الزوجة الثانية هي اللي شاله البيت والعيال وهادية وطيبه وأخلاق وملتزمه والصراحه وايد من حقوقها مهضومه وراضيه وقانعه لدرجة إنها تشل العيال وتسير اتزور الأولى وتهل عليهم من هالهدايا وعلى اتصال فيها لكن الثانيه الله يهديها مع إن الظاهر يقول ماشاء الله شو هالتفاهم ، لكن الحرب البارده وما تسوي وتأثيرها اللي واضح وضوح الشمس للي يتقرب شوي ويفتح عينه..اللهم أسألك العفو والعافية..
وفي حالات الزوجة الثانية إنها من كثر تقربها وسعيها لكسب رضى الزوجه الأولى (شريكتها) تحل محل الاخت والصديقه لضرتها، لدرجة انه في صديقة لي تقول من كثر ما احنا متفاهمات ونحب بعض وكل وحده تخاف على الثانية وتحرص على راحتها لما تحمل وحده فينا وهن على فكرة فبيت واحد ، تهتم فيها وتراعيها وتشلها جنها أختها وفغرفة الولاده توقف على راسها وشريكتها هي اللي تطلبها بالاسم وخواتها واقفات برع..واللي يشوفهن فعرس وإلا مناسبة ومايعرفهن يتحراهن صديقات أو خوات، وبس يدرون العيون تتبقق والاستغراب ينرسم على الويه من اللي يشوفونه..والقاهن هن الثنتين يقرن المعوذات ويضحكن على الموقف..
والمشكله الوحيده اللي يعانن ويشتكن منها تصرفات بعلهن وردة فعله على هالتفاهم والانسجام الحاصل، أنه يتعمد يثير المشاكل ويسعى لتحريض كل وحده على الثانيه عسب يتضاربن ويختلفن ويتزاعلن من بعض ليش ..لأنه بكل بساطه مايباهن يدورن ويتآمرن عليه ويكونن قلب واحد فويهه ( فرق تسد) على نظريته وهذي قناعته (الرياييل وما أدراكم ما الرياييل) ..
والله ماعرفنا لهم!!!!
خواتي هالموضوع متشعب والنقاش فيه يطول لكن اللي حبيت أوضحه من خلال طرحي له بأنه مب كل اللي نشوفه ونسمعه صدق وخاصة هالأفلام والمسلسلات واللي بعضها وقليلها والله حق تعطي أمثله لزوجات(ضراير) قمه في التفاهم والمحبة ولكن نار الغيرة لابد منها وهي بهارات أساسية لكل شراكة حتى لو ماكانت شراكة زواج وخارج نطاق الأزواج وتكون بين الاصدقاء والأخوان بعد..
ولكن بالعقل والحكمه نقدر نوصل لبر الأمان والراحة وضمان الاستقرار..والطيبة والأخلاق الكريمة هم مفاتيح السعادة في الحياة ..
أتمنى إني ماأثرت بموضوعي هذا غير كل إيجابي ونافع ، وأتمنى مشاركتكن معاي واللي عندها أمثله أومرت بتجربة أو سمعتها أو شافتها تكون مشكورة بطرحها لدعم هالموضوع وفتح مجال المناقشة لتعم الفائدة..
والسموحة منكن خواتي…
^_^
ما زلت بدون ترتيب هههههه
ومشكوره الغلا عالموضوع
أكثر من 20سنه ما شااء الله عليهن0
المهم ان الزوج عاادل امبينهن وهن عاقلااات ومطنشااات القيل والقااال 0
والزوجة الثاانيه لااازم تتحمل تبعاات قرارهااا بالزواج من متزوج مثل زوجهااااا
الي يتحمل مسؤليه العدل و محااسبه رب العالمين له ^_*
وبالاخير الزواج قسمة ونصيب والحلااااال مااا يزعل حد حبوبة
تسلمين قلبي عالموضوع
بس صــدق سبحـان الله زمـان كان الريــأل يعدد والأمور طيبـة
أحيـــن ياويلــه بس الشجــاع الي يسويهــأ ^^
و انا جالس زي ما انا لازم اسوي مثلهم ضحكت و قلت له كل واحد عبرة لغيره اللى خسر فلوسه و اللى خسر اولادة و اللى خسر نفسه روح اتجوز و لما ترجع زاحف هفتح لك الباب ما حدش هيعبرك غيري و تميت اضحك
بس شوفوا المسلسلات كيف تفتح راس الرياييل !!!!