آخر محــاولاتي إلى سبيل الرشاقة تابعوا يومياتي هنـــا

باختصار أنا مليت من هالحالة خلاص لازم أنزل من وزني

و اتحمست وايد لما قريت مواضيع بنات فعلا قدروا ينزلون من وزنهم

بإرادتهم القوية و عزيمتهم الأكيدة..

المهم قصة حياتي مع السمنة طويلة و إن شاء الله إن كان عندي وقت في

الأسابيع القادمة راح اكتبها لكم ..

المهم ..

أعرفكم بنفسي ..

أنا وحدة ياما و ياما سهرت الليالي اصيح بس عسب اضعف

مادري لو فيه مرة وحدة منكن صاحت لأنها متينة ..

لكن بالنسبة لي أنا صحت وايد و السبب إني متينة ..

قعدت أسأل نفسي .. ليش أنا متينة ؟ و الجواب كان كالتالي:

1. الوراثـــــــــــــــــــــــــــــة (وهي لاعبة دور كبير فيني).
2. عدم وجود نظام غذائي.
3. قلة ممارسة الرياضة (مع إني كثيرة الحركة الحمدلله لكن جسمي يباله أسوي برنامج تمرين).

ليش أنا جربت ريجيمات وايد و ما ضعفت؟

1. كثرة اتباع الرجيمات (لأني بديت ريجيمات من الصغر يمكن من صف خامس و انا اسوي ريجيمات للحين، و حسب كلام الدكتورة إن كثرة اتباع الريجيمات تكسب الجسم مناعة ضد نزول الوزن).

2. لأن لما اسوي ريجيم اعطي عمري 3 أيام فرررري في الاسبوع خخخخخخخخ.

ليش أبا أضعف؟

جهزوا عمركم للقراءة لأن وايد أسباب ورا هالهدف الرشيق هذا:

1. الصحة العامة أولا.

2. التخلص من آلام أسفل الظهر التي سببتها لي السمنة.

3. الحمدلله أنا من ويهي أبين إني بعدني صغيرة.. لكن الجسم معطني عمر أكبر.

4. نظرات المجتمع القاسية للبنت السمينة.

5. لفت أنظار ناس من أهلي ^^ خل يشوفوني مليت و انا ألمح عاد خخخخخ.

6.أبا حركتي تكون خفيفة و سريعة.

7. التخلص من سالفة اللهث و النفخ كلما ركبت دري أو نزلت من دري أو مارست أي جهد بدني.

8. ما أبي أحس إني دون صديقاتي .. كلهم ضعاف و وزنهم معقول و انا اللي وزني زايد امبينهم.

9. أبا أكون لو مرة وحدة حققت إنجاز في حياتي يكون نقطة تحول لي و لغيري بعد ممكن.

10. يمكن تنصدمون من هالسبب بس بصراحة يا ناس خاطري خاااااااااااااطري خااااااااطري ألبس:

جد و الله أمنيتي لو مرة وحدة اقدر ألبس كعب و اطول فيه بالساعات و لا احس بألم بريلي او ظهري

كل النعل اللي عندي لازم تكون مفتوحة من جدام لأن ريلي ماخذه حيز من الفراغ
و بعد خاطري ألبس …

تخيلوا وحدة مثلي من الصعب إنها تحصل قياساتها سواء النعل عزكم الله أو البديات و التنانير

أكــــــــــــــــــــون أو لا أكــــــــــــــــــون …

يا أنا يا هالدهـــــــــــــــــون .. !!

تصدقون صج ان الدهون ما عندها كرامة .. ما نباها و لاصقة فينا ..صج ناس ما تحس خخخخخ

المهم ..

الحين وضحت لكم أسبابي سمنتي و النتائج اللي أبا أحققها .. باقي الحين الله يسلمكم أهدافي

طبعا بما إني بنوته استحي اكتب لكم وزني كم .. لكن راح اكتب لكم اهدافي:

الهدف الأول = ناقص 10 كيلو من الوزن.
الهدف الثاني = ناقص 5 كيلو من الوزن.
الهدف الثالث= ناقص 5 كيلو من الوزن.
الهدف الرابع= ناقص 5 كيلو من الوزن.

يعني باختصار أبا أنقص من إجمالي وزني الحالي … أبا أنقص 25 كيلو ع الأقل كحد أدنى..

و إن شاء الله بعد ما أحقق الـ 25 كيلو .. راح تكون لي أهداف ثانية و ثانية ..

يا بنات اليوم بدايتي .. و المطلوب منكم ..

1. شجعوني.
2. تابعوا يومياتي.
3. ادعوا لي بالتوفيق إن شاء الله.
4. ردوا ع موضوعي.

نسيت أقول لكم إني يمكن يمكن يمكن راح أستخدم شاي بايوجي عسب يساعدني في النظام الغذائي

بدايتي راح تكون نظام من اليوم إلى يوم العيد إن شاء الله

اليوم الأربعاء حتى يوم الأثنين (وقفة عرفة) إن شاء الله

النظام سميته نظام (( نظام أي كلام)) لأن بدايته كانت من نص الأسبوع و راح يتخلله يوم العيد راح يكون فري إن شاء الله فقط يوم العيد .. و ثاني يوم عيد بإذن الله راح اخبركم شو راح أبدا بأي ريجيم…

و الحمدلله رب العالمين..

تابعوني في هذه الصفحات … عن يوميـــــــــــــاتي كل يوم راح أكتب شو يصير معاي…