استقبال الضيوف وقت النفاس

مرحبا خواتي

عندي سؤال وحابة نتشارك تجاربنا وعاداتنا ونظامنا في استقبال الضيوف وقت النفاس بعد الولادة

مثلا هل يدخلون الضيوف عليج في غرفة نومج بيت أهلج او بيت أهل ريلج؟؟

أو إنتي تروحين لهم في مجلس الضيوف وتسلمين عليهم؟؟

هل تجهزون سرير للنفاس في مجلس الضيوف أو سريرها يكون في غرفة بعيدة عن مجلس الضيوف؟؟

بالعادة شو تكونين لابسة؟؟

هل تحطين مكياج خفيف مثل كريم أساس وكحل وجلوس؟؟

شو تكون الفوالة؟؟

هل تقدمون الأكل لعند الضيوف أو نظام بوفية؟؟

وبالنسبة للتوزيعات متى توزعونها؟؟ أو ما يوصلون ضيوفكم أو لما يودعونكم وهم طالعين؟؟

تصدقون حضرت زيارات وايدة للنفاس بس ما انتبهت للتفاصيل وأحس عمري مختصبة أللحين هههههههه

عطوني أفكاركم واقتراحاتكم
وإللي تعاملت مع محلات تسوي فطاير ومحاشي وكيك وبوصل للبيت يا ريت تخبرني

اختي انا كنت في نفاسي اروح انا اسلم ع الضيوف واقعد معهم ما حطيت سرير بغرفة الضيوف
وكنت البس جلابية نفاس بس لما البيبي يصير بده يرضع بتضطر اقوم من عند الضيوف لغرفة ثانية
وميكب خفيف ممكن تحطي
الفوالة كانت حلويات ومعجنات ومشروب قرفة احنا بنسويه للوحدة اللي تربي ولضيوفها ونقدم الضيافه عادي للضيوف مش بوفيه
والتوزيعات وهم مروحين نعطيهم اياها
لاتختبصي ولا شي ان شالله بتقومي بالسلامة انتي والبيبي

انا من رايي واللي هوه المفروض يصير انه الاهل طبعا يستقبلون الضيوف في الميلس و تروح لهم الحرمه تقعد معاهم شوي ومش تطلع البيبي للكل ! يعني بعد في ناس ماتحاسب تبوسه مثلا و هذا صغير ومناعته ضعيفه و هيه حاطه ميكب و روج يطبع حتى على خده .. او تحطه بسرير يشوفونه و خلاص ..
و بالنسبه للاكل يعني كل يوم وحده بتي مش معقوله كل يوم لمده شهر تسوين كل يوم .. يعني ممكن تحطين شاي و قهوه و سله شوكلت طبعا بتوصل هدايا سلال شوكلت وايد فماله داعي الواحد يشتري ههه .. و بس و الحرمه اللي تربي تراها تعبانه و تبغي ترتاح .. و اللي يزور مايطول و ينظر الاكل و جذيه و يلسه و سوالف ! اشوف ماله داعي ( رحم الله من زار و خفف )
و لبسي شي خفيف و ميكب خفيف جداا

على حسب انتي تقصدين العزيمه ولا استقبال العادي لضيوف

لو كنتي في بداية نفاس انصحج تحطين سرير في غرفة استقبال الضيوف لانه بتكونين تعبانه وتبين تنسدحين وبعدين في بعض الضيوف يطولون

فما بتقدرين تمين قاعده

بس لو كنتي بكر وتبين تسوين عزيمه يكون احسن لو عندج حجره ثانيه قريبه من حجرة الضيوف ترومين تقعدين فيها والي يبا يسلم عليج اييج هناك

وبالنسبه للفواله في ناس تسوي بوفيه او ذبايح على حسب امكانياتكم طبعا غير توزيعات

وثاني شي انصحج بالعزيمه بعد اسبوع من نفاس لو كنتي بكر عسب تفتكين من ازعاج الناس وترومين ترتاحين باقي الايام

وفواله تكون فطاير وحبه حمرا وشاي وقهوه وجاي حليب وبتي فور

تلبسين جلابيات الخاصه بالنفاس

هل يدخلون الضيوف عليج في غرفة نومج بيت أهلج او بيت أهل ريلج؟؟

الاهل المقربين ممكن يدشون حجرة الضيوف فبيت الاهل بس فبيتج او بيت اهل ريلج لا مادري احس ماحب حد يدخل جدرة نومي الا امي وخواتي وللضرورة بعد ..

أو إنتي تروحين لهم في مجلس الضيوف وتسلمين عليهم؟؟
باجي الضيوف يستقبلونهم الاهل فالميلس وانتي تسلمين شوي وتردين هذا فالنفاس ,, عقب عادي استقبليهم فالميلس روحج مب مشكله ..

هل تجهزون سرير للنفاس في مجلس الضيوف أو سريرها يكون في غرفة بعيدة عن مجلس الضيوف؟؟
بعد على حسب ,, فالنفاس لا سرير البيبي يكون فحجرته احسن جان بتيبينه شوي يشوفونه وتردينه ,, وفبيتج على حسب اذا مثلا بيتج دورين وماعندج غرفه تحت ومضطرة تنزلين البيبي وياج لازم تجهزيله سرير او سله اخف ..

بالعادة شو تكونين لابسة؟؟
جلاليب الدانتيل

هل تحطين مكياج خفيف مثل كريم أساس وكحل وجلوس؟؟
انا لاحظت اغلب الحريم فالنفاس ما يحطن شي حتى الي متعودات قبل يحطن وايد ,, واذا بغيتي جحال خفيييف بس

شو تكون الفوالة؟؟
اذا حد من قبل قالج بيي وبس نفر او نفرين تسوين خفايف سمبوسه فطاير جيه هالسوالف ,, واذا مثلا بيونج جماعه مرة وحده ممكن تتعبلين اكثر وممكن بعد تسوين نفس الشي عادي .. وللي بيي بدون ما يخبر يعني الاشيا العاديه تكون محطوطه فالميلس ,, جاهي وقهوة مكسرات بتي فور وهالسوالف ..

هل تقدمون الأكل لعند الضيوف أو نظام بوفية؟؟
هي نقدملهم بس مب المنفس روحها لازم حد وياها ..

وبالنسبة للتوزيعات متى توزعونها؟؟ أو ما يوصلون ضيوفكم أو لما يودعونكم وهم طالعين؟؟
وهم طالعين عشان ما ينسونهم

ان شاء الله اكون فدتج

مفيد أب

والله حبيبتي هذه سالفه احط سرير في غرفه الضيوف احسها فشله! انا حامل وبكريه ومستحيييل احط سرير واتسدح جدام الناس.. يعني الناس اللي بيزوروني كم بيقعدون؟ وتراهم يعرفون اني مربيه فما ببيطولون.. واللي بيطول براحته بس انا من بتعب بنش عنهم..

بس احط سرير ومن اتعب اتسدح هذه مب حلوه.. تراني بكون قاعده ع غنفه ومريحه ظهري وشو من التعب اللي بتعبه وانا يالسه مع الضيوف؟

بالنسبه للبيبي فديته اكيد بييبه يشوفونه الناس اذا كان واعي.. وبخليه مال دقايق وبعدين برده الحجره عند خواتي وامي يرتاح.. ما بخليه قاعد معايه..

بالنسبه للبس انا بصراحه احس جلابيات الدانتيل مب لاستقبال الغرب.. يعني ربيعاتي وجيه.. فقط اذا عمتي وحمياتي زاروني.. حتى لو عمات ريلي وبناتهم زاروني ما بلبس جلابيه دانتيل.. احس هذه للاهل المقربي فقط.. بلبس جلابيه خفيف او فستان خفيف ينفع لقعده البيت..

بالنسبه للاكل حبيبتي يعتمد ع عدد الضيوف.. مثلا ربيعاتي يتفقون كلهم ويزوروني في يوم واحد ويكونون ما شالله 8 او9.. فانا بسوي البوفيه .. يعني بيب طاوله و بحط الاكل عليه بشكل بوفيه..

بس لو وحده او 2 زاروني لا..بطلب فطاير و بحط فواكه وشوكلت وشاي وقهوه وحبه حمراء..

بالنسبه للتوزيعات بعطيهم وهم مروحين..