البسمة قبل الكلمة

المشاكل الإجتماعية .. كجملة .. دايما ً كانت تلفت انتباهي .. من وأنا صغيرة .. أيام المراهقة وصاعد ..
بيني وبين نفسي أحب أعطي حلول .. وأقول لو فلان ولا فلانه تصرفت بهالطريقة جان كانت المشكلة اهون ..
أو انهم كانوا بيتفادون هالنتيجه اللي توصلوا لها .. والخ ..
وهنيه فمنتدانا الراقي .. أحب أمر على نفس القسم .. الحياة الإجتماعية .. اللي يضم المشاكل اللي ممكن نمر بها ..
ونتعض من بعضها .. ونلاقي حلول للبعض الآخر

خواتي الغاليات ..
بعض الخوات يحطن مشاكلهن من باب ايجاد الحلول .. وطلب العون ..من كلمة مشجعه .. نصيحه .. تأييد أو معارضه..
أحيانا تتواجد بعض الردود التي تكون قاسية .. على اللي عارضه مشكلتها .. وهالشي يكون طبيعي في " بعض المشاكل المطروحه "
ولكن في فرق من انا نكون قاسين في ردودنا على خواتنا اللي مشكلتهم تستعدي القسوة من طرف الناصح إذا ما كان الغلط عظيم
وهي مصرة على انه شي هين أو لمسنا من خلال كلامها اللامبالاة أو عدم الوعي في أحيان أخرى ..
ومن انا نستهزئ ونعلق على المشكلة بطريقة تحسس الإخت " انها تستاهل اللي ياها .. وتندم ليش طرحت مشكلتها" ..
وهي من الاساس تستدعي صبر ولباقه أكثر في الرد

في مواضيع فعلا ً تستدعي القسوة .. بس القسوة اللي تعلم وتعطي درس .. ومب اللي المقصد منها رمسة وتنعق ..
وهنيه أقصد المواضيع أو المشاكل اللي تنطرح بهدف ايجاد الحلول .. أو المساعده .. ومب اللي تنطرح وتكون مبهمه وما لها هدف معين ..

الكتابه باسم مستعار .. ما تعني " خلط ، بلط " .. أحيانا ً نعجز عن الكتابة بطريقة تخلينا نوصل المشكلة للغير ..
وما أقصد بهالشي " خلط ، بلط " .. القصد من اللي يكتبون مشاكل وهمية ..
بهدف اثراء القسم .. وعمل زوبعه .. من لا شي

والكتابة باسم مستعار .. ما تعني أغلط على فلانه وعلانه .. واستهزئ بموضوع هذا وذاك .. أو أجذب هذي وذيج
ومن خلال بعض المشاكل المطروحه لمست جانب الاستهزاء .. والتقليل من احترام الشخص ..
بالرغم من قول" مع احترامي" بس هالشي يكون واضح ..

معظم الخوات اللي يعرضون مشاكلهم .. يكونون واعين وعارفين بالغلط المرتكب .. ويمكن أحيانا كثيرة يكون الحل عندهم ..
بس سبحان الله .. الانسان في بعض الاحيان يكون محتاج من انه " يرمس ويفضفض " .. صح ان الحل موجود عنده ..
بس ناقصنه التشجيع .. ناقصنه اللي ممكن يدفعه للأمام ويبدا الخطوة ..
وناقصنه اللي ممكن يقول له هيه اللي سويته صح .. كمل المشوار..
بس الاستهزاء هو اللي يثبط هالدفعه القوية عند البعض.. ويقوي البعض الآخر ..
ويتخذ منها عزيمة واصرار لتخطي هالمشكلة .. أيا كان نوعها ..

نصيحه خواتي العزيزات ..
الردود اللي نلمس فيها البسمة قبل الكلمة في أحيان كثيرة تساعد في حل المشكلة بطريقة سهلة وسلسة ..
وتتقبلها المتلقي برحابة صدر .. وتعمل بها .. ونكون بجيه توصلنا للهدف