إخت ربيعتي مالجة من 8 شهور تقريبا وهي وريلها يشتغلون في نفس المكان في بوظبي، وخلال فترة الملجة صار كذا موقف بينها وبين ريلها وكانت تتنرفز بسرعة وهو ما يحب هالشي أبد..
قبل شهر تقريبا صار لها موقف في الشغل وخافت على ريلها يتأذى بسببها لأن كل الموقف عطاها إحساس إنه ريلها ممكن ينضر بسبتها وفي نفس اليوم أصلا كان في بينها وبين ريلها سوء تفاهم، ويت وطلبت من ريلها الطلاق وقالتهل أنا ماراح أقدر أسعدك، وما قالته السبب الحقيقي للطلاق..
ثاني يوم عرفت من شخص إنها ما راح تتسبب لريلها بأي مشكلة وهي ما يخصها فالموضوع.. وردت كلمت ريلها وقالتله الحقيقة والسبب الرئيسي اللي خلاها تطلب الطلاق، لكنه ما سامحها وقالها إنتي بسرعة تتنرفزين وتعصبين وتمت تترجاه وتصيح وشرحتله ظروفها وتوسلتله وقالتله إنها بتخفف من عصبيتها ووعدته وحلفت، ولكنه قالها إنتي لو كنتي بتتغيرين، كنتي غيريتي من نفسج من أول لحظة قلتلج فيها خففي من عصبيتج، وإبتعد عنها تقريبا أسبوعين وفي الأسبوع الثاني سار المحكمة وفتح ملف الطلاق وعطوه موعد عقبها بأسبوع وأهلها إتصلوله وساروله لكنه ما رد على حد فيهم..
وزجروا البنية التوجيه الأسري وسارت وقالتلهم يا جماعة الخير ما أنكر إني أتنرفز بسرعة بس مب معنى هالشي إنه يطلقني، وقالتلهم أنا أحب ريلي ومابغي أتطلق وتمت تصيح فالتوجيه الأسري وقالتلهم والله بتغير وبسوي كل شي يرضيه .. عقب ما مشت البنية إتصل فيه الموجه الأسري ومدحله في البنية وتم يرمسه بالدين..
البنية كانت ماره البارحة على زميلاتها تسلم عليهم وعقب مرت على مكتب ريلها وسلمت عليه رغم إنها عمرها ماسارتله المكتب، ولكنه ولهت عليه وسارتله، تعرفون إتصل شو قالها؟
ماكان المفروض تييني المكتب وأنا في هالوضع النفسي، إنتي تصرفاتج تصرفات ياهال وهالشي يثبتلي إنج عمرج ما بتتغيرين، وتم يقولها بتم أطباعج مثل ماهي.. عموما لا تحاتين أنا ما بخليج معلقه.. آخر شي قالتله اللي يريحك ياإبن الناس سويه دامك مب مستعد من داخلك تعطيني فرصة عشان أثبتلك إني بتغير..
يا بنات البنية ما تبغي تتطلق والموجه قالها إتركي الموضوع علي، ولكن اللي سمعته من ريلها أمس خلاها تفقد الأمل في إنه يستمر وياها.. أمس من عقب المكالمة طرشتله مسجات وايد وقالتله حرام تظلمنا وتطلقني، نحن خذينا بعض عن حب وغيره وغيره وغيره لكنه مارد..
إنصحوها شو تسوي؟؟ البنية منهارة ومب متخيلة إنه ممكن يغيب عن حياتها..
يا بنات والله البنية وايد طيبة وبنت ناس ورضت بظروفه وساعدته ووقفت وياه وما ضغطت عليه في أي شي، لكن الله يهديه ما يبغي يعطيها فرصة
وبعدين موقفه غريب شوى احسن لها تتاكد من معزتها عنده قبل الزواج والى مايشترينا مانشترى
وان شاءالله ربي ما يقصر معها وما يصير طلاق ..
خليها اطقع له وتسوي عمرها ولا كأنه هامنها
صدقينيه عن مليوووووووووووون تجربه بيربع وراها وبيحس على دمه
وقوليلها الله يختار الشي الافضل لعباده ولو تحس انها بتموت من دونه اللي بيصير هو لمصلحتها
الله يعينها
وقوليلها لا تصيح لانه استغفر الله ما ادري شو اقول
خلها تصبر
وخبرينا عن اي شي يديد
وبعد المفروض ما تسيرله المكتب لو ولهت عليه المفروض ما تسير
بس انصحيها انها تكثر من الاستغفار وتتصدق
وان شاء الله خير
والله يسر امورها ان شاء الله