طبعا من جولاتي في النت ومن افكار المبدعات ما شاء الله ..
حبيت اخذ فكرة البوفيه البحري وأزيد عليه من افكاري … في عزيمة ريلي كان عازم ربعه … وما شاء الله كل مرة احب اطلع له افكار وحركات تبيض ويهه …والحمد لله للمرة الثالثة اسوي هالبوفيه بس دائما تكون الاطباق مختلفة شوي وترتيب الطاولة مختلف كنوع من التغيير وكسر الروتين .. والحين بحط لكم اخر بوفيه بحري سويته ..
البوفيه حطيته في غرفة الطعام ..
اولا ترتيب طاولة الضيوف …
الصحون عبارة عن اشكال بحرية … والفوط و المحارم تاخذ اللون البحري …
من جهة ثانية للطاولة .. وعليها المشروبات والمقبلات وطبعا الدائرة اللي في النص تدور ويكون سهل ع الضيوف يختارون اللي يبغونه ..
صورة لطاولة اضافية احطها بس لما يكون عدد الضيوف اكثر عن 10 اشخاص …
صورة جماعية للطاولتين مع الشموع …خخخخخ
ثانيا : قسم السلطات والشوربة …
شوربة البروكلي .. سلطة الملفوف .. سلطة الارض شوكي .. قبل كنت اسوي شوربة السي فود وسلطات فيها ربيان بس هالمرة غيرت عسب ما يملون منها ..
ثالثا : الاطباق الرئيسية …
طبعا كل مرة اغير في بعض الاطباق … لانه بعض الضيوف ما يحبون الاكل البحري فاسوي طبقين من الدياي ونشتري كباب من برا … بس الاغلب بحري
وما عندي طبق معين او معتمد اسويه غير الربيان بالجبن… والباقي افتح كتاب الطبخ واشوف شو الاكلات البحرية التي بتكون مميزة ..
اخر طبق في الصورة من تحت هو الربيان بالجبن …
والسموحة ما صورت الاطباق من الداخل .. ما الحق اصور واحد واحد لانه ريلي ع راسي ويقول بسرعة الضيوف بيدخلوووون لاني احط الاكل قبل لا يدخلون بدقايق عسب ما يبرد الاكل …
رابعا : الحلويات
طبعا اسوي عدة انواع من الحلويات بالاضافة الى الكيكة البحرية.. والحلويات احطها في ميلس الرياييل اول ما يدخلون يتعشون من البوفيه…
طريقة الربيان بالجبن :
المقادير :
كيلو ربيان طازج متوسط منظف ( يترك الذيل حسب الرغبة )
بصل وطماط يقطع حلقات ( الكمية انت اتحددينها ) انا احط تقريبا 3 بصلات و3 طماط
2 ملعقة طعام خل
رشة فلفل اسود
رشة بزار و كركم
عصير ليمون مقدار فنجان الشاي
4 ملاعق طعام مايونيز
زيت زيتون ( نصف كأس صغير ) انا احط اقل
3 ملاعق طعام معجون ( صلصة طماط )
ملح
الطريقة :
في البايركس احط الربيان وكل المقادير مع بعض واخلطه واغطيه بالالومنيوم ثم اخليه ساعتين او اكثر ( انا اسويه قبلها بيوم ) وعقب ادخله الفرن من تحت تقريبا 40 دقيقة ، تقدين تاخذين حبة ربيان واتذوقينها تتاكدين اذا نضجت او لا ، ثم اسكر الفرن تحت وافتح فوق و اشيل الالومنيوم واخليه يحمر من فوق وبعدين ارجع اغطيه عدل بالالومنيوم .
وقت التقديم: احطه في بايركس التقديم واحط عليه جبن سلايس ( اي نوع ) تقريبا 3 حبات واسكر الغطاء فالجبن بيسيح وبيكون شكله حلو وايد .
طريقة الكيكة :
الكيكة : اي كيكة اتحبونها سواء جاهزة او كيكة اللي تكون في كارتون مثل العلالي او طبقات البسكوت وغيرها …….
وطريقة الوجه كالتالي :
[SIZE=4][COLOR=#000000]6 حبات كيري وعلبة نستله المكثف يخلط بالخلاط … واخذ كمية من الخليط واحط عليه نقط من الصبغة الزرقاء يمثل البحر واصبه في جهة ….. وباقي الخليط احطه في الجهة الثانية ويمثل اليابس وافتت شوية بسكوت عليه ……. والخليط بيكون ثقيل نوعا ما يعني ما يختلطون ببعض ………. وللتزيين تاخذين اي حلاوة تكون من اشكال البحر واتحطينها .. وبالعافية
ان شاء الله عجبتكم الافكار … وانتظر رايكم …
وافكــــــــااار رووعه
ربي يحفظج
لو انا مكان ريلج كل يوم بعزم عسب يخق جداام ربعه
((الصراحه ريـــــــــــلج لازم يعطيج هديه
ويسوي لج مفأجاة مثل ماتفاجأينه وتبيضين ويهه جدام ربعه
المرة اليايه حبيبتي اذا تقدرين صوري الاطباق من دااخل
والسمووحه
ماشااء الله ربي يحفظج
اكييد عييل ربع ريلج استانسوو مدلعتنهم تعرفيين الرياييل يستانسون من حد يهتم فيهم جي عسب
دوووم عزاييمهم تكون ذباايح وجي
تسلم ايدج الغلاا ويعطيج العافيه وماشااء الله سفره عامرة
ربي يخلييج ريلج ويسعدج ولا يضرج ويبعد عنج عيون الحسااد
اممم بقلدج خخخخخخ ممكن حبييت السوويت وايد بس انا شفتة ف منتدياات بكذاا شكل وانتي مالج حلو وبسيط
الله يحفظج يالغلااا لو بتم امدحج من اليووم اليين بااجر ماايوفييج حقج غلايه
تقبل ياعجاااااابي
اختج
مرحبااني
يعطيج العافية