حبيت انقللكم عن مشواري لاحد محلات بيع منتجات التجميل بدون ذكر اسماء ……. انا رايحه المحل وداخل وفي نيتي شي محدد اشتريه واطلع وكنت اصلا مستعيله كنت رايحه اشتري كريم مرطب للبشره ……
دخلت المحل وانا عارفه الكريم اللي بشتري يعني مجرد ادخل واخذه وخلاص دخلت ومسكتني البنت توصفلي المنتجات وكل كريم شو يسوي تتحراني طالعه من الكهف ماعرف شي عن منتجات البشره …. وانا ابا اروح ومبين علي ويهي اني مش مهتمه باللي يالسه اتقوله وطبعا هي بالغصب الا تباني اشتري ويالستي شوفي هذا مقشر يخلي بشرتج ناعمه وهذا تحطينه مادري متى وهالكريم يخوز الحبوب وفوق كل هذا تكلمني وهي لايعه جبدها مادري متضاربه ويا منو يعني شويه وكانت بتضربني بس علشان اشتري وانا كل شوي اروح بعيد عنها اشوف اشياء ثانيه وهي مصره والله حسيتها كأنها تقولي يا بتشتري يا بتنضربين الحين …
اوكي نحن ندري ان هذا اسلوب تسويق علشان اللي تبيع اكثر يعطونها عموله بس عاد مب جذي مب بالغصب يمسكون الزبونه جنها يالسه تهددها لو ما اشتريتي ترا بنسوي فيج جي …. والمشكله قاعده تعيد وتزيد وتحاول وياي بشتى الطرق ويلست اطلعي مية عيب في بشرتي بس علشان اشتري وانا الحمدلله بشرتي مافيها شي صحيح تصادفني وايد هالمواقف في المحلات بس ما يتكلمون بهالطريقه جنه تهديد واجباااار اني اشتري …….
اخر شي خليتها تخلص كلامها ولا اشتريت اي شي من اللي عرضتلي اياه وخذت المرطب بس وقلتلها يلا شكرا …… يا بنات لا تكونن عبيطات يوم تروحن هالمحلات او الصالونات بعد ترا والله كله خريط وهدفهن بس انج تدفعين وهن اللي ياخذن عموله …. نفس محلات العطور اول ما تدخلين يهجمن عليج البنات اللي هناك وكل وحده ماسكه عطر وتشممج اياه علشان تشترينه كل هذا بس علشان يحصلن عمولة يعني اللي تبيع اكثر تحصل عموله…. بس صراحه الموقف في هالمحل قهرني يعني وصلن لدرجه انهن يكلمنج باسلوب زفت بس علشان تشترين …….
طبعا يبونج تاخذين بالغصب رضيت و لا ما رضيتي ..عاد الشاطره اللي ما تتاثر في كلامهم..
بس الصراحه يكرهونج فالمحل ويخلونج بس تبين تطلعين عنهم بدون ما تشترين حتى لو فخاطرج غرض معين