الجزء الثاني : اتقدملي واحد للزواج بس متردده عشان سبب سخيف !

خواتي انا قبل فترة كتبت موضوع كنت محتارة فيه و هذا رابط الجزء الاول :

https://forum.uaewomen.net/showthread.php?t=659129

المهم بخبركن شو آخر التطورات

الصراحة انا وايد مرتاحة هالمرة و مستانسة مادري ليش احس هالخطوبة فيها خيره لي و غير عن كل مره ! و صح كنت متردده في البداية بس الحين ابد مب على بالي سالفة الأصل والفصل لأن أهم شي عندي أخلاق الريال و دينه و صلاته و شهادته

وكل هالمواصفات متوافره في هالريال و فرق السن مناسب بينا و أهله ناس مقتدرين ما شاء الله و راقين و متحضرين يعني عاداتهم مب مختلفة كلياً عنا و حتى رمستهم و هو جامعي و وظيفته مرموقة

و شرات ما قلتلكن اهلي ناس متحضرين و مب متعصبين ولا يفرقون بين اصول الناس ..

و خلال هالفترة ما استوى شي رسمي بس كانت اتصالات بين أمي و أم الريال و هي وحليلها كل يوم تتصل و امي ما تعطيها كلمة و آخر مره اتحدد الموعد عشان يزورونا الحريم و يشوفوني و كلنا مستانسين انا وخواتي و نتجهز حق الزيارة بس اليوم انصدمت ان ابويه مب مرتاح حق هالخطوبة و يقول حق امايه مادري مب مرتاح حق هالنسب و بنصبر يمكن يتقدملها حد اخيرلها من هالجماعة !!!

الصراحة ما عيبني تفكير ابويه لانه من يوم كنا صغار ما يفرق بين أصول الناس و غرس فينا الطيبة و التواضع و حب الخير للناس كلهم بدون تفرقه ..

المهم امي فديتها قالتله انت ما تدري يمكن هالريال يحشمها و يحترمها و يسعدها اكثر عن عيال الجبايل و يمكن تاخذ ولد عرب بس ما ترتاح وياه و أهم شي الأخلاق والدين و في هالزمن ماشي فرق بين عربي وعيمي لان الناس اتعلمت و اطورت وذابت هالفروقات العنصرية والحين الناس كلهم متعايشين مع بعض و مناسبين بعض و بالعكس عيال العيم كلهم متعلمين و ماسكين مناصب . و بعدين نحن ما عطيناهم الموافقة .. اول شي بنشوفهم في البداية وبنسئل عنهم وبعدين بنردلهم خبر وكله من الله خير بس انت لا تقطع نصيب البنية من الحين

الصراحة انا وايد اتضايجت من عقب ما سمعت كلام ابويه و كنت مستانسة بس اختربت فرحتي و احس اني برفض خلاص و بتتفركش السالفة كلها

فخاطريه ارمس وياهم و اتناقش و اقول رايي بس للأسف كل شي عيـــــب و منقود و الوحده ما تقدر ترمس غير تقول موافقة ولا مب موافقة !

ابويه انسان متعلم و جامعي و ملتزم و دوم يقول لا فرق بين عربي ولا عجمي الا بالتقوى والعمل الصالح بس مادري ليش فجأة انقلب حاله ! احس ان حد لعب بـ راسه و الصراحة وايد من اهل ابويه يحسدونا انا و خواتي و ما يتمنون لنا الخير

و اللي مضايجني اكثر ان أهل الريال مستانسين وايد عقب ما ردت امي عليهم الخبر و شاريني و أمه طيبة وحليلها و هي شايفتني بروحها و متعلقه فيني و تبغيني حق ولدها و هو كل يوم يسئلها متى بنزورهم و متى بشوفها في النظرة الشرعية

الصراحة ماعرف شو اقول لأن افكاري متخربطة و كتبت الموضوع للفضفضه لني متضايجة و في النهاية أدري ان الزواج قسمة ونصيب ؛ ونصيبك يصيبك وين ما كنت يجيبك و اذا كان هالريال من نصيبي اكيد باخذه لو اجتمعوا أهل الأرض كلهم عشان يمنعون هالزواج ما يقدرون لكن حز بخاطري الموقف شويه لاني اتذكرت حديث الرسول صلى الله عليه وسلم (إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير)

و اسمحولي على الإطالة خواتي بس مالي حد غيركن لني ماروم اتكلم ويا حد في هالمواضيع الحساسة