شخباركم
ييتكم اليوم بموضوع يديد بس قبل كل شي أتمنى ما يكون فيه ردود غير واعية أو ردود جارحة افهموا الموضوع وردوا وناقشوني بالعقل وليس العاطفة.
المهم موضوعي عن الخيانة لانه كثرت النقاشات عن هالموضوع وكانت اغلب الردود متحيزة للمرأة وانها مغلوبة على أمرها في كل الأحوال
وبغض النظر عن تعاطف المرأة مع بنات جنسها فيه اشياء المرأة لازم تكون فيها غير عاطفية لكن ذكية.
لكن فيه تصرفات اخرى تتعامل بها الزوجة بطريقة غلط بحطهم في نقاط:
1_ اكتشاف خيانة الزوج.
2_ البحث عن سبب الخيانة وهذا نادر جدا.
3_ المواجهة.
1_ اكتشاف خيانة الزوج:
اكتشفت امرأة خيانة زوجها, كلم بنت عالبلاك بيري او الواتس اب ..الخ, حز في خاطرها وبدت تفكر كيف تتصرف, صاحت وزعلت واهتمت واهملت نفسها وبس كل تفكيرها كان عن الخيانة.
2_ البحث عن سبب الخيانة:
ليش قلت نادر؟ لأن الزوجة نادر ما تبحث عن السبب بس هي تحط في راسها سؤال واحد ليش خانني؟ لكن ما تدور عالإجابة الصحيحة تشوف الغلط في زوجها لكن ما تسأل هل هي السبب أو لاء.
3_ المواجهة:
أكبر غلط في مشكلة الخيانة, لان الحرمة أول ما تقول اكتشتفت خيانة زوجي يكون الرد الوحيد هو المواجهة, واجهيه وبيني له انج عرفتي بخيانته, لازم ما تسكتين هذي حياتج وانتي لازم تتصرفين
طبعا هي ردود غير عقلانية لأن الرجل العربي بشكل عام غير مبالي يعني لو واجهتيه بيكون هو المنتصر فالنهاية
ما بيهتم لج لأنج خلاص عرفتي وعطيتيه الفرصة انه يتمادى في خيانته وجدام عينج بيقول خلاص هي عرفت فماله داعي اسوي اي شي من وراها بتصرف جدامها لأنها خلاص هي تحت الامر الواقع.
النصائح المفروض اعطاءها:
أولا في الحياة الزوجية بشكل عام من الخطأ البحث وراء الرجل مثل:
تفتيش الهاتف, مراقبة الرسائل والإيميلات, البحث في ملابسه عن رائحة عطر انثوي أو شعره من امرأة …الخ, واذا هو ما يفكر في الخيانة انتي بتخلينه يفكر.
من الخطأ إظهار الشك في الزوج حتى مع التأكد من الخيانة, لأن نتيجته نفس الحالة اللي قلنا عنها فالمواجهة.
لا تخلينه على راحته لكن لا تكونين سبب نفوره منج, حاولي تعرفين سبب الخيانة بطريقة غير مباشرة وايضا بدون تلميحات مالها داعي, قولي مثلا:
اليوم شفت فالتلفزيون حلقة عن الخيانة كانت وايد حلوة, تتوقع ليش الريال ممكن يروح لوحدة غير زوجته؟
ممكن يعطيج بعض الاسباب اللي عنده ركزي فيها لأنه ممكن يكون واحد منهم هو موجود فيج وممكن كلهم الله اعلم.
بس وانتي تسألين خلج طبيعية يعني لا تكون نظراتج انه الكلام لج يا جارة.
كوني ذكية ولا تتركين بيتج بس عشان خانج وتعطين الفرصة لدخول وحدة ثانية هالبيت.
حاولي بعد سماع الاسباب التفكير بمنطقية وتغيير اي شيء تتوقعين انه موجود فيج ويضايقه
احيانا تحتاجون لجلسة مصارحة بينكم اتفقي مع ريلج على يوم معين او يكون في نهاية الاسبوع تقولون فيه كل اللي صار خلال هالفترة بكل هدوء وتقصير كل واحد فيكم ان وجد والاعتذار عنه وتوضيح اي شي مب عاجبج فيه او هو مب عاجبه فيج ولا تطرين اي موضوع للخيانة نهائيا.
لا تعطين فرصة لأي حد يعرف بموضوع الخيانة او يدخل بينكم حتى في اي مشكلة ثانية, خلي مشاكلكم بينكم انتم وحليها بالطريقة اللي تشوفينها صح بدون ما تكونين مركزة على مشاعرج فقط.
لا تحزنين وتنكدين على نفسج وتفكرين في خطط او تلجأين لأسلوب الخيانة الوهمية لأنه كله بيرد عليج انتي وبنتائج سلبية جدا وسيئة.
انتمى يكون الموضوع فيه الفايدة للجميع
تقديري
الله يوفقج
فعلا كلامج صح بس مرات الانثى لا اراديا ومن شدة حبها تتصرف تصرفات غلط تندم عليها بعدين
الافضل تحكم عقلها قبل عاطفتها بهالامور مثل ماذكرتي
وحابة اضيف شي اختي بخصوص موضوع الخيانة
الصراحة انا احس السر والسبب الرئيسي للخيانة الابتعاد عن الدين
يعني لو ريال متدين يخاف ربه ماتوقع بيطالع برا بيته
الاسباب الثانية اعتقد انها ثانوية
ياما شفنا حريم ملكات جمال او مرتبات ومهتمة ببيتها وريلها يخونها
والعكس صحيح
فارجع واقول الابتعاد عن الدين هو اللي يخلي الريال يطلع برا
والله يسعد كل المتزوجات و يبعد عنهم كلمة الخيانة فحياتهم
وانا ادري يمكن اتهم انه ردي عاطفي لكن ليش فكره الموضوع وحده يعني لوخانج ريلج خليه على راحته؟ ومنو قال الريال العربي مايهتم و بيصير عادي يخون جدام حرمته مدام عرفت؟ ليش تزرعون ها الثقافه فيه الحرمه انه مغلوب على امرها ولو خانها ريلها تسكت و بس ! فيه رياييل يكونون متاثرين بربعهم فيجربون لكن ما يبون يخربون بيتهم فلمن ينتبه انه حرمته ددرت و بيته ممكن يضيع باي لحظه راح يوقف و يسوي كل شي عشان ما يروح منه بيته
اعتقد فيه تصرفات لازم تكون ايجابيه لكن كل الحلول اللي حطيتوها تخلي الحرمه سلبيه جدا و مغلوب على امرها وهذا يناقض الكلام اللي ذكرتيه في البدايه انه الحرمه تحس انها مغلوب على امرها و مظلومه لو ريلها خانها اصلا هذي الحقيقه الخيانه ظلم و ظلم كبير وحرام بعد
كلامكم فيه انه العاقل اهي اللي تسكت لكنه العكس خليتوا الحرمه بموقف سلبي سلبي جدا في الزواج. يعني كانه تقولون لها سكتي عنه لين ما يشبع من اللوث و بيرجعلج وعيشي حياتج انتي و اترييه يرجع من اللوث بصراحة ابد ما اشوفه حل لا عقلاني ولا منطقي
الزواج عيشه اثنين مب عيشه حرمه و بس عشان الزوج اسمه بالعقد بس يسرح و بمرح و يرجع اخر النهار لبيته بس هذا اللي تبيه الوحدة لمن تتزوج ااخر الليل يرجع لها ريلها و مايهمها شو كان يسوي و يعربد طول اليوم؟
انا ماقول تتطلق لكن اقول فيه حلول اعقل و اكثر ايجابيه تحفظ كرامه الاثنين و ماتخلي الحرمه سلبيه و تحس انه مافي شي بيدها
تنصحونها تقولولها قومي بدورج كامل تجاه ريلج خليه يستحي على ويهه انه يخونج و انه ماله عذر فلمن تعرف بخيانته خل يعرف انها درت وانه ممكن يخسر انسانه احترمته و عزته و صانته اما اللي مايهتم ترا من اول بايعها بايعها يعني مايهم درت او لا فمايفرق رده فعلها اصلا عادي الحرمه تعيش مخدوعه بزواجها!!
لمن اناقش ريلي بموضوع الخيانه يقولي لو شو مافي عذر للخيانه لازم محد يحاسب نفسه على خيانه السبب الاول و الرئيسي للخيانه انه فيه بنات و حريم مستعدين يخونون متوفرات عشان تكون علاقه مع الريال المتزوج اما باقي الاشياء فيقول الريال لازم يتعلث باسباب عشان يبرر لنفسه ..قالي لو جذي عيل الحرممه بعد تقدر تخون لنفس اسباب الريال شمعنه يعني اهنيه حلال واهناك حرام يعني رياييل وايد مايعطون حريمهم ريج حلو تروح يعني تكلم شباب يحسسونها انها حلوه وانه مهتم فيها ولها قيمه و فيه وفيه وفيه!!
فيه مستشارين يقولون للحرمه طنشي و عيشي حياتج لكن شفت وايد ينصحون يقولون خلج ايجابيه و ماتكوونين سلبيه في تعاملج مع خيانه الرجل هذيلا اللي احب اسمع لهم مو اللي يخلون الحرمه مغلوب على امرهاو سلبيه بس لانها خايفه من رده فعله… فيه شي اسمه تواصل حوار محاوله مره و اثنين و عشره مو علطول اول ما ينصاد قالها انتي السبب!
سوري انا ضد السلبيه في التعامل مع الخيانه
اتمنى حد يشرحلي وين المنقطيه و العقلانيه في تطنيش زوج خائن و شو الفائده اللي بتطلع منها؟