شحالكن خواتي ..؟
شكرا لكل من دعت لي بقلب صادق متمني لي الشفاء ، أنا نزلت هالموضوع عشان أخبركم شو صار ويايه وشو ياني وشو ماياني … يا ترى بتصدقني ولا بتقولن سامية تبالغ ؟!!!
بنات من قبل لا أنزل موضوعي الأول كانت ناوية وبادية بقراءة البقرة 40 يوما بنية الشفاء حسيت نفسي قوية ولكن في الليلة الثالثة صارت ويايه هذي اأشياء : ـ
رجفة فضيعة بيدي اليسرى …
تقريص عند خصري …
انتقل الألم في النهاية للرجل اليمني …
سكرت القرآن وقلت عقب بكمل لأني حسيت بلوعة وأبى أصيح … ريلي يرمسني وأنا ايدي ترتجف رجفة تقوين غي الشتاء البرد ..راح ريلي عني وياني أرق كل شوي أقوم وأفزز ن نومي … اليوم اللي عقبه كان لازم أروح أخلص شغلي في المنطقة التعليمية لأني تعيين يديد … رحت وأنا أحس حد قاعد ع صدري وفيني صيحه وأنا طول الدرب أقر وأدعي وأتحسبن واستغفر … وفي المنطقة نفسي ما رمت آخذه قلت خلاص أنا بموت …
رديت وبدت الرجفة وع هالحال .. بس بدت الكوابيس والأرق والحزن والصبح يوم بروح للمدرسة يصد قلبي عن الدوام صد وأحس ريولي لاصقات فالأرض ودموعي تنزل غصب ..
وطول اليوم ألهث … قالن لي المدرسات انتي شو بتسوين يوم بيبدى الكد والشرح مابترومين .. بتذبحين عمرج ؟!!!!!!!!!!!!!!!!!
بنات أنا ألحين أبا أقولكن المطوع يوم اتصلبه قريبي قاله هيه تعبانة وايد قال الطوع لأنا تضرهم بالبقرة والعسل … خلها توقف العسل لأن العسل يفتت السحر المشروب والمأكول …
أنا صابرة وصابرة وصابرة وما أقول غير الحمدالله … والحمدالله والحمدالله مابا غير إن ريلي وعيالي يسلمون أنا مب مشكله بس هم لاء … بنات أنا قبل شوي ارمس بو عيالي قلتله أنا اهم شي عندي البنات وانته وأمانتك بناتي على الدنيا ولا تحتها … وايد اتضايق وقال انتي متشائمة تميت اصيح قلتله يا ليت أقدر بس أوصفلك شو يعني أشوف الموت ونفسي يضيق كل شوي .. ليتك تفهم شو يعني أني صرت أحسب الأيام أقول يا شفاء ويا موت وراحة وحكمة الله أنا مابردها …
بنات صدق وضعي صعب وممكن يتحطم كل حلم بنيته نعم أنا طموحي أكون معلمة أجيال أدرس عيال الناس مثل عيالي هنيه أنا وجودي في التدريس واذا تعبت خلاص بسحب عمري بهدوء بالنسبة لي هذا أقسى شي أنا مادرست واسهرت وماتركت عيالي الا عشان ادرس وأكون معلمة بمعنى الكلمة … ولكن الحمدالله على أي حال بأول له وربي مب معترضة مول وحامدة وشاكرة ربي …
وأخيرا لكل وحدة دشت الخاص وطلبت رقم الشيخ ما يعطي رقمه لحد بل عن طريق الذهاب لبيته وتدقون الجرس وتطلع الخدامة بدفتر في تحدد موعدك واليوم اللي بتي فيه وحرمة أو ريال … اللي تبى العنوان تراسلني الخاص أما الرقم فالسموحه مايعطي رقمه …
ما أبى سوى دعواتكن من القلب
)
(
الله يشفيج ويعفووو عنج =|
)
(
*~.. آلرب حآآفظ