الطريقة التي خلصتني من الذقن المزدوجة بدون عملية

السلام عليكم

هذي أول مرة أطرح موضوع في هذا القسم , مع أنني دايماً أتابع كل الموضوعات الخاصة به وأحد ألأقسام المفضلة عندي في المنتدى.
المهم أنا بطرح تجربتي الخاصة علشان يمكن حد يستفيد منها وما أعرف بصراحة إذا الموضوع نفسه مكرر ولا لا.
أنا وجهي طويل ومتوسط يعني لا سمين ولا ضعيف بس كنت أعاني من مشكلة الذقن المزدوجة أو اللغد أو double chin , يعني تضخم وترهل الرقبة من تحت وكأنه عندج ذقنين, أنا جسمي نحيف بس أكيد المشكلة تتزيد مع السمنة) وطبعا الذقن المزدوجة تبين الوحدة أكبر من عمرها وكنت متضايقة من هذي المشكلة . رحت لدكتورة وقالت لي ما في علاج لهذي الحالة إلا عملية يعني عملية تجميلية وشد وقطع و شفط وما أعرف شو بعد !!!!, قلت لها ما بسوي عمليات. رحت لمركز علاج ثاني وقلت لهم أبا علاج لهذي المشكلة بس ما عملية , قالو الحل في العلاج بجلسات الموجات القصيرة وموجات الراديو وبيطول, قلت بفكر .طبعاً أنا من الفجيرة شو بيوديني كل كم يوم دبي بس علشان جلسات الراديو وييف ؟؟؟, صعب
ومرت فترة , وفي يوم قرأت في النت عن تمارين الوجهه الخاصة بمنع الترهلات أوعلامات العبوس وغيره وتعمقت في الموضوع لين وصلت للتمارين اللي تعالج وتمنع اللغد أو الذقن المزدوجة , سويت بحث زيادة ودخلت على مواقع ثانية موثوقة وطبية وأجنبية وشفت نفس الكلام , توكلت على الله وبدأت أسويها , وفي نفس الفترة شفت إعلان على قناة التسوق عن كريم خاص لتنحيف الوجه والرقبة (gold shape -face slimming cream) وطلبته.
وبدأت أستخدم الكريم لرقبتي فقط مرتين في اليوم الصبح والمساء قبل ما أنام مع مساج من تحت لفوق لين تتشرب البشرة الكريم وكنت أسوي التمارين على الأقل مرتين في اليوم .والنتيجة بعد شهرين يا خواتي لله الحمد والشكر أختفى الترهل أو اللغد تماماًورجعت رقبتي مشدودة والحمدلله, ساعتها وقفت الكريم واستمريت على التمارين السحرية على الأقل مرة في اليوم ولازلت مستمرة عليها من سنة والحمدلله .
أكييييييد تبو تعرفو شو هي التمرين صح؟؟؟؟

الله يسلمكن التمارين وايد بسيطة وسهلة ,بس تطلعي لسانج وتمديه لقدام ( لا مب قلة أب ) وتعدي لعشرة وتدخلي لسانج وتكرري لمدة عشر مرات. على الأقل مرة في اليوم في المرات الأولي بتحسي بشد بعضلات الفك عادي ,بس مهم وايد لا تسون التمارين قدام حد!!! سونهن بروحكن عن يحسبوكن لا سمح الله أستخفيتن ولا شيبعدين لا تقون وجدان الفجر ما قالت ههههه!!!
هذي تجربتي الشخصية وإذا فيه أسئلة أو تعليق أنا تحت أمركن.
أتمنى تفيد حد وأسمحني على الإطالة واللي تجربها وتفيدها تدعي لي خواتي الله ييسر أمري ويحقق اللي في بالي. جزاكن الله خير.

تسلمين فديتج ع الطريقة وان شاء الله البنات يستفيدون منها مثل ما استفدتي انتي

مشكووره

مشكووره حبيبتي

وربي يسر لج

مشكوووووووووووووووره لاني اعاني نحن بنات العايله كلهن يشتكون حتى العصاقل

يوم قريت مد إاللسـآان ضحكت .. )) خخخ
لـآاهنتي غنـآاتي .. ))