كنت افكر ..و بما ان ربيعاتي معرسات و اسمع دوم سوالفهم و ايضا السوالف اللي هنيه في المنتدى
البارحه كنت افكر في شي…هو موقف خبرتني عنه ربيعتي ..بس ما يحتاي اقوله
الخلاصه ان
لو ريلج قهرج بكلمه او بحركه ..يعني قالج كلمة تجرح احساسج ..مثلا انتي متينه او مشعرانيه او أي كلمه الحرمه تتحسس منها …او تصرف تصرف يقهرج انه يظهر بالساعات ويا ربعه و لا مفتكر فيج
يعني من هالاشياء خواتي المعرسات و انتو اكيد تعرفون حركات رياييلكم اللي تقهر سواء كلام او تصرفات
المهم لو صار هالشي و زوجج قهرج و انتي من قبل قد يلستي وياه يلسه هاديه و صارحتيه باللي يزعجج ..لكن هو مب مفتكر و يكرر هالتصرفات او الكلام
ودي بس اعرف ردة فعلج …و هاللي بكتبهم ردود فعل متباينه لاحظتهم على ربيعاتي
1. تنقهرين و تضاربين و تسوين اكبر ضرابه في العالم و عقبها كم اسبوع زعل
2. تحسين بالظلم و تبلعينها بالم و ما تقولين غير حسبي الله و نعم الوكيل
3. و لا تفتكرين و لا على البال و تخلين نفسج اكبر عنه و ما تنزلين مستواج
4. تنتقمين انتقام خفي ..مثلا تخشين شي من اغراضه المهمه و تسوين عمرج ما تدرين بشي او شي من هالقبيل
5. تنتقمين انتقام صريح و يعني لو هو يقولج انت متينه تقوليله طاع كرشتك ههههههه او لو يظهر مع ربعه بالساعات..تسويله نفس الحركه و تظهرين بالساعات و لا تردين عليه
هالموضوع يقرقع في بالي من البارحه و خاطري بس اعرف نوعية ردود فعلكم تجاه هالمواقف..و ان شاء الله اشوف تفاعل حلو يشبع فضولي اللي ذبح العيوز هههههههههه
ما يحتاي مشاكل ,, بالتفاهم كل شي ينحل ..
عاااد هو على طول يتم يترجاني أسامحه ويتم يتأسف (الكلمة الحلوه تغير جبال)……….
عاااد أنا أنصح الحريم بالهدوء في الرد وخذوا وقتكم بالتفكير لأنه الانتقام واللسان الطويل ما بيسكت الريال….. (بيتم بيعيب عليج لا ويمكن السالفة توصل مرحلة الكلام الجارح أو الضرب)………
والسموحة