شحالكم خواتي عساكم طيباات
اول شي احببكم فالله 
ثاني شي هالموضوع كتبته للنقاش والسوالف وياكم شوي منها نذكر مواقف ومنها ننصح
وبماا اننا على ابواب شهر الخير نقدر نغيّر من نفسنا ونخلي الكلمه الطيبه اسلوب نتبعه فحياتنا
حبيبااتِي الغاليات كم منا يجهل انه الكلمه الطيبه الها وقع كبيير فالنفس حتى ولو كانت كلمة " شُكراً "
ترا شي حلو انه الانسان يدخل السعاده لقلب غيرّه بكلمه طيبه
يا ترا انتي تعرفين هالانساانه بشو تحس او من شو تعاني ؟ وبمجرد ما شكرتيها او قلتيلها كلمه طيبه او عاملتيها باسلوب حسن ادخلتي السعاده والسرور لقلبها ؟
ليش نشوف ازواج يضاربون
وليش الطلاق يكثر وقت ما الزوج يرد من دوامه
ليش نشوف ابناء منحرفين وسلوكياتهم فاسده
ليش نشوف خدم يكيدون ويقتلون ويشردون
هل الكلام الطيب والمعامله الحسنه من اسلوب حياتهم ؟
الزوج يوُم يرد من الدوام يكون تعباان بغض النظر شو ماكانت وظيفته بس مايستاهل ابو عيالج الي يطلع من الصبح للظهر انه يوم يرد يحصلَ استقبال بوجه حسن ؟ ومايستاهل كلمة الله يعطيك الف عافيه ؟ ولا حتى بوسه عالراس كتقديير من زوجه لزوجها ؟
هالريال لو حصل هالعوامل فحياته الزوجيه يوميياً من يسير لين يرد بيفكر انه يطلق حرمته ؟ ولا ينفر من البيت ؟ ولا حتى يخون لا سمح الله ؟ ولاا حتى بيفكر انه يردلج طلب ؟
طبعاً لا لانه هو مرتاح نفسياً ومعنوياً يرد يحصل من يعطيه كلمه طيبه ويسير وهو سامعله كلمه طيبه ، الريال قلبه كبير بس الذكيه هيه الي تعرف تحافظ علييه بكلمه طيبه وباسلوب حسن
لاتقولين ريلي عَصبي وبينا مشاكل ، صدقيني كلل شي ايي بالتدريج وبالتعود واتريي اسبوعين ثلاث اربع وان قدرتي اكثر اتريي
وبتشوفين جو البيت كيف بيتغير وكيف النفوس بتهدا
حبيباتي لو نخلي الكلمه الطيبه اسلوب نتبعه فحياتنا والله انه كل شي بيتغير
لو مدحتي عيالج واثنيتي عليهمَ بيتقربون منج وبيحبونج ولوو العكس بيكرهونج وبينفرون منج
الخدامه لو عاملتيها مثل اختجِ فالله وشكرتيها عكل شي تسويه وادخلتي السرور ع قلبها وهيه يايه من غُربه عسب لقمة العيش والله انها لا بتشردَ ولا بترضى انها تسافر عنج
الي حوالييج لو عاملتيهم باسلوب حسن وكلمه طيبه بيحبوُنج
ولو قابلتي الاساءه بكلمه طيبه واسلوب حسن والله انج بتجنين ثمار فعلتج الطيبه من رب العالميين قبل هالشخص الي اساء لج
لكن نتم بشَر نزعل ونعصب ونضايج وما نتحمل وظروفنا متقلبه بَس نحاول نغير من نفسنا عشان انكون احسن
موقف صارلي من سنتين فالجامعه ، انا واعوذ بالله من كلمة انسانه معروفه بين ربيعاتي ما اغش ولا اغشش ، صادف انه وحده من الزميلات الي اعرفهم معرفه سطحيّه فقط فهالكلاس طلبت قبل الامتحان اني اغششها وسكت مارديت لا بالرفض ولا بالموافقه ، دخلنا القاعه حليت وسلمت الورقه
ويوم طلعت من الامتحان يتني هالبنت تفاتن عليه جدام البنات وتتلفظ بالفاظ ابدا مب حلّوه ، يالانانيه ، يالحقوده ، اعتمدت عليج عسب تغششيني وطنشتي ، ولو فييج خير جان عالاقل ماطلعتي ، هذا كله والبنات يطالعون وانا ساكته واترياها تخلص خلصت ورديت عليها ( اذا كنت غلطت فحقج حبيبتي ف انا اسفه وسامحيني وما اقدر اكون بنفس مستوى اخلاقج وارد عليج حتى لو كنتي غلطانه واذا انتي غلطتي فحقي جدام كل هالبنات فربي يسامحج وينور لج بصيرتج وتعرفين الحق )
ابداً مانسيت الموقف ولا نسيت كلامها لانه وايد اثر فيني ، الغريب انه بعد ها كله هالبنت يت تعتذر مني وصارت من اقرررررب الصديقات لي واحبهُم بعد وقالتلي صدمتني ردة فعلج وتميت متلومه طول اليوم
وبس
خواتي موضوعي للتذكير والتنبيه والنقاش لانه نحن فبعض الاحيان نحتااج نسمع نصايح من حد توعيينا واتنبّهنا حتى لو كنا عارفينها
اتمنى الي عندها موقف صادفها او سمعت بشي او نصيحه مفيده بخصؤص موضؤعنا الكلمه الطيبه والمُعامله الحسنه تنورنّا وتذكرها 
سُبحان الله لازم ما نستصغر الامور يمكن بنصيحه او موقف او كلمه تغيرين فيها حياة انساانه
خلونا انخلي الكلمه الطيبه اسلوب فحياتنا ؤنستخدم الكلمات الحلوه عسب نرضي رب العالمين ثم نكسب محبة ورضى الناس
ما بنخسر شي لو قلنا شكراً ، يعطييج العافيه ، بارك الله فييج . . وغيره وغيره
اترك لكم الموضوع حبيباتي
من أجمل المواضيع اللي قريتها
بارك الله فيج اختي وجعل ثمرة طرحج لهذا الموضوع في ميزان حسناتج
صدق بالعشرة تعلمت ان الكلمة الطيبة في لحظة تنهي الخلافات الزوجية وتطفي غضب الزوج
حتى لو كنتي غلطانة كلمتج الطيبة تخلي غصبن عن اللي جدامج يسامحج
أَلَمْ تَرَ كَيْفَ ضَرَبَ اللَّهُ مَثَلاً كَلِمَةً طَيِّبَةً كَشَجَرَةٍ طَيِّبَةٍ أَصْلُهَا ثَابِتٌ وَفَرْعُهَا فِي السَّمَاء (24) تُؤْتِي أُكُلَهَا كُلَّ حِينٍ بِإِذْنِ رَبِّهَا وَيَضْرِبُ اللَّهُ الأَمْثَالَ لِلنَّاسِ لَعَلَّهُمْ يَتَذَكَّرُونَ (25) وَمَثَلُ كَلِمَةٍ خَبِيثَةٍ كَشَجَرَةٍ خَبِيثَةٍ اجْتُثَّتْ مِن فَوْقِ الأَرْضِ مَا لَهَا مِن قَرَارٍ (26) يُثَبِّتُ اللَّهُ الَّذِينَ آمَنُواْ بِالْقَوْلِ الثَّابِتِ فِي الْحَيَاةِ الدُّنْيَا وَفِي الآخِرَةِ وَيُضِلُّ اللَّهُ الظَّالِمِينَ وَيَفْعَلُ اللَّهُ مَا يَشَاء (27) سورة ابراهيم
فعلا الكلمه الطيبه فالمواقف الشديده تذيب كل الخلافات واتخلي الشَخص يراجع نفسه الف مره
شكرا عالمداخله الحلوه مثلج
الكلمه الطيبه تأثيرها كبير و عميق الله يهدينا بس و يهدي ازواجنا
فعلا الكلمه الطيبه والمعامله الطيبه تغير وايد اشيا فينا وفاللي حواليينا
ومن المواقف الي صارت لوحده من الاهل من اكثر من 5 سنوات
كانت طالعه مع ريلها وصار بينهم مشاده كلاميه كبيره ونقاش حاد تقول بالعااده ارد عليه واطول لساني واترادد وياه حتى كله يقولي انتي مب محترمه ولسانج يباله قص وياريتني ماخذتج !!!
تقول هالمره ماكنت متفيجه اتناقش وياه ولا اترادد
تقول ماقلت غير " هد اعصابك يالغالي وكل خير بيستوي ان شاء الله " تقول قلتها بحسن نيه بس عسب اسكر الموضوع وماكان في بالي اي شي ثاني
تقول انصدمت اول انه سكت وبعدين كيييييييييييييف هدت اعصاابه وتم يضحك وياي ويسولف وتغيرت نفسيته وعقبها بيومين صارحني كيف اني كبرت فعينه يوم سكت عنه وعطيته كلمه حلوه مع انه غلط في حقي
قال انتي بس لو كل مره ماطولين لسانج عليه وتحترميني وتعطيني من الريج الحلو بتشوفيني خاتم فصبعج
ومن عقبها تقول لساني ماقام ينقط الا العسل وحياتنا تغيرت مليييييييوووووووووووون درجه لاني قمت اتغاضىى عن وايد اشيااا واطوف واسامح واعتذر حتى لو هو غلطان واسكر الموضوووووع قبل لايكبر
تقول موقف بسيط صار وغير متعمد بس جلبلي حياتي فوق تحت
شكرا اختي عالموضوع الرائع والمفيد
ويزاج الله خير على الموضوع
أمس كنت أرمس ربيعاتي عن ضرورة التفكير قبل الكلام
أغلب المشاكل وسوء الفهم يستون بسبب التسرع في حزة الغيظ والزعل
ف لو تدبرنا السنه وشفنا أحوال الرسول صلى الله عليه وسلم جان اعتبرنا
رغم الأذى اللي ياه عليه أفضل الصلاة والسلام إلا انه كان يتأنى في الرد ويكظم الغيظ
وهالأشياء نحن نروم نسويها بكل سهوله لوتدربنا عليها
أولها حفظ اللسان خواتي وعدم التلفظ بأي لفظ في حزة الانفعال والغيظ لأن ابليس يكون مسيطر حزتها
ونتذكر قول الله سبحانه وتعالى:
الَّذِينَ يُنفِقُونَ فِي السَّرَّاءِ وَالضَّرَّاءِ وَالْكَاظِمِينَ الْغَيْظَ وَالْعَافِينَ عَنِ النَّاسِ ۗ وَاللَّهُ يُحِبُّ الْمُحْسِنِينَ (134)
الأخذ بحديث الرسول صلى الله عليه وسلم
(( عَنْ أَبِي ذَرٍّ قَالَ: إِنَّ رَسُولَ اللَّهِ صَلَّى اللَّهُ عَلَيْهِ وَسَلَّمَ قَالَ لَنَا: إِذَا غَضِبَ أَحَدُكُمْ وَهُوَ قَائِمٌ فَلْيَجْلِسْ فَإِنْ ذَهَبَ عَنْهُ الْغَضَبُ وَإِلا فَلْيَضْطَجِعْ ))
تكرار سبحان الله وبحمده ثلاث مرات
وكثرت الإستعاذه من الشيطان
ورمضان فرصه حلوه لتدريب النفس وتهذيبها
الله يبلغكن اياه ويرزقكن صيامه وقيامه