الناس معادن

السلام عليكم حبوبات … اتمنى تكونون بصحة و سلامة

اتمنى انكم تعطوني رايكم و تتشاركون بهالنقاش
هي ملاحظة …. او واقع بديت اقتنع فيه كل يوم اكثر عن اللي قبله

الناس ما عادت نفس اول … الناس استوو مب زينين .. اشرار و حاقدين
الروح الحلوة و الشفافة اختفت من عالمنا الجديد … و الواحد صار يتباهى انه واحد مب زين
و انه يسوي مشاكل حق فلان و علان … كلمة انا ما صارت تفارق حلوجهم
كل حد صار يدور على مصلحته لكن على حساب الشخص اللي مقابله

استغرب من هالشي اللي قام يتزايد بشكل مخيف لين ما ابتدى يدخل بيوت البعض مننا بشكل علني
نفس الداء اللي ما له دواء
هالفكرة مسيطرة على عقلي من اللي اشوفه يمكن طبيعة عملي سمحتلي اني القي نظرة قريبة على الناس و انبش فمعادنهم … بس اللي انا مب قادرة استوعبه اني قمت اشوف 90 الى 95% من الناس بهالصورة المخيفة
حتى فالسوق او الشارع اكون سايقة السيارة فجأة حد يكسر علي لأنه يريد ياخذ لايني او يلصق فيني لأن الحبيب مستعجل و مب مهم انا شو وضعي اسوي حادث .. اتوتر و ما اروم اتصرف … او اي شي غيره
الدكان يسرق عيني عينك و الحياة حلوة بس عشان يكسب درهم اكثر هههه
بنات يشوفوني اتمشى ويا اخوي فالمول يسيرون عداله يسمعوه كلمتين حلوات
اللي فالدوام يحاربني و يسير يتكلم عني من وراي بس عشان ما اترقى … ولا الثانية اللي يوم تشوفني اشتغل تحلالها السوالف بس عسب اغلط او تستويلي سالفة ويا حد من المراجعين و قدامي شكل ملاك طاهر و من وراي شكل ثانييييييييييي
ناس تكذب تكذب تكذب بشكل فظييييييييييييييييييييييييييييييييييع …. الكذب استوى تسلية بالنسبة للناس
كأنه لبان
ولا الصديقة اللي مسوية عمرها اخت ههههههههه تقطعج من وراج و قدامج تنصحج
ولا الشباب اللي عادي يتم يلاحق لين باب البيت بكل وقاحة

احيانا اتمنى لو اني كنت في زمن قبل هالزمن ايام ما كانت الحياة حلوة
كان الصديق صديق و الجار جار
كان الواحد يخاف يغش الناس خوفا من ربنا سبحانه و تعالى و خوفا من انه يخسر هالصديق او الجار او الزبون عشان كم فلس زيادة
كان الواحد يحب لأخوه اللي يحبه لنفسه
و شغلات واااااااااااااااااااايد لو قعدت اذكرهم ما بخلص
ليش الناس تغير معدنهم بصورة مخيفة …
مع ان في مثل يقول الناس معادن (هذا على اساس ان المعدن النقي النظيف ما يتغير و تتم قيمته عالية مهما تغيرت الظروف)

لا يكون انتهى زمن المعادن الصلية و استوت الحين مغشوشة و مزورة و انا بعدني عايشة بعالم ثاني؟؟

هيه صح كلامج ..
الحين نادر ماتلقين الناس الزينين
اتعاملينهم بطيب .. ومن وراج يغدرون فيج ..بصراحه ,,
هالزمن يباله نظره 2 من التعامل وكل شي ,,الواحد لازم يقوي نفسه شوي
وماياخذ الامور بحسااسيه وطاف

اشكر مروركم …
بس اختي حنين اللون الابيض يوم تتمين تحطيه ويا الاسود بيبتدي يفقد بريق البياض و يبتدي لونه يتحول شوي شوي
الا اللي يقاوم و يقاوم بداخله و يتمسك اكثر لاقيم و المثل الاخلاقية الصحيحة اللي نادرا ما تلاقينها

اختي التغيير يبدأ فيج الحين انتي جي تقولين وانا جي اقول و كل بنات المنتدى وياج

و كل الناس وياج

عيل وينهم اللي قلوبهم مب صافية؟؟ دام الكل وياج

انا اشوف التغيير يبدأ من داخلج و بيتغير تفكيرج كلياً و بتشوفين ان في ناس طيبين و في ناس مب طيبين و في ناس الظروف تجبرهم و في ناس مروا بحالات خلتهم يتغيرون مب بأرادتهم فاعذريهم

عليكم السلام اختي دودو الحلوه … اشكرج ع الموضوع اللي يباله مناقشه عووده وما ينسكت عنه

كل يوم انا وامي نيلس نرمس عن هالموضوع وعن زمان اول كيف كان واحينه شقى استوى
الكل اول كانوو غير واحينه شووو ؟؟؟ استغفر الله

حتى ساعات لما ايلس افكر بروحي فهالسالفه اخااف من السنين اليايه كيف بتكون .. يوم احينه انجوف جذه الناس باجر شو بيستوي فيهم وفينا بسسم الله علينا .. الله لا يبلينا ..
وافكر كيف مستقبلي بيكون ماتخيل يوم من الايام استوي نفس هذيل البنات اللي اجوفهم فالسوق وحتى الجامعات ..
استغفر الله وين حياء المرأة المسلمة وخوفها من رب العالمين وعذاب الآخرة

صار كل شي عااادي عند الناس فها الدنيا .. مادري من شو كل ها .. اختلاف العادات والحضارات اللي اتينا من دول ثانيه ؟؟ ولا من التلفزيون واللي كله فسسق وخرااب عقول خاصه لليهال ..إلا بعض القنوات الدينه والزينه

والله لما اجوف يهال احينه واابوي اتخبل .. اقول فنفسي وين كنا قبل يوم صغاريه مالنا حسس ووين يهال لسانهم اطول عنهم ..
والرياييل .. رياييل هالزمان مالهم امان .. عافان الله مما ابتلاهم إلا من رحم ربي …

المهم يعطيج العافيه اختي .. لو تميت ارمس عن هالسالفه مابخلص … والسموحه منج

اختي المغتربة اشكرج على ردج و احترم كلامج … لكن لو انا ناوية اغير من اللي في داخلي معناه بتغير حتى اكون نفسهم
اللي يشوف شي و يتكلم عنه معناه ان اللي بداخله غير
و دام ان اللي بداخلي هي القيم القديمة اللي تربيت عليها و اللي اعيشها بس في محيط عائلتي معناها مب انا اللي لازم اتغير … معناها ان الناس و نظرتي لهم صحيحة
فسري كلامي بشي منطقي شو معنى خيانة صديقة لج؟؟ غلط فيج انتي ؟؟
شو معنى الناس اللي يتكلمون عليج من وراج لمجرد الغيرة ؟؟ غلط فيج انتي ؟؟
شو معنى ان حد ما يحسب حساب لمشاعرج و المهم مصلحته هو و بس؟؟غلط فيج انتي ؟؟
شغلات وايد في بس انا بطالبج تجاوبيني على هالثلاث اسئلة و بس… اقنعيني اني انا اللي غلط و لازم اتغير
و للعلم اختي … ما في حد تحت اي ظرف يغير اخلاقه و معدنه عشان حد الا اللي يكون معدنه من البداية مغشوش و مب اصلي
يعني الشريف ما بيستوي حرامي لأنه شاف اللي حوله جي و ما اعتقد جدود جدودنا اللي ما كان عندهم غير الارض و الفاس اغنى من اللي عنده عمارات و سيايير الحين و مع ذلك يسرق و ينهب
هل كللللللللل هالامور غلط فيني انا و بتفكيري ؟؟