انواع الاكل خلال العلاج الكيماوي

….

سبحان الله وبحمد سبحان ربي العظيم

مرحبا أختي. أنا عندي خبرة في هذا الموضوع. و فعلا مسألة الاكل تصير وايد صعبه. العلاج الكيماوي له تأثير يختلف من شخص لشخص على الجهاز الهضمي. في ناس أييهم أسهال فضيع و ناس العكس أمساك بسبت الكورتيزون اللي ياخذونه ويا الكيماوي. بس عموما يكون في فقدان للشهيه و ترجيع و لوعه و مغص و طعم غريب يكون في اللسان على طول مدة العلاج. عشان مشكلة الطعم و التهابات و ألم اللثه في مضمضه خاصة تطلبونها من الدكتور أو الصيدلية معروفة حق مرضى السرطان. في فيتامين خاص ينباع بس في ألمانيا أسمه أورثمول أميون برو خاص حق مرضى السرطان بعد وايد زين و يعطي الجسم قوة. اذا في ألم فالبطن ممكن تسألون الدكتور اذا يسمحلكم تعطونها دوا واقي للمعده ينخذ ويا أي أدوية أو حبوب لأنه يغلف المعده و يحميها أسمه بانتازول. أكيد عندكم علم أن جميع المسكنات ممنوعه بس مطارة الماي الحار وايد تخفف ألم البطن خصوصا يوم تحس أنه الحركة المعوية توقفت. بس في حالت الالم الشديد مسموح بالبوروفين. بعد الجرعة الثانية او الثالثة يفقد المريض الغلاف المخاطي اللي يمتد من الفم الي آخر المصران يصير الهضم أصعب بس نحن وايد استفدنا من اللبن من يشربه المريض يحس بالفرق سبحان الله كأن الغلاف رجع. و بعدين كما ذكرت مايكون لهم نفس عالأكل بس لازم تجبرون المريض أنه ياكل و يتغذى. ابتعدوا تماما عن اللحوم الحمرا لآنها صعبة جدا عالهضم و مضره لمرضى السرطان بالذات. بس لحوم الطيور و الدجاج مسموح به. ركزوا على الارز الاسمر بدل الابيض خصوصا اذا كان المريض من النوع اللي عنده امسك. التمره تعطي طاقة و حاولو الابتعاد عن الكافيين الشاي و القهوة و اعتمدوا الشاي الاخضر و الاعشاب لأنه يخفف ألم البطن و يساعد على الهضم. و لازم تركز على شرب الماي الدكاتره أكدولنا لازم شرب 3 لتر ماي خصوصا يوم الكيماوي وايد يخفف تأثيره على الجسم لأنه الماي يطلعه من الجسم على طول. و لازوم الابتعاد عن الحر و الشمس خاصة لآنه تزيد من شعور اللوعه و الدوار و الترجيع. و أهم شي الراحه و النوم. و اذا بغيتي أي شي راسليني. طولت عليكم السمووحة.

الله يشفي اختج

ويشفي جميع مرضى المسلمين

أم حمد ما قصرت .. ربي يجزيها خير

اسمحيلي نسيت أذكر أنه المريض مايتحمل الملح و الفلفل و البزار . هالأشياء لازم اتخفف أو تنلغى على حسب المريض. أكيد الدهون و الزيوت و المقالي مايتحملونها. الأكل لازم يكون خفيف و صحي و سهل الهضم. طبيعي أن المريض بيفقد وزن فلازم يتغذى زين. ركزو على العصاير الفرش كل يوم خصوصا مع الريوق بس شرط يكون طازج مب معلب لأن الجسم محتاج فيتامينات و معادن.
على فكرة ممكن يشتهي المريض سويت أو شي حلو أنصحكم بالطحينه لأنها مكونه من السمسم اللي فيه فوائد كثيرة و كالسيوم. على فكرة الان اللثة تتعب فالمريض مايقدر ياكل أشياء صلبة أو قاسية مثل التوست اليابس أو المكسرات أو التفاح. الموضوع مب صعب بس ياخذ وقت و تعود. ممكن أعطيج مثال يوم

الفطور: بيضتين + 2 توست أسمر+جبن+ نصف لتر عصير برتقال طازج
– بين الفطور و الغداء لبن و تمر – أو علبة زبادي أو فاكهه لينه مثل الموز
الغداء: سلطة + صدر فروج مشوي + عيش أسمر+ لبن أو مجبوس خضار و دياي مع بزار خفيف و بارد و عيش أسمر
– بين الغداء و العشاء : فواكه – حلو – تمر
العشاء: شوربة + سلطة و توست أو لبن و تمر أو ساندوتش جبن و خضار مع خبز أسمر

أذا كانت المريضه ما تشتهي الاكل ولا تحس بلوعه أنصح بسندويتش توست لأنه أخف

اللهم اشفي مرضانا و مرضى أمة محمد أجمعين.

مشكووره اختي أم أحمد84 على المعلومات ..

بغيت ااسالج شو بخصووص السلطااات مع العلم انا نبشرهاا يعني مثلا الجزر مايكون يابس .. ونحط صووص وها السوالف

شو راييج ؟؟

والله لايبلي حد بها المرض

وربي يشفي مرضاانا ومرضى المسلمين