مرحبا الغاليات
شحالكن ويا رمضان؟؟؟ الله يسهل علينا جميعا يا رب ونربي بالسلامه
قريت مواضيع وايد في هالمنتدى وفي مدونة ثانيه عن إبرة الظهر… وايد بنات يستسفرون عنها وشي بنات يذمنها سواء من تجربتهن ولا من تجارب الغير… يعني رمسه سمعوها وقاموا يرددونها
أول شي أحب اذكر الجميع بالاستخاره في جميع أموركم عسب الله يوفقكم ويسهل عليكم
أنا عن نفسي ماسمعت بهالابره إلا في نفس اليوم اللي ربيت فيه… وكانت أول ولاده لي (يعني بجر) وحبيت اذكر تجربتي للبجريات عسب مايقولون إن هالإبره ممكن تضر البجر وعادي اللي مربي قبل تاخذها… ترا مول مايخصه
وعلى فكره هالابره نفسها اللي يستخدمونها في العمليات القيصريه و3 من خالاتي يربن قيصري وفي كل ولاده يعطوهن إبرة الظهر والحمدلله مافيهن إلا العافيه…. طبعا هالشي عرفته عقب مايربتها روحي ماكنت اعرف شو السالفه وكنت اتحرا يعطوهن بنج وخلاص
المهم… ولادتي كانت يوم الأحد… واليمعه اللي قبله كنت أحس بويع قوي بس كل ساعه تقريبا ومشيت مشي ذيج الليله عسب الويع يزيد واربي… كان باقي أسبوع على ولادتي… مشيت تقريبا جريب الساعتين بدون ما اوقف ورديت البيت وأنا مافيني ويع مول!!! توكلت ع الله وقلت الخيره فيما اختاره الله ومتى ما الله كتب هالياهل يظهر بيظهر
ونشيت اليوم الثاني وأنا مول ما احس بشي…. لين ما استوت الساعه 3 الفير وقام ينزل علي ماي… سرت المستشفى أنا وريلي وأم ريلي ويوم فحصتني الدكتوره قالتي الرحم مفتوح 1 سم بس… قمة الاحباط طبعا… مستعيله وابا اخلص… قالتي اليوم بتربين والأحسن اتمين في المستشفى
المستشفى اللي ربيت فيه مستشفى ويلكير… بصراحه تعبت وانا امدح هالمستشفى وموظفينه… عاد أنا من الحماس مول مارقدت ويتني أمي فديتها من بوظبي الصبح وتمت يالسه ويايه… الضحى مرت علي الدكتوره وفصحتني وماكان الرحم متبطل عندي إلا نص سانتي زياده… يعني 1 ونص… وقالتلي إذا تبين تربين بسرعه بنحطلج كريم في إبره داخل المهبل عسب يحمي الطلق عندج ويتبطل الرحم بسرعه… ولأني مستعيله وافقت…. من حطت الكريم ماكملت 5 دقايق إلا بدا الويع اللي على أصول… ماتوقعت الطلق جيه أبداااااااااا…
وتم الويع يزيد علي لين ما استوت الساعه 3العصر… فحصتني الدكتوره وكان الرحم متبطل 3 سم ونقلوني غرفة الولاده… وعطتني الدكتوره ابره ورقدت ساعه تقريبا ومن خاز مفعول الابره نقزت من مكاني على الويع… مارمت اتحمل وقمت اترجاهم يسوولي عمليه بس طبعا محد سوالي سالفه
لين ما استوت الساعه 6 المغرب والألم يزيد وأنا اصيح واترجى أمي وريلي والدكاتره إنهم يرحوني من الألم ويسوولي عمليه… عقب قالتلي الدكتوره إذا تبين بنعطيج إبرة الظهر وهي ماتأثر مول على الطلق… وافقت على طول وبدون تردد وخلوا ريلي يوقع على ورقه
يلسوني ع الشبريه ويابولي دكتورة البنج… وقالتلي يوم بتحسين إن الويع خف خبريني عسب ادخل الابره لأني لازم ما اتحرك مول… أول ماخاز الويع عطتني الابره وما شاء الله مول ماحسيتبها وكانت سريعه وايدها خفيفه وماحسيت بالابره أبدا
من عطتني الابره خاز الويع وماقمت احسب بشي مول حتى إني رقدت على طول من كثر ماكنت تعبانه… خلوني راقده نص ساعه وسبحان الله الابره ما أثرت مول على الطلق وانفتح الرحم عندي 8 سانتي وعقب نص ساعه بعد فتح عندي 10 سانتي وماوعيت إلا على صوتهم ويقولون ولاده
عاد أنا ذيج الساعه صدق تحمست وطار الرقاد من عيني… أخيرا بربي وبجوف ولدي… كل ها ومفعول الابره بعده ماخاز… وشرات ماخبرتكم ماكنت احس بشي والدكتوره هي اللي كانت تقولي متى اسوي بوش ومتى اوقف لين ماظهر ولدي فديته… حسيت بشعر راسه بس وماحسيت بأي شي ثاني لا ألم ولا غيره… حتى الخياطه ماحسيتبها ابدا… ويم ظهروا الابره بعد ماحسيت بشي
وحتى عقب ماخاز مفعول البنج ماحسيت بألم بسبة الخياطه…. وكنت عادي اتحرك واسير وايي… بس عيب الابره إنها تسبب صداع قوي مايخوز حتى بالبندول بس الحمدلله ماكان يومي وكنت احس بألم قوي بظهري عقب الولاده كل كم يوم ومن كمل ولدي شهرين خاز عني الصداع ويوع الظهر
والحين أنا حامل في السابع وسألت دكتورتي إذا أروم آخذها مره ثانيه وإذا مالها مضار وطمنتني… أول مره ما استخرت لأني ماكنت أعرف شي عن الابره… هالمره بستخير إن شاء الله وبإذن الله باخذها ولا تعب الطلق
واسمحولي طولت عليكم… أول مره اكتب قصة ولادتي ههههههههه
بليز جاوبوني !!!!
اب اب
وما أفكر ابداً أجربها مرة ثانية !!
وكل وحدة وطبيعة جسمها 
بس انا بعد ما افكر فيها ابا كل شي طبيعي ..
والله ايسر ولادتي .. وولادتج بعد ..
ويرزق كل محرومه ..