تعالي فديتج اباج تقرين هالموضوع

شحالج فديتج ..؟؟ ان شاااء الله اتكون المعنويه توب..

حبيت انزل هالموضوع باسمج .. لاني احس مشاكلج شرات المشاكل اللي اتمر فيها انسانه عزيزه وغاليه ع قلبي..

انا تعمدت اني انزل الموضوع عالعااام.. كنت اقدر اطرشلج رساله خاااصه واكلمج فيهااا.. بس انا بغيت الكل يقرأ .. يمكن حد يتعلم درس من هالمشاااكل بين الازواااج .. ويتجنبهاااا مستقبلاً

غنـــــاتي كلي برآءه:

انا عندي انسانه عزيزه ع قلبي..
تزوجت واحد من عايله (استغفر الله بس شو اقول عنهم ) , والله حتى الكلب ما بيرضى يعيش وياااهم .. وللاسف ابوها هي اللي زوجهااا .. واخوانها ما كانوا موافقين .. لان محد يمدح فالعايله هااي..
المهم البنت توكلت عند ريلهااا.. اول شهرين عسل .. وبعدها سم ..

كانوا يرمسون عليها من وراها .. ما يخلون كلمه ما يقولونهااا.. وحتى جدامهااا كانوا يرمسون عليها ويطيحون فيهااا.. عمهاا وعمتهااا (والدين ريلهاا) .. فالبدايه كانت اطنش احتراماً لنفسها ولانهم كبار فالعمر.. لكن خلاف بدت اترد عليهم لانها ما قدرت تتحمل ..

كان يخونهااا.. ويفتخر بهالشي جدامهااا.. ويقوللها انا بسير اليوم عند ربيعتي ومن هالكلام اللي يسم البدن..
يبهدلهااا.. ويسبهااا.. وصلت انه سب عايلتهاا كلهم..
(طبعا هي ما سكتت .. وخبرت اخونهاااا .. وخواانهااا هددوه بانهم بيشتكون عليه .. لان العنف ما اييب شي .. لين ما اصطلب شوي .. )

اكثر عن مره طلبت الطلاق .. بس هو ما يبا يطلقهاااا.. (لانها قويه وعندها اسلوب حلو فالكلام .. عشان جذا هو متعلق فيهااا وما يبا يودرهااا)

كان يقوللها انتي هب حلوه وربيعتي احلى عنج .. مع انها ملكه جمااال والشاهد الله .. (كان يبا يقهرها باي طريقه ما قدر .. لان هي ما عطته مجاااال ولا عطته مدخل يدخل فيه عشان يقهرهااا.. كان برودها هو اللي يقهره)

حتى امه اتسبهاااا جدام ولدها (ريلها) .. وهو عااااااادي عنده ..
وابوه من اتسوي شي .. امره يربع عند ولده .. والله حرمتك سوت وسوت
عاد هو ما يقصر فيهااا.. لدرجه انها مره يالسه اتكلم عمهااا فالفون .. ربع عند ريلهااا وقالله لا اتخلي حرمتك اتكلم عمهاا .. ما يعيبناا..

حتى خدامتهااا ما سلمت منهم .. ومن لسنتهم ..
والحين تبا اتسافر.. بسببهم

ووايد اشياااا.. لو بقوللكم اياها بيوقف شعر روسكم .. يوم هي اتخبرني احس بضيج عليها.. ومن اتسكر عني ايلس اصيح ع حالهااا..

والله انها ما تستاهل اللي يستويلهاااا..

للعلم ان ريلهاااا كان متزوج من قبل .. لكن حرمته الاوليه ما كملت سنه الا وهي طالبه الطلاق .. لانها ما رامت اتعيش وياااا هالعايله ..

العبره:

-لا اتخلين عواطفج هي اللي تتحكم فيج .. انتي اللي اتحكمي فيهاا.. وحكمي عقلج قبلهااا..
– لا تكونين ضعيفه جدام ريلج .. خلج قويه .. ولا ترضين تتنازلين عن حقج ..
– خلج غامضه .. لان الريال يحب الحرمه الغامضه ..
– خذي الامور بهداوه .. ترى ماشي ايي بالمصارخ والعصبيه والعنف..
— عليج بالاسغفاااار .. وتقربي من رب العالمين .. وادعيه واخشعي بصلاتج ودعائج .. يمكن اذا شافج ع هالحال يحن قلبه عليج ..
— اذا سب اهلج لا اتردين عليه .. وحاولي انج ما تسمعين سبه .. عشان ما تنحدرين وياااه لهالمستوى .. لانج راح تفتحين للشيطان باب يدخل منه ف حياااتج الزوجيه ..
— خلج جريئه وسيري عند ام زوجج .. وتفاهمي وياااهاا … وقوليلها انتي شو تبين مني ؟؟ شو اللي يسعدج عشان اسويه لج .. واذا قالت لج السحر وهالخربطااان .. قوليلهاا الا هالشي ما اقدر اسويه .. ع الاقل انتي بتسوين اللي عليج .. ولازم ريلج يدري بانج كلمتي امه وحاولتي اتراضينهااا.. عشان اطيح الحجه عنج..
ومعروف ان اهل الزوج اذا ما يحبون حرمة ولدهم ف بيحاولون يسوون مشاكل بينها وبين ريلهااا..

–عليج بالصبر والصبر والصبر فهو الذي يولد دميمة السعادة الزوجية وتذكري دائماً وأبداً أن الحياة الزوجية تقوم على السكن والحب والرحمة وحسن المعاشرة .

بنـــــــــــــــــــات عليكن بالردود البنـــــــــاءه .. هب الهـــــــــــــــادمه

همسه:
عزيزتي كوني مثل الحمامه : خفيفه -هادئه. سريعة الحركه -لا تكسر -لا تضرب -لا تعنف. فيها رقه ولين…

وفالختام : الله يسخر لج ريلج .. ويلين قلبه عليج ..

للطاعته ورضاه سبحانه وتعالى