هي بلاد الأنس كما سماها أحمد رامي و تغنت بها أسمهان منذ اكثر من نصف قرن و عقد من الزمان، و لم اعرف انها بهذا الجمال الا عندما ذهبت اليها.
حملت اليكم بين طيات هذا التقرير المتواضع بعض الاخبار و الصور التي اتمنى انها سوف تفيد البعض و تزيد معلومات البعض الاخر عن النمسا، أو على الأقل تقوم بتسلية فئة أخرى من القراء.
الزمان: 27/07/2017 – 17/08/2017
مسار الرحلة: دبي – فيينا ( فيينا – سالزبورغ – زيلامسي – فيينا ) – دبي
الخطوط / سعر التذكرة: طيران الإمارات – الدرجة السياحية ( في العوده درجة رجال الاعمال لنه ربيعتي سوتلنا اب جريد ). 3700 درهم للشخص.
الفنادق:
فيينا : لو ميريديان ، إمبريال
سالزبورغ: شيراتون
زيلامسي: ديروالدهوف.
بداية سوف اقسم التقرير الى ثلاثة اقسام .. يعني الاماكن الي زرناها في كل من المناطق التالية .. مب على حسب الأيام ..
الأول: فيينا .
الثاني: سالزبورغ + ميونخ
الثالث: زيلامسي
————-
الجزء الأول : فيينا Vienna أو Wien
وصلنا الى مطار فيينا الدولي حوالي الساعة الثانية ظهرا حيث استغرقت الرحلة 5 ساعات و نصف كانت متعبه، و لكن في الطائرة تفاجئنا بالمضيفة تحضر لنا هذه الكيكه هدية من طيران الإمارات للعرسان الجدد:
خذنا تاكسي من الي واقفين جدام المطار و كان السايق تركي .. وايد طيب .. و تمينا نسولف وياه عن الجو و عن نور و مهند و ريلي كلمه عن الكوره .. يا حبه للكوره هههههه .. المهم خذنا تقريبا 20-30 دقيقه في السياره و وصلنا لفندق الو ميريديان و نزلنا
و هذا موقع الفندق في فيينا .. موقعه جدا استراتيجي .. السوق و المطاعم و دار الاوبرا و الاندر قراوند كله حذاله ..
و هاي صور الفندق . اسمحولي يبتها من النت لنه الصور الي كنت مصورتنها كلها عفسه في عفسه ..
و هاي الغرفه .. بس الظاهر انه هاي ديلوكس .. لنه الي كنا ماخذينها اصغر .. بس كيووت
و هذا الحمام عزكم الله .. وايد حديث .. يعني كل الي فيه مودرن و الي يحبون الشي التقليدي ما بيحبون هالفندق ..
هيه الحمام بابه زجاجي بس مموه .. و ماشي مفتاح و لا قبضة بس يندز و يتبطل خخخخ فشيله
و هذا المطعم هني … اكلهم لذيذ .. براويكم بعدين ريوقي ..
الفندق حديث وايد … يعني مال الشباب اكثر من الكبار . يعني يمكن اهاليكم .. الوالد او الوالده اذا كانو كبار الله يطول بعمارهم .. ما بيحبونه .. بس الصغار يحبونه .. و انا احس احلى اذا كان حق معاريس ولا اثنين متزوجين سايرين بروحهم .. او مثلا شباب سايرين بروحهم ..
تقييمي للفندق:
السعر: تقريبا 1200 درهم لليلة الوحدة.
الاكل : لذييذ و في مطعم عربي..و البوفيه الصبح من يتم لين 10 و نص .
الموظفين: كلهم صغار اشكالهم مال كليات و جامعات يشتغلون عندهم.. و يعرفون انجليزي وايد زين
الغرف: وايد مرتبه و التلفزيون الي فيه بلازما معلق عاليدار .. و الثلاجة فيها كل شي فري .. كولا و عصير و ماي .. ماشي عليه حساب ..
الانترنت: مجانا بس بالواير .. تركبين الواير و تدشين النت ..
هل سأعود لهذا الفندق؟ أكييد برد ان شاء الله اذا رديت فيينا .. لأنه يجنن من كل النواحي
سوينا الاجراءات الي كانت سريعه لنه كنا حاجزين عن طريق وكالة سفريات … ارتحنا لين 8 المغرب و طلعنا نستكشف .. و هالصور من اول نزول لشوارع فيينا .. في الصورة التاليه بتشوفون الاندرقراوند مال الاوبرا .. جدام دار الاوبرا على طول .. و في هذيج المنطقة شي محطتين للاندرقراوند .. اوبرا هاوس و ستيفانبلاتس ..
المهم كنا يوعانين و نبا نتعشى .. لقينا هالمطعم الايطالي …. و طلبنا العشاء .. ريلي طلب سمج و انا طلبت سباغيتي مشروم .. اكله كان لذيذ ..
يالسه اطالع المينيو … و اكلهم شوي غريب .. لوول .. بس اخترت شي جان يقول لي الجرسون هذا ما يصلح لج فيه كحول .. قلت زين يوم قلت لي .. و طلبت السباغيتي ..
كان الوقت متأخر .. تمشينا شوي و ردينا الفندق .. و في الطريق شفنا هالاشياء طبعا اول يوم ما كنت اعرف شو هي بس عقب كمن يوم يلست اقرا الكتبيات السياحية و سألنا و استكشفنا ..
هاي الاوبرا هاوس ..
و هاي كاثدرائية ستيفان المحروقة الي يحيط بها ساحة ستيفان او ساحة المشاه المشهورة .. و فيها السوق .. وايد حلو .. ومعظم محلات الماركات .. و على فكره احنا اكتشفنا انه محلات الماركات في فيينا ارخص عن البلاد بواااااااااايد ..
((سنعوود بعد قليل ))
عاد هالله هالله بالردوود السنعة
——–
البقية تحت ….
الف الف مبروك ع الزواج .. وبصراحه انا وانتي والبنات عشنا احلى ايام في ها المنتدى اللي هي ايام الملجه والله بسرعه طاف الوقت ..
وشو سالفتنا كلنا في النمسا (( شهر العسل ))
بس انا وريلي في الطياره ما يابولنا كيك 
وكنا درجه بزنس بس ماحد عبرنا .. مع ان في الكونتر قالهم ابويه ان نحن عرسااان .. بس يالله ماعليه كان كله سوالف اونه اول ايام العرس نتعرف ع بعض .. ماشبعنا في الملجه ههههههههههههههههه
والله يهنيج يارب .. يالله كملي في انتظارج وبدايه حلوه 
التقرير باين من عنوانه..ومقدمته الرائعة…
مررت به سريعاً وسأعود له حالآً لأتصفحه وأقرأه بتمعن..
واضح أنه سيترك بصمته حتماً في القسم..
متابعين ^^
بس راحت عليه
ما شاء اللهـ التقرير حلو لين الحينهـ
ما شاء اللهـ
بس انتوا حاجزين الرحلهـ والفندق وكل شي !! ولا التذكره بس من وكالة السفريات ..؟
تسلم يمناج لين الحين اوكي كان في خاطري اسير فينا بس ما كان لي نصيب
بس رحت زلامسي روعة بذات (——) اقول مممممممممممم لا ما بخرب على الغالية في تقريرها
انا مشكلتي ما اعرف انزل صور جان نزلت بس يالله انشوف منكم ونتذكر ايامنا الحلوة
والسموحة
الله يهنيج يالغاليه
وفانتظار البقيهـ
كانت درجه الحرارة 38 وتوصل 30 اتخيلوا شارده من البلاد عسب الحر ولقيته اهناك ؟؟؟؟؟؟؟؟
بس اللي كان امصبرني ساحه استيفنز ( شارع السياح ) والكنيسه المحروقه واللي حرقها هتلر ما ادري صدق ولا جذب
بس كانت رحلتنا من احلى الرحلات