حامل بالشهر الأول والكيس صغير .خايفه

اول شى مبارك عليكم الشهر وربى يسعدكم ويجعلة مغفرة لى ولكم ولأمة محمد أجمعين .

خواتى انا ولله الحمد والشكر حملت بعد طول انتظار عقب ما اجهضت من 8 شهور ،، فرحت وايد ربى لك الحمدوالشكر ،،، بس يوم سرت راجعت عند الدكتوره سوت لى سونار من تحت وقالت ان الكيس صغير ومب شايفه شى ،،،،

وسوت لى تحليل دم وطلع الهرمون 7000 بس قالت لى ان الهرومون مرتفع والمفروض يكون الكيس اكبر عن جذى ويبين داخله شى ، وقالت لازم تسوين نوع ثانى من الشعه عند اختصاصية اشعه عسب اذا تأكدت ان حمل خارج الرحم تعطينى حبوب للاجهاض )-:

الصراحه خفت وايد وزوجى قالى ما عليج من كلام الدكاترة وتوكلى على الله ،، لأن تونى مخلصه شهر واحد ويمكن اقل بكم من يوم ،، وحطيت ف بالى انى ما اسير عند اى دكتوره لين نهاية الثانى ان شاء الله .

ما ادرى شو السبب ،، من 8 شهورحملت واجهضت لأنه كان ضعيف وتوقف نبضه بالشهر الثانى وسوو لى غسيل رحم ،،، واحينه الدكتورة تقولى ها الكلام ،،، سبحان الله ،،، احيانا اقول يمكن لأنى فوق ال35 سنه ؟؟ بس أرد واشوف حريم اكبر عنى ماشاء الله حمل وبخير وعافيه . وبالأخير كل شى من عند الله وبمشيئته وهو الرزاق سبحانه وتعالى .

الوسواس تعبنى وايد ،،، ادعولى دخيلكم بها الشهر الفضيل .

وربى يثبته لى ويرزق كل حرمه بالذرية الصالحه يا رب

اللهم آمين

واسمحولى على الاطاله الغاليات .

لا تخافين يا اختى انشاء الله الكيسه تكبر ويبين النونو والله يثبتلج اياه انشاء الله

اختى لا تسمعين كلام الدكتوره

اترى شوى بعد شهر روحى توج شهر واحد

ان شاء الله يوم تدخلين الشهر الثانى الكيس بكون حجمه اكبر

الله يثبت جنينج يارب

واستغفرى فى رمضان وتمى ادعى

الف مبروك الحمل والله يتمم عليج الشهور التسعة علي خير وبركة
ويثبته رب العالمين وتفرحون فية انتي وابوه ان شاء الله
انا من راي اتحملي ثلاث شهور وارتاحي بعدين افحصي مرة ثانية ويبين ان شاء الله
يمكن الحمل صار متأخر علشان جذي الكيس صغير وأتغذي زين بعد عسب يكبر والله معاج

أم موزة 10 (( تسلمين اختى الغاليه ربى يسعدج ))

مهاجره بأحساس ((( مشكوره فديتج والله يسمع منج الغالية)))

نهر الحرير ((( الله يبارج بحياتج ويسعدج الغاليه ،، مشكوره على الرد ))

الف مبروك الحمل الله يثبته لج ان شاء الله ويفرحج بشوفته ..

عادي حبيبتي لا توسوسين في البداية ما يبين الكيس شي طبيعي ..
وبعدين يبين ويكون حجمة صغيييير .. وشوي شوي يكبر ..

ولو كان الهرمون وايد مرتفع احتمال تكونين حامل بتوام .. ان شاء الله .. غريبه هيي ما قالت لج هالشي ..

توكلي على الله ..