ريلي ما يصرف علي ><

السلام عليكم ورحمه الله وبركاته .
شحالكم ؟
عندي مشكله ووايد متأزمه منها وتزيد عصبيتي كل ما افتح هالموضوع مع ريلي .
انا معرسه من 3 شهور بالضبط من عرست لين الحينه ولا مره قلت لريلي وديني السوق اشيا ناقصتني ووداني .
من يومين كنا بنتغدى برا البيت وسرنا وردينا البيت بدون غدا >> قال ان المطعم مافيه مكان للعوايل انزين عادي مب مشكله طوفناها .
ونحن طالعين من المطعم شفت دبنهامزازقره مره ومرتين وثلاث الريال يمشي ولا جنه يسمعني عقب قلت له تعال ندخل دبنهامز .
قال لي ماله لزمه ندخله .
ووايد مواقف ثانيه تعصبني وايد كل ما اقوله ابا اشتري شي يقول لي لا ما عندي فلوس وما عندي فلوس .
مع العلم ان هو معرس وعنده عيال بسمش كبير بالسن بدايه الثلاثين ودوم يخبرني انه وداهم مطعم وهالمطعم معروف انه غالي يعني يطلعهم انا ما اقصد باللي كتبته الحينه انه لا يطلعهم او شي لا
الي اقصده انه يصرف عليهم وانا يوم اطلب شي يقول ماعندي فلوس هالشهر ..
ريلي ضابط بالجيش ورتبته عاليه يعني الراتب عالي >> ليش يقول لي جيه ..
اليوم مثلا >> خبرني انه مودي عياله واشترى لهم اشياء وااااايد يوم سمعته قالي جيه خبرته انا بعد ابا اسير السوق ابا اشتري اشياء لعرس بنت خالي الي بعد كم يوم قال لي ما عندي فلوس ابد هالشهر .

انا خلاص عصبت مقهوره منه ليش على هله يصرف ويعطي وانا يوم اطلب شي يقول لي ما عندي وما عندي .

اشيا البيت ما تنقص عادي يعني كامله بس انا التزاماتي اغراضي الخاصه كل شي لا حتى بيجامات يقول لي لا تشترينها .

يوم ابا اشتري لي اشياء اضطر اني استلف من خواتي فلوس ويوم ابا اردها لهم يقول لي بعدين بعدين مب الحينه خواتج شو يبونها الفلوس الحينه .

ولله مب حاله ولله مع اني يوم ارمس اخته تقول لي ان هو مب جيه مب طبعه انه ما يصرف تقول انه وايد كريم ويعطي وما يرد حد

يعني هله يصرف ويعطي بس انا لا .
حتى قلت يمكن انا فيني شي ما يعيبه حاولت اشوف شي فيني او اني غلطت عليه بشي بس ما احصل شي عليه
حتى يوم اطلب منه شي اطلبه بأسلوب يعني دلع وما دلع يعني حبيبي وغيره .
بس ماشي فايده حتى يخبرني دامج تقولين جيه يعني تبين شي ويضحك هني اعرف ان جوابه لا .

بنات ساعدوني شو اسوي معاه من 3 شهور ما غيرت لا لبسي ولا شي ثاني .

خواتي اول ما عرسوا ولين الحينه الحمدلله الله يزيدهم كل ما اييون اشوف اشيا يديده وانا توني معرسه واستلف منهم .

يعني هالشي يقهرني حاولت كم مره تخيلوا من شهر اطلبه نسير السوق بس ما يرضى .
حتى مرات ما يطلعني عشان ما اشتري شي مره قال لي تعالي نطلع بس تحملي تقولين تبين تشترين .

ولله طفرت ابا حل شو اسوي ساعدوني

الله ييسر امورج

الله ييسر امورج
الله يعينج

هو اصلا ما يطلعني عشان اطلب نادر يوم نطلع بالشهر مره يمكن
وما اطلب منه وايد بس الي اباه يعني ما اطلب اشيا انا مب بحاجتها
اسلوبي دوم حلو معاه وهالشي يريحه مب بس وقت اني ابا شي
كلمته بالعقل وبالعاطفه حاولت بس ماشي فايده للأسف .
ومشكورين عالردود

حاولي تتفاهمين وياه

قوليله حبيبي انا ابا مصروف شهري يكون حقي اقضي فيه اموري

والشرع حددلي هالشي

ربي يسخركم لبعض ,,,