سئلت يدتي عن السفيداب . وعطتني الخبر اليقين !

احب هالحركة لوووووووووول علشان تدشون غصب ماتطلطلون من بره

اقولكم كثرت السوالف والاشاعات عن المسكين السفيداب ان فيه زئبق

والله مظلوم مسكين واعليا لوووووول

فوق ماهو نافعنا هم نطلع عليه اشاعات
عومة ماكولة ومذمومة

عاد انا قبل ماكنت اعرف السفيداب

وقبل هالمنتدى كنت ادش منتدى عالم حواء وغيره من المنتديات الخليجية اوكي
عرفت وايد شغلات منهم وقريت معلومات وتعلمت اشياء يديدة
عقبها طحت على هالمنتدى وعجعجت فيه

بس لاحظت شغله فيهم
مادري هل هي جهل منهم او خوف زيادة عن اللزوم
او يحبون يقولون معلومات مادري من وين يايبينها

كلشي صار فيه كورتيزون
كل شي يسبب سرطان الله يكافينا الشر وكله خايفين
عسى ما وحدة قالت معلومة وتحذير على طول يخافون من غير لا يتأكدون

المهم

من ضمن الشغلات اللي عرفتها اهيا السفيداب

حتى نزلت موضوع سئلتهم عنه حق شنو وشلون يستخدمونه

يوم عرفت انه ايراني قلت مالي الا يدتي
يدتي ايرانية من شيراز ( يعني منطقة بناتها بقمة البياض )

عاد قلتلها ديدة شنو السفيداب ؟؟ حق شنو؟؟

قالتلي مالت أليج .. يدتج ايرانية وماتأرفين السفيداب

لووول ماعليه ياحليلها تونس لما تتحجى مكسر بس ماشالله عليها بيييييير معلومات

المهم علمتني شنو السفيداب وحق شنو يستخدمونه وشلون الطريقة ومع شنو يخلطونه والذي منو

عاد في الاآونة الاخيرة (( اليوم مبدعة فطوم لووووووول ))

اقولكم في الفترة الاخير اشوف طلعت سالفة يديدة بهالمنتديات الخليجية الا وهي ان السفيداب فيه زئبق !!!ووايد بنات خافوا منه وتركوه ومادري شنو

انزين تاكدوا بالاول شنو مكوناته ومن وين اييبونه وبعدين تصروعوا
ووصلت المعلومات لهالمنتدى توها

عاد انا قلت مالي الا يدتي تعطيني الخبر اليقين

رحت سئلتها الحين السفيداب منو يسويه
مصانع ولا وين

جان تقولي لا ببا هذولي بالقرية يسوونه بالدهاة ( بدو ايران ) والقرى الفقيرة

ياخذون شي اسمه آهاك
( ماتعرف اسمه بالعربي شنو بس تقول مثل بودرة بيضة ريحتها مثل الاسمنت بس مو اسمنت )

فاستنتجت انه قشر البيض فعلا
لاني انا اجفف قشر البيض واطحنه فريحته فعلا مثل السفيداب والاسمنت
المهم
تقول ان القرويات ياخذون النخاع من الغنم ويخلطونه مع الآهاك وزيوت طبيعية
وبطريقة ما (هذي من عندي لووووول )
يكورونه ويجففونه ويصير صابون يبيض الجسم ويشيل الجلد الميت !

وكل ايران تستخدمه اهوا وصابون الرقي بزيت الزيتون

الحين

اكتشفنا ان السفيداب برييييييييء من الاشاعات المغرضة
لان القرويات يعني نساء فقيرات يعيشون على بيع الاشياء المصنوعة بايديهم بمواد بسيطة متوفرة حوالينهم

من وينلهم فلوس يقططونها على الزئبق !!

تقولي الحين صار فيه مغشوش وياااااابس حيل

السفيداب الاصلي ريحته فيها شوي مثل الدهن ولونه مثل الحليب كريمي مو ابيض وايد نفس الطباشير
واول ماتمسكين الاصلي بايدج يتنتف على طول

المغشوش تلاقينه مثل الصخرة وبالغصب يتكسر وريحته طباشير وناشف حيل لان مغشوش مع بودرات ثانية

علشان جذي نقولكم الحنة البيضا اهيا السفيداب المطحون لكن يفضل انج تاخذين الكور وتطحنينهم بنفسج لان مرات البايع يغش فيها ويخلط معاها بودرات ثانية الله اعلم شنو اهيا والاشاعة طلعت على السفيداب المطحون او الحنة البيضا انا قريتها بس في بنات قالوا لا كل انواع السفيداب حتى الكور

وعسى ايامكم كلها سفيده
( سفيد يعني ابيض بالايراني )