سقوط الرحم او المهبل الاعراض والعلاج ومنها التكعيب والترفيع

سقوط الرحم او المهبل وماهي اعراضة وعلاجة ومنها التكعيب والترفيع

الصراحة ترددت وايد قبل ما اكتب الموضوع لأنه محرج وايد لكن شفت انه كثير من الخوات يعانون ويسئلون عنه فقلت اتوكل على الله سبحانه وتعالى واكتب الموضوع عسى الله يكتب الاستفاده والشفاء للجميع

ورجاء للخوات اللي عندهن فكره او اضافة فليتفضلن مشكورات والله يجعله في ميزان حسناتكم

اساسا ليش التكعيب (التجعيب)

1) بروز الرحم من فتحة المهبل (في الامارات نسميه نفسها طالعه) وتكون مثل الكره (البالونه) الصغيره واذا اهملت تطلع اكثر وطبعا تصبح في صعوبة في الجماع وفي رجاجيل يكرهون الحرمة عقبها وطبعا الدكاترة اشو يسون يضربون ابر ويعملون خياطة لكن المصيبة ان المسالة ما تنتهي تظل النفس تطلع بين فترة وفترة الين ما النهاية تتسكر النفس عند الوحده حتى انه الريال ما يقدر يجامعها
2) احيانا تحس الوحده انها ماتقدر تجلس او تتحرك بسهوله يعني كلما جت بتتحرك او تجلس او تقوم او تتبرز او تتبول تحس كانه في شيء داخل (في اسفل البطن والظهر على اطراف الحوض وتحت المنطقة كلها من البداية للنهاية يعني من فتحة البول والمهبل وبين فتحتي المهبل والشرجوالشرج وفوق الشرج وين العصعص) يؤلمها مثل الغازات اللي تتحرك او مثل الشكات اي النغزات في العروق
3)حمل اشياء ثقيلة ولعب الرياضة العنيفة واللي تتطلب حركات سريعة وقوية اثناء الدورة او النفاس او حتى بالأيام العادية

وفي اشياء ثانية بعد لكن هذا اللي حظرني

طبعا هذا كله معناه الخراب وانه الوحده ما عادت تنفع خلاص الا اذا ارجعت اهتمت بنفسها واسمعت الكلام والنصايح
والخراب يكون مثل اللي في النقطة 2 مثلا ويتطور حتى يكون للي في النقطة 1

العلاج

1) عدم حمل اشياء ثقيلة او ممارسة الرياضة في الأوقات الحساسة بشكل عام يعني قبل الدورة مثلا او بعدها والنفاس كذلك لكن للي ما تصبر وراسها والف سيف تسوي رياضة بالامكان ممارسة الرياضة الخفيفة البطيئة لكن الأفضل لنك ما تسوين الرياضة وفي الأيام العادية تسوين الرياضة الخفيفة والبطيئة بعد يعني في كل الحالات ما تسوين الرياضة العنيفة السريعة
2) يوم تقومين او تجلسين او تتحركين تفعلين هذه الحركات بهدوء وعلى راحتك يعني ما تنطين نطة او تقفزين قفزه مره وحده لا قومي على راحتك
3) الاهتمام بنفسك زين ما زين من اكل وشرب دائما سواء في الأيام الحرجة او غيرها قصدي في النفاس والدورة والأيام العادية

4) التكعيب
والتكعيب لجميع الحالات يعني مش بس لبروز النفس اي الرحم لا خواتي حتى لأي اعراض مثل اللي في النقطةالثانية حتى

ومن فوائد التكعيب ايضا وخصوصا بعد النفاس انه يعالج الامساك

نامي على ظهرك وافتحي اي باعدي رجليك اشوي وخلي امك مثلا او اي وحده تثقين فيها تحط كعب رجلها اليمنى مثلا في فتحة المهبل (طبعا راح يكون من فوق بس يعني من فوق الملابس (الجلابية) عادي يعني تحط رجلها وتقولين لها نعم هنا الفتحة مثلا واذا عندها خبره ما له داعي اساسا لأنها عارفة الطريق (والله فشيله بس علشان تستفيدون وتفيدون اليي حواليكم) وتمدين لها ايديكي الاثنتين وتمسكها بايديها طبعا ايديك اليمين بتكون في ايديها اليسار وايديك اليسار بتكون في ايديها اليمين لأنها بتكون واقفه قدامك صح فاهمين

طيب

وتروح شاده ايديكي وفي نفس الوقت ضاغطه ضغط خفيف بكعب رجلها (وهذا هو المقصود الضغط فقط وليس انها تدخل الكعب داخل انزين) وتظل مثلا 5 ثواني وتزيد كل اشوي الضغط مع الشد على حسب ما تتحملين وتكرر العملية لمدة خمس دقائق مثلا

وبعدين نجي للمرحلة الثانية من التكعيب

تنامين على بطنك وتروح الحرمة حاطة كعبها على فتحة الشرج ومرة على العصعص مرة اي فوق فتحة الشرج طيب وتكونين مادة لها ايديكي وهي ماسكتنهم ونفس العملية تشد بايديها ايكي وتضغط بكعبها وتظل اشوي مدة 5 ثواني وتزيد كل اشوي

وتكرر العملية في اليوم مرتين في الصبح والمساء مثلا واذا كانت شديدة اكثر

5) الترفيع هو نفسه التكعيب
لكن يكون بآداه ثانية يعني للي ما عندها احد مثلا لكن التكعيب هو اللي ينفع اسرع وخصوصا في حالات بروز الرحم يعني ما ينفع له الترفيع طيب

تاخذين فنجان القهووة الخليجية مثلا او اي كوب صغير وتلفين عليه الشيلة البيضاء اللي نلبسهم في البيت ولباقي الخوات اللي ما يلبسون الشيل البيض يستعملون اي قطعه مقاس 2 وار ونص (الوار=36 انش) وللي ما عندها تاخذ حتى الجلابية العادية طيب
وتلفين القطعة دور ما دار الفنجان في النهاية تطلع مثل الهرم المدبب طيب وتحطينه بالضبط جنب الجدار اي الحيط اي جدار في الغرفة او الصالة وين ما يريحج المكان وتروحين واقفة واحطة ظهرك على الجدار وتنزلين اشوي اشوي لين ما توصلين للفنجان الملفوف وتكملين جلوسك عليه وتحاولين تعدلين في جلوسك كل اشوي وين ما تحسن انه في الم مثلا فتحة المهبل وبين فتحتي الهبل والشرج وفتحة الشرج وفوق فتحة الشرج عند العصعص وتستمرين 5 دقائق اواكثر حتى تحسن براحة
وتكررين العملية الصبح والمساء او على حسب شدة الحالة

والله المستعان
اسال الله العظيم رب العرش العظيم ان يشافيو يعافي كل مسلم ومسلمة
اللهم آمين

ملاحظة خواتي
وخذنها نصيحة ما تقدر بثمن
وهذي خلاصة التجارب
الرجال اي رجال بالدنيا اهم شيء عنده انج تعطينه اللي يبغيه متى ما يبا وكيف ما يبا بس ما يكون فيما يغضب الله سبحانه وتعالى وبس
رفعت الأقلام وجفت الصحف
ما في كلام غيره
خواتي لا تزعلون مني للكن هذي سنة الحياة
وعلشان جذي تشوفين وحده آية من الجمال لكنها فاشلة في حياتها الزوجية او تكوت مطلقة
وفي وحده عادية تماما لكن تشوفين الرجال شالنها على كفوف الراحة ويحترمها وما يقدر يشوف غيرها
ليش لأنها مشبعتنه
بطنه مليان وسريره دفيان بس بعد اشو يبا اكثر من جذي
دلوعة طباخة غسالة زوجة حبيبة صديقة ام اخت عشيقة

مشكورررررررررررررره أختي على المعلومات وممكن الوحده تخلي ريلها أفضل يضغط على المنطقه مثل ما تفضلتي وأستر حق الوحده وتبعد الشبهات

صراحه الغاليه يزاج الله خير الي ذكرتي هالموضوع..اصلا هذا الموضوع من اهم المواضيع الي تخص صحة الحرمه..وانا شخصيا عقب ما طاح اول بيبي اليه جذيه استوالي ودرت على كل المستشفيات وخذت جميع انواع العلاجات لمدة شهر ونص ومافي فايده ما وقف النزيف ونفسي طايحه وظهري من الويع معتوي ما اروم اعدله يوم امشي واخر شي حرمه يزاها الله خير دلتني على وحده متخصصه في التجعيب والمساح ..وتميت ثلاث ايام اييها..والحمدالله رب العالمين بسرعه استويت بخير..وعرفت انه مب كل الحالات يعرفولها الدكاتره..والعلاجات الشعبيه ما لنا غنى عنها.

صراحه الغاليه يزاج الله خير الي ذكرتي هالموضوع..اصلا هذا الموضوع من اهم المواضيع الي تخص صحة الحرمه..وانا شخصيا عقب ما طاح اول بيبي اليه جذيه استوالي ودرت على كل المستشفيات وخذت جميع انواع العلاجات لمدة شهر ونص ومافي فايده ما وقف النزيف ونفسي طايحه وظهري من الويع معتوي ما اروم اعدله يوم امشي واخر شي حرمه يزاها الله خير دلتني على وحده متخصصه في التجعيب والمساح ..وتميت ثلاث ايام اييها..والحمدالله رب العالمين بسرعه استويت بخير..وعرفت انه مب كل الحالات يعرفولها الدكاتره..والعلاجات الشعبيه ما لنا غنى عنها.

تسلمين اختي على المرور
بس ها حطي في بالج هب كل شيء ينقال للريال ترا خطر كبير
بس كل وحده ولي يريحها

تسلمين اختي على المرور وعلى الدعوى الطيبة ولج مثلها ان شاء الله
وصحيح اختي ما لنا عنى عن العلاجات الشعبية والله يشافيج ويعافيج جميعا ان شاء الله
وطنيني عليج

يعطيج الف عافيه فديتج..

تسملين اختي على المعلومة وصادقة الكعب بلاويه بلاوي الحمدلله رب العالمين ما البس كعب خخخخ

تسلمين اختي على المرور وكلك ذوق