شو أفضل مكان للسفر مع ريلج وطفلج الرضيع ؟؟

السلام عليكم ورحمة الله وبركاته

حبايبي بغيت اسألكم شو أفضل مكان ممكن أسافر فيه مع ريلي وانا عندي فقط طفل رضيع عمره ست أشهر ؟؟

يعني أبا مكان جوه حلو وهادي ومب بعيد وايد كساعات سفر ومريح من ناحية المواصلات والطريج والأمان ؟

السفره بتاخذ اسبوعين تقريبا ومحتاره وين ممكن نسافر بس فكرت فتركيا شو رايكم فيها ؟؟
ابا اعرف تجاربكم وأرائكم عن افضل الأماكن اللي سافرتي فيها مع عيالج واستانستوا كعائلة ؟

وشكرا

سنغافوره جوها حلو،،
و احسه مكان حلو،،
بس وايد عليه اسبوعين،،
بصراحه ما رحت تركيا

انا سافرت بانكوك وولدي 9 شهور والرحلة خذت 6 ساعات
وتركيا بعد حلوة والرحلة تقريبا 4 ساعات

انا احيد سافرت ويا ريلي و ولدي يوم كان عمره سنة .. سرنا لندن و باريس .. كان حلو بصراحة بس الي تعبنا هو محطات الاندرقراوند في لندن لأنه معظمها قديم و تقريبا كله سلاسم … فقمنا نشل السترولر .. اخر شي قلت خلاص خل ناخذ تكاسي .. صح اغلى بس اريح … فيعني اهم نقطة حطيها في بالج انه تسيرين مكان التنقل فيه سهل مب صعب بما انه بيكون عندج سترولر البيبي ..

ثاني نقطة الزحمة .. حاولي تبعدين عن اماكن الازدحام لأنه البيبي صغير و تدرين الامراض منتشرة هالايام الله يبعدها عنا و عنكم ..

و بعد لو البيبي بدا ياكل لازم تاخذين غرفة الفندق فيها مطبخ صغير علشان تسويله اكله الخاص .. او انج تشلين وياج جدر الطبخ الكهربائي و خلاط صغير حق اكله ..

و طبعا ما بتقدرين تسيرين العاب لانه لازم البيبي حد يكون عنده لو بتلعبون … و ماشي مطاعم راقية .. تذكرت في باريس كان خاطري ادش كذا مطعم و كافيه من الفخمات بس ولدي الله يهديه كان دوم يصيح فتفشلت ادش هههههههههه قزرناها ماك كافيه ..

المهم الاختيارات ممكن تركيا حلوة و ممكن المدن الأوروبية الريفية مثل سالزبورغ و زيلامسي في النمسا ..
و ممكن ماليزيا مثلا بس بعيدة للاسف

اتوقع اوروبا من انسب الاماكن خاصه انه ممكن تستاجرون سيارة وتتنقلون على راحتكم

بالتوفيق

انا رحت ماليزيا يوم كانت بنتي عمرها 6 شهور