شو تنصحونها اتخبل بالواحد ؟

السلام عليكم
أنا اعرف وحدة مخطوبة خطبة رسمية
خطيبها مالذاك الجمال يعني تقدرون اتقلون عنه انه جماله متوسط
هي وافقت عليه بسبة انه زين وشارنها وهي اتحس انه يحبها طبعا ما بينهم علاقة بس من كثر ما يخبرونها عنه وعن تصرفاته إلي تدل على انه يحبها
كل وحدة تنخطب اكيد اتحس انها ا تحب خطيبها وتتولد المشاعر من صوبه كلها حب وشوق طبعا عكس المغصوبات على الموافقة
هي اوقات اتحس انه تحبه واوقات لا عشان اتفكر بجماله
اكيد بتقولون شو هذا الحب ماله خص بالجمال لكن هي حلمها من الاساس بريال جميل وله مواصفات معينة وانه يكون في نظرها جميل وعيالها يظهرون جميلين اكيد وايدات تفكيرهن جذا فلا تلومونها
هاذيج كلها مقدمات
المشكلة هي :
البنت مرة من المرات شافت صورة اخو زميلتها في الكلاس وانعجبت فيه زين ما طاحت من كثر حلته على قولتها صدق يخبل وهي حست بالفرق الكبير بين خطيبها وبينه واتحسرت كانت تتمنى هذا يكون زوجها ، وهي دائما لما اتشوف صور شباب بشكل عام في النت واي مكان اتقارن بينهم وبين خطيبها واتشوف الفرق وتتحسر على انه إلي خطبنها ما جماله شرات جمالهم وحتى ربعها يوم يشوفن صورة خطيبها يقولون جماله زين وعلى فكرة هي ما تحب ولا شي
هي حاولت قدر المستطاع انها اتغير هاي الفكرة وانه الجمال مب كل شي وووووو وانه اهم شي الاخلاق
لكن شو يضمنها انه اخلاقه يوم بيكون وياها زينة حاليا يقولون عنه زين لكن ما يندرى يمكن يطلع مب زين فشيئين ما يتوفرن صعب
مب كل جميل مب زين ومب كل مب جميل زين
فهي هاي العبرة العبارة محطتنه في بالها
وتعرفون شو هي المشكلة الأكبر ابوها ما مقتنع من جماله و يبا لبنته واحد جميل وووو فعشان جي ما محصلة تشجيع من ابوها بس بعدين وافق بس مازال مب مقتنع 100%
هي ألحين ما تعرف شو اتسوي وايد تعبانة وملجتها يوم عن يوم تتقرب فحرام تظلم الريال وصعب ترفضه بعد ما وافقت عليه ولد الناس مب لعبة عندها
شو تنصحونها ؟ وتتوقعون انه تحبه بعد الملجة ؟في بنات كانن يتمن واحد جميل وفيه المواصفات الحسينة وآخر شي خذن واحد مب جميل وحاليا يموتن فيه ؟يا بنات المنتدى اذا ياج واحد بمواصفات هذا الريال زين +جماله متوسط بتوافقين على طول ؟
خبروها قصص من الامارات عشان تقتنع
وهي تخاف ما تتقبله بعد الملجة ، وهي ما تريد تخسره مدامنه شراها بسفي نفسالوقت اتفكر في جماله
بنات
لا تضايجونها بردودكم هي مهما كانت انسان ولها حق في وجهة النظر +متطلبات الحياة
تراها بتقرا الموضوع
وردودكم هذي يمكن تنفع وايد بنات خاصة يوم يفكرون شرات تفكير هاي البنت

مادام السالفة فيها كلاسات ومقارنات جمالية…أكيد ربيعتج صغيرة وايد..المهم انا بعطيها على قد سنها ومابجامل..ماااااااكد سمعت عن واحد جميل إلا ووراه ألف مصيبة..إلا من رحم ربي!! يعني لو كان حلو مابيخلص من ملاحق البنات!! وهيه ريلها حلو وحبوب! يعني بتاكل همين …هم الحلاة وهم الشخصية!!!

ثانيا, أحلى شي يوم تكون الحرمة أحلى من الريال! لأنه الريال بمعانيه مب بحلاته ..وبعدين مب هيه مستخيرة؟؟ حد يستخير ومايتوكل على الله؟؟؟؟ هيه شاورت الله في هالزواج!! يعني ماشاورت آدمي!!!! تقول انه شو يضمنها انه بس مب حلو وانه عقب يستوي مب زين…بقوللها ..ماشي ضمان!!!! الدنيا تتغير وانتي ريلج ممكن تشكلينه على مزاجج إذا عرفتي مفاتيح قلبه..أما إذا ركزت على شكله ..أصصصصصلن مابتتفاءل وبتتعب نفسها بالتفكير عالفاضي…واذا ربيعتج مااقتنعت بكلامي …على راحتها ..بس أحس انها بعدها صغيرة عالعرس مادام بالها فالجمال لهالدرجة..وفي الأخير ..خلها تستخير ولاتسمع خرابيط من برا عشان ماتغير رايها كل شوي..

والله يوفقها

يسعدني اني اكون اول وحده ترد بس اسمحيلي ان تفكيرها تاااافه جدا لان الجمال ماب كل شي انا ماخذه واحد متوسط الجمال وكنت اتمنى قبل اخذ واحد الكل ياشر عليه ويتمنى يمشي عداله لكن الحمد لله ان تفكيري اتغير بعد الزواج انا عندي اتمنى الوحده تاخذ واحد اقل جمال عنها اولا عشان ما يغتر وثانيا بيعايرج انه كل بنت تتمناه من جماله الريال ما يعيبه شي والله ان ريلي يسوا عندي الدنيا وما فيها والحمد لله مرتاحه من مسائله الغيره خخخخخخ ها عاد لاتتحسبين ريلي نكره القايله لا هو جماله على قد حاله خخخ تراه ما يهون عليه وان شاء الله الله يوفقها وتاخذ مثل بو عيالي فديته ترى كل وحده تتمناه من طيبة قلبه

و الله يا عزيزتي الجمال مب كل شي .. انا أعرف وحده متزوجة و إهية جميلة و ريلها بعد جميل و عيالهم ظهرو عاديين ما فيهم جمال …. انتي توكلي هلى الله .. و الله بيعطيها على قد نيتها

سبحاااااااان الله ..