شو رايكم في مواقع الزواج على النت بالنسبة للبنات الكبار

بغيت أخذ رايكم في هالشي، لو في مواقع نت للزواج وفكرت الوحدة أن تقدم فيها وانا أخص اللي فوق 30 سنه مب أي عمر، يعني أللي تحس أنها يائسة ومافي أمل من الناس اللي حواليها أو حياتها ما تساعدها أنها تتلتقي بحد لا معارف ولا جيران، لان ربيعتي قاعدة تقنعني أسجل في موقع نت للزواج بس أنا قلتلها ماقدر صراحة متخوفة، شو ضمنني أن هالشخص عقب ما ياخذني لو صار نصيب ما يعايرني ويقوللي يا فلانه أنا خذتج عن طريق موقع أو لو فيج خير ما دشيتي هالمواقع أو مثلا لو يلس يفكر أنها ممكن تخونه وتدش من وراه هاي المواقع أو يحس أنه ماله ثقه فيها، أنا وايد مترددة في هالموضوع، ماعرف شو رايكم، ومثل ما ذكرت صعب وايد أن فحياتج أنج تلتقين بحد يعني ماشي أهل ولا تواصل إجتماعي أو زيارات وهالبنت تخاف أن مثل ما ينقال أن يفوتها القطار، هل توافقون على هالشي ولا لا، أنا فعلا محتارة. وفي نفس الوقت أن مب متأكدة من جدية هالناس أللي يدشون هالمواقع ويسجلون فيها..شو رايكم.

هذه المواقع غلط في غلط

و الشباب يتزوجون الي يختارونهن الاهل او ينعجبون فيهم لما يشوفونهم بالصدفة او بدون صدفة
او الي يسمعون عن سمعتهم الطيبة و سمعة اهلهم الطيبة

الشباب الي يدخلون هذه المواقع مرمسين مليون وحدة و منو الغبية الي تبي تتزوج واحد مكلم مليون وحدة ؟؟؟

والله انا اشوف الخطابه احسن عن هالمواقع

تتوقعين هالشباب الي يسجلون بهالمواقع يبون يتزوجون ؟؟ هذيلا يفترسون البنات تحت ستار الزواج الكاذب ..

والله يرزقج بالزوج الصالح ..

لاحول ولا قوه الا بالله
ادعي ربج كل وقت وبالاخص الثلث الاخير من الليل وان شاء الله بيرزقج ربي الزوج الصالح

ربي يسهلها عليج ويرزقج الزوج الصالح التقي النقي الهني ،،

أممممـ ، عن رايي الشخصي أبببد ما اشجع ،،

اختي للأسف الشباب او أغلبية الشباب اللي يحدرون هالمواقع يكونون بهدف الفضول واللعب ،،

انا مالي تجربة ،، لكن هاللي منتشر ،،

ومثل ماقالت وحدة من الخوات ،، في هالحالة احس الخطابة أحسن ،،

وعالاقل ترتاحين من الوساوس اللي تدور براسج وتساؤلاتج المستقبلية ،،

وربي يوفقج ويرزقج الريال الزين السنع اللي يخاف ربه فيج

بس يا بنات الخطابة من وين اصلا ماشي ماتحصلين وين بتسيرين تدورين بالأخص أنا مثلا في دبي سمعت أن في مكتب مرخص في رأس الخيمة وفي فالشارجة بس الشروط اللي يحطونها الخطابات بعد مب سهلة أنها تطلب أنج تيبين أهلج ممن وين بتراكضين بأمج وهي حرمة عيوز ما تمشي وأبوج متوفي شو تسوين مستحيل الإخوان يوافقون هالشي محرج للبنت…ماعرف ليش ما يتفهمون هالنقطة طبعا غير عن البيزات اللي بتطلبها..

أنا فكرت بعد أن هالمواقع ممكن هالرريال مرمس الف بنت وكرهت هالشي بشكل…ماحب واحد يكون مجرب وراعي علاقات لان ما بيقنعه شي…

صح لسانج 100% معاج