صح اللي سويته ويا ربيعتيه ولا غلط ؟ محتااره الصراحة !

شحالكن خواتي ؟

انا مختفيه عن المنتدى من يومين كان عندنا عرس في بوظبي اتولهت عليكم كتييير

و الحمدلله خلصنا من العرس و كنت كاشخة لول .. الله يسعدهم و يوفقهم و عقبالنا يارب ^^

المهم اليوم عندي سالفة قلت باخذ شوركن فيها ×_×

يمكن حد يقول السالفة سخيفه و حد يقول ما يسوى تحطينها بسس محتاره !

و بلييز يعني الفضوليات اللي يعرفوني معرفه شخصية مابا هذره زايدة عن الموضوع عند العيايز

الموضوع باختصار وحده من رباعتيه تحب واحد و يحبها و يبغيها من زمان بس أمه مب راضيه عشان سالفة الأصل والحسب والنسب >> وهذا مب موضوعنا لان كل انسان مسؤول عن تصرفاته و عقله في راسه و ماحد بيتحاسب عن حد !

بس المشكلة الريال اللي يحبها من معارفنا و تربطنا فيهم علاقة قوية من سنييين و عيايزهم دووم ويا عيايزنا

و هي تبغيني اساعدها في موضوع زواجهم بس من بعيد لبعييد .. و على فكرة البنيه مب ربيعتيه كلوز بس علاقتي وياها سطحية و هي طيبه و حبوبة و عـ نياتها و ما شفت منها الا كل خير و لها وقفات ويايه

انزيين الحين السالفة ومافيها أهل الريال كانت عندهم ملجة حد من عيالهم و طبعاً انا معزومه و قالتلي ممكن اسير وياج ؟ عشان يشوفونها و تتعرف عليهم

اممم انا كنت وايد متردده اني اتدخل في الموضوع بس بعدين غمضتني و شليتها ويايه قلت انا مب خسرانه شي و حالها من حال الضيوف و ماشي احسن من أجر توفيق راسين بالحلال

و انا قناعتي الشخصية ماشي انسان فالدنيا ما يغلط لان نحن بشر مب معصومين من الخطأ و مب عيب الواحد يغلط بس العيب انه يستمر في الغلط و ما يصلح غلطته و في حالتهم افضل حل للمشكلة هو الزواج عسب يستر عليها و ياخذون بعض بالحلال ..

المهم في الملجة أم الريال ما كانت حاضره بس خالته موجوده و كنت اسولف وياها و انا في البداية عرفتهم عليها على اساس انها ربيعتيه .. بس بعدين قلت حق خالته هذي هي البنيه اللي يباها فلان ولد اختج و هي رحبت فيها و قالتلي بسير اشوفها و استانست عليها يعني عادي عندها و طبعاً بتخبر اختها ام الريال

انزيين الحين مادري انا اللي سويته صح ولا غلط ؟ متردده الصراحة و محتاره

اخاف أمه تزعل و تاخذ فكره مب حلوة لني شليتها ويايه و عرفتها عليهم

و أمه وايد تحبني و تحترمني و هي عزيزة و غالية عليه و دوم تمدحني و تطريني بالخير ..

و نفس الوقت ربيعتيه وايد مستانسه و مرتاحة لني وقفت وياها و قرّبتها منهم

ماادري والله راسي داير ماعرف انا صح ولا المفروض اعتذر منها وما اتدخل فالموضوع ؟!

و حتى ولدهم اللي يبغيها يقولها قولي حق الغر تساعدنا و مستانس الحين على هالخطوة لانه صدق يحبها و يبغيها و شارنها

طبعاً يدتي يوم عرفت بالموضوع مسحت فيني الارض وانا ما يخصني اهيء اهيء

قالت اللي ما ياخذ شور أهله مافيه خير و هذا طايش ما يعرف مصلحته و نحن نربيهم و نتعب عليهم و آخر شي يطلعون عن شورنا و البنيه ما تستحي ليش عاقه عمرها عليهم و بعدين بيعايرونها و بتستويلها مشاكل وياهم لانهم من البداية ما يبغونها … الخ يعني من هالرمسه