قالي يبا يدخل الاسلام

مرحبا خواتي ..

ما تتخيلون كيف انا مستانسة بالشي اللي سمعته اليوم .. والله حلم حياتي اني اساعد شخص يدخل الاسلام .. خصوصا لو كان رب اسرة ، هذا معناه ان كل افراد هالاسرة بيسلكون سلوكه …

السالفة و ما فيها ..
عندي دكتور في الجامعة و هو واحد من افضل المدرسين اللي درسوني .. واتمنى له كل خير الصراحة .. اصله افريقي وعنده الجنسية الامريكية ..
كنا نتكلم عن موضوع تاسيس اسرائيل على ظهر دولة فلسطين .. وحسيته وايد منقهر من الموضوع .. ويقول " انا ما اعرف كيف هالناس يسون جذي ومنو عطاهم الحق انهم يغتصبون هالارض .. اريد اعرف اكثر عن اليهود و ليش محد يحبهم .. قريت وايد كتب بس بعدني ما اقتنعت بافكار اللي كاتبين هالكتب. ". فتكلم عن بعض قصص طردهم من العراق و اوروبا من زمان ..

في هاللحظة تذكرت القصص اللي مكتوبة في القران عن اليهود و قصص الرسول – صلى الله عليه وسلم – معاهم .. فقلت له : "دكتور حتى في عهد الرسول – صلى الله عليه و سلم – كانوا يسوون مشاكل و انطردوا من المدينة ". (دكتورنا اشتغل فترة في السعودية كباحث وعنده خلفية عن الاسلام والرسول..). وكنت ابا اقول له عن قصصهم في القران و ضياعهم في صحراء سينا و هالقصص بس حسيت الوقت ما يكفي فسكتت .. و بالرغم من انه اشتغل في السعودية فترة بس فيه معلومات مهمة عن الاسلام حسيته ما يعرفها ..

بعد ما خلص الكلاس .. حسيت اني لازم اخبره عن هالشي .. وادعوه انه يقرا قصصهم من خلال القران .. لان القران ما يكذب و مب محرف وما يعتمد على اهواء الناس .. و فيه اللي بيقنعه 100% .. و لو قرا قصص اليهود اليوم باجر بيقرا قصص الاقوام الثانية و اللي بعده بيقرا قصص الرسل و هكذا ..

فرحت عنده و قلت له : " انا ادعوك انك تقرا قصص اليهود في القران لانهم انذكروا وايد .. و ممكن تلاقي اللي الاسباب اللي تقنعك" ..
قالي : "في اي جزء مذكورة هالقصص لان انا عندي جزئين من القران " ..
وفي هاللحظة صدق استانست لانه حسيت انه من خاطره متشجع لهالدين .. و تخيلوا كم واحد من حالته .. عنده القران و يبا اللي يساعده ..
فقلت له:"بشوف لك في اي الاجزاء وبخبرك .." قالي : "بصراحة انا وايد احب هالدين و يوم كنت صغير كانوا اصدقائي يلقبوني بالشيخ .. و كل اصدقائي اسلموا الا انا لاني رحت امريكا ونسيت الموضوع.. بس يوم ييت الامارات تذكرت هالشي مرة ثانية و حبيت الاسلام اكثر من خلالكم .. و كيف انكم ملتزمين بعهودكم بينكم و بين ربكم و بينكم و بين بعض .. حبيت روحية الاسلام .. بالخلاف الاديان الثانية اللي ما يحتاي تثبت انك مسيحي مثلا .. و يكفي انك تروح الكنيسة مرة في الشهر ..".. و قالي بعد ان 2 من اخوانه مسلمين و اخوان زوجته بعد ..
الصراحة كلامه وايد فرحني .. لانه حس انه الاسلام هو الافضل .. يباله حد يساعده بس ويخبره اكثر و يرشده للطريق الصح ..

اباكم تساعدوني اللحين وين ممكن احصل القران كامل مترجم باللغة الانجليزية .. و شو الاجزاء اللي تتكلم عن قصص اليهود ..و اذا عندكم اي شي اخبره و افيده عشان يقتنع اكثر بالاسلام .. و لي و لكم الاجر ان شاء الله ..

اروووحيه فرحت الله يهدييه ان شاء الله

انا اذكر كان في مكتبه جامعه قرآن مترجم وتفسير فيه

روحي مكاتب الكتب اسلاميه بتلقين اكيد

وبعد عندج للمسلمين جدد ماذكر شو اسمها بالضبط اعتقد اسمه دار زايد للمسلمين جدد

الله يهديييه يارب

خبرينا شو بيستوي عقب

يالله انا بطير من الفرحه حسيت حمااااس جد

شوفي خيتي اكثر شي يتكلم عن اليهوود سورة التووبه الجزء العااشر وااايد تتكلم عن اليهود وفي اجزااء ثانيه مب ذاكرتنهااا,,

الحمدلله الحمدلله,,

وربي يجزيج خير ياربي..وبالنسبه للقرءان المترجم كل مكان تحصليه بس فالمكتبات الراااقيه,,

وهنيئا له هالدين العظيـــم

وبارك الله فــــيج**

ان شاء الله حبيبتي .. و فكرة حلوة بعد ادله على مركز المسلمين الجدد .. لانهم يعرفون يتعاملون معاهم اكثر منا ..

الله يبارك فينا جميع .. و انا رايحة الجامعة باجر بمر وبدور القرآن المترجم .. وبكتب له الصفحات و الاجزاء في ورقة صغيره عشان يقرا على راحته ..
والله حرام ناس مثقفين جذيه ما يعرفون شي عن الاسلام ..
و الحمدلله انه حب الاسلام بالرغم من المناظر الفضيعة اللي نشوفها في الجامعة من سلوك الطالبات ..

تقدرين تروحين المكتبات وتشتريله بيكون لج اجر الانج اشتريتيله وبيفرح الان اول هدية بتكون له كهداية هدية منج وهو القران مترجم ويمكن يكون شي سي دي بالانجليزي يتكلمون عن قصص اللي مذكورة في القران بس مش متاكدة

وان شاء الله يثبت على رايه ويكون دخوله للاسلام على ايدج

والسموحة

https://quranexplorer.com/quran

ها موقع فيه القرآن مع تفسير بالانجليزي وايد حلو لان فيه اكثر من تفسير و اكثر من قراءة

الله يهديه و يهدينا