قصتي في التخلص من الرهاب والثقة العااالية بالنفس بفضل الله عز وجل

راح ابدأ احكي خطوة خطوة بالتفصيل وان شاء الله تستفيدو وتدعولي ..
اول حاجة كنت ادعي ربي داااائما انه يوفقني ويجعلني شخصية قوية وواثقة من نفسها وكنت دائما اقول (اللهم اجعلني محبوبة بين الناس )
وادعي بخشوع واقول (رب اشرح لي صدري ويسر لي امري واحلل لي عقدة من لساني يفقه قولي ) واللهم الهمني رشدي ووفقني للخير وسهل لي طريقه
واهدني لاحسن الاقوال والافعال لايهدي لاحسنها الا انت ..

واحب اذكر ان الدعاء (مخ العبادة ) لازم قبل كل شي ندعي الله عز وجل ونحسن الظن فيه ونتوكل عليه ونتاكد انه باذنه سبحانه بيرحمنا ويرشدنا للطرق الصحيحة في تطوير انفسنا .
ونعقد العزم على اصلاح الاخلاق وتطويرها وفعل الخير واهم شي الصدقات والحمد والامتنان لله عز وجل والمحافظة على اذكار الصباح والمساء وقراءتها بخشوع انا اقراها بصوت مسموع بس منخفض واحس اني اخشع فيها ..

الخلاصة : لازم نصلح علاقتنا مع ربنا ونعدل من انفسنا عشان تتغير حياتنا
قال تعالى (ان الله لايغير ما بقوم حتى يغيروا مابأنفسهم )

بعدين اخذت ورقة وكتبت كل اهدافي والاشياء اللي ابغاها بس بصيغة
اريد المزيد من …………. مثال:
اريد المزيد من الثقة بالنفس
وكذا كملت بقية اهدافي بهذه الصيغة

وطبعا حللت مشكلتي من جميع جوانبها واكتشفت ان السبب الاساسي :
تعلقي بالماضي وكثرة تفكيري فيه وتفكيري في المستقبل البعيد وخوفي منه وماافكر ولا استمتع باللحظة الحالية .. وايضا مواقف ذات تاثير سلبيييي جدا جدا اثرت عليا وصدمات وكلمات لاني كنت حساااسة جدا ومن ابسط كلمة اتاثر منها وتجلس في نفسي وكنت احتقر ذااتي واشوف اني اقل من النااس بكثير واقارن نفسي بيهم ويجيني احباااااط مو طبيعي ومو متقبله شكلي واحس اني مااستحق اعيش وانا مبسوطة لازم اعيش في نكد
والاسوا اني وظفت خيالي في الاشياء السلبية وافكر في بعدين وايش بيصير فيني واسترجع ذكريات الماضي واحس بهم وغم الله يبعده عنكم
وماكان عندي اهداف وطموحات وكنت اظن ان الناس كلها علي وتكرهني ومن الكلام دا ..
______________________________ _________

وبدأت بممارسة التأمل والاسترخاء ..
لحد مااتعلمت كيف اتحكم بافكاري واطرد اي فكرة سلبية او موقف سلبي
وكنت في تحدي واحث نفسي اذا صارلي موقف بالنسبة لي سلبي
اقول دحين اختبارك في قدراتك يا …. اطردي الفكرة من راسك وانسيها
واحاااول انسى واشغل نفسسي باي شي ومرة على مرة خلاص دربت عقلي
اي فكرة سلبية تصير تلقائيا سهل ابعادها ونسيانها
واحب اقول عبارة مهمة ان (العقل اذا ماانشغل بالايجابيات اتجه للسلبيات )

ومستمرة على الاسترخاء والتأمل وتمارين التركيز ..
اخذ شهيييق من الانف ويكون عميق من البطن وزفير من الفم بهدووء واتخيل ان جميع همومي والسلبيات تنزل وتبعد عني اثناء الزفير مع الهواء
والتركيز : اركز على شي معين بعيوني واتأمل جوانبه والوانه وشكله وماافكر الا فيه كانه مافي شي اهم منه في الدنيا والطريقة دي تنشط عضلات العين والمخ مررة ممتازة وبالذات اذا كان تركيزنا مشتت ناخذ نفس عميق شهيق وزفير بهدوء ونبدأ نركز على نقطة معينة ويفضل تكون غامقة .

وبعدها بفترة بدأت انبش في ذكرياتي واتذكر كللل المواقف السييئة والسلبية اللي صارت لي من وانا صغيرة واللي احس فيها بتأنيب الضمير ووكل شي
واي حاجة كانت تسبب لي الحزن وتفكيري في المستقبل والاكتئاب صح العملية كانت متعبة شويا بس الحمدلله خلاص كلها كم مرة وارتحححت منها وكتبتهم في اوراااق وبدأت اطبق تقنية الحرية النفسية الاكثر من رااااااااااااااااااااااااااااا ائعة على المواقف دي بالذات انها كانت كثيرة وجلست تقريبا حوالي اسبوع وانا بالتدريج اطبقها على المواقف مع التركيز والاحساس بالموقف نفسه عشان يروح الشعور السلبي مني

وبعدها بفترة بدات بتطبيق تمرين 21 في 14
بس كنت اكتب العبارات بعدد معين مثلا 7 او 14 او 21
ومااستمريت بالاسم مثال: انا الان انسانة قوية وواثقة من نفسي
واكتبها بتركيز واتخيل نفسي في مواقف اجتماعية وانا اتكلم بثقة واتعامل بثقة وان كل الناس يحبوني ويحترموني لاني استحق الاحترام ولي الحق بالتواجد في المكان اللي ابغاه

وطبقت التمرين على الجرأة والثقة في المحادثات واشياء عدييدة وتقدير الذات .

واتخذت قرار اني احول خيالي من سلبي الى ايجابي وفي صالحي وتفكيري ايضا ادرب مخي انه يتجه للايجابيات افكر في ايجابيات الناس ونفسي واتغاضى عن السلبيات واتقبل الناس كما هم . وارضى بحالي الان وسالت ربي انه يعينني على ذلك ويسهله لي .
وانسى المااضي بكل مافيه واول ماالاحظ اني رجعت اتذكر الماضي ابدا بالخيال الايجابي واتذكر موقف من الماضي واستشعر الفرحة وابتسم من قلبي او استغفر
واتخيل الحياة اللي ابغاها وصرت اقول دائما انا احترم ذاتي واقدرها واعشقها
وكل ماطالعت في المرايا ابتسم لنفسي ولوجهي واحمد الله عز وجل على كل النعم اللي اعطاني هيا
على حسب فهمي انه اطالع في نفسي في المرايا واتامل شكلي بحب واطالع في انعكاس عيوني في المرايا واقول وبكل صدق ومن قلبي واستشعر مشاعر الفرحة والحب اقول (احبك احببببببك ) وكنت اختمها بابتسامة وكنت امدح نفسي وشكلي دائما بعد ماتخلصت من المواقف السلبية ..
وفعلااااااا لمن الانسان يشوف نفسه انه حلو وواثق ينعكس على الناس ويشوفوني بنفس الطريقة اللي انا اشوف فيها نفسي
وبالنسبة للخوف من المستقبل اصبحت مؤمنة ومتيقنة ان ربي معايا وماراح يضيعني ودائما اردد (وماتوفيقي الا بالله عليه توكلت واليه انيب )
ولازم نحاول نعفو عن كل من اخطأ بحقنا واساء لنا ترا الدنيا ماتسوى جناح بعوضة وحلوو لو دعينا للشخص الي غلط في حقنا ندعيله من قلبنا بالهدااية وان الله يهدينا كمان .

وممكن احد تكون طريقة مشيته مو عاجبته ويؤنب نفسه عليها انا كنت كذا لكن اكتشفت ان طريقة مشي الانسان على حسب شخصيته
بعد ماتغيرت الحمدلله تغيييرت طريقة مشيتي صرت امشي وانا وااثقة وبثبات وبهدوء واطمئنان .
وفي نقطة مهمة حبيت اذكرها لكم :
اذا دخلنا مكان مزدحم او اي مكان فيه ناس جربو هذي الطريقة:
قولو بسم الله وابتسمو ابتسامة هادية ومطمئنة لنفسك وللناس اللي حواليك وركزززو على اللي تعملوه دحين مثلا انا ادخل واقول بسم الله في نفسي وابتسم واخلي كل تركيزي على اللي اعمله مثلا جالسة ارتب عبايتي وزي كدا واتجاهل الصوت الداخلي اللي يقولي الناس تطالع فيكي وتراقبك ومدري ايش وصرت الحمدلله تلقاااائيا عاادي ادخل بهدوء وثقة واعمل اللي ابغاه ماشاء الله .

اهم شي نقدر ذاتنا ونمارس الامتنان :
نكتب في ورقة جميع الاشياء اللي تمتني لله عز وجل انه اعطاك هيا مثلا وجود اشخاص في حياتك والنعم ..
وفيه تمرين عجبني في كتاب تطبيق قانون الجذب . انه لمن نمتن لله عز وجل لوجود شخص في حياتنا ممكن نكتب له رسالة ونقول :
انا ممتنة لوجودك في حياتي ..
شيء جمييل وراائع واكيد ادخلنا الفرحة والسرور على قلب مسلم وبالمقابل ربنا بيجازينا ويفرحنا .. لان كل شيء نعمله يرجع لنا سواء كان خير او شر

والى الان اردد يوميا العبارات دي :
انا انسانة قوية وواثقة من نفسي ومن قدرتي على النجاح
انا قوية واحقق اهدافي
انا اتمتع بثقة عاااااالية بنفسي
انا جريئة انا منطلقة انا متفاائلة
انا رااضية انا سعيدة جدا بحياتي واشكر ربي على ذلك
انا ذكية وانا استطيع الحفظ بسهوولة ويسر
وانا احترم ذاتي واقدرها
جميع الناس يحبوني .. وادعي اللهم ارزقني حبك وحب من يحبك وحب عمل يقربني الى حبك .
والان الحمدلله اخبركم شخصيتي الجديدة ..
متفاائلة وواثقة وهاادئة ومطمئنة وسعيدة وجريئة واجتماعية وحتى مشيتي وتصرفاتي اتغيرت وشخصيتي صارت مرحة اكثر واندمج مع الناس بسهولة واحب اكون صداقات مع انه لازالت عندي مشكلة بسييطة جدا من هذي الناحية لكن جالسة اعالجها واتغلب عليها ان شاء الله وماعاد اهتم لكلام الناس زي اول وعرفت ان في ناس تحبني بالمقابل في ناس ممكن تكرهني بس المفروض مااكره احد بدون سبب . وحتى من ناحية التحدث في الفصل مع المعلمة مثلا عادي بسهولة صرت اتكلم بس بحدوود وبراحة وهدوء
اول كنت اتوتر وارتبك مررررة واحس صوتي يتغير وبالقوة تطلع مني الكلمة لكن دحين الحمدلله لاا

وان شااااااااء الله يارب تستفيدو .. وادري كثرت كلاااام
واي استفسار انا حااضرة وتحت الخدمة .. بالتووووفيق

منقول

لا تنسوني من الدعاء بالزوج الصالح الذي يجمع بين كل الصفات الي تمنيتها و بالرزق الكثير الحلال المبارك