اليوم يايبتلكم طريقة كاسترد الشوفان
البارحة بعد منتصف الليل (لول بقول قصة) يتني هفة طبخ خاصة اني من زمان
ماسويت شي .. ويت فكرة كاسترد الشوفان فبالي اسويها مع تعديلات بسيطة
ويمكن تعرفونه ويمكن لا .. وطبعا دام انه هفة الطبخ يتني في الليل فأكيد اني متفيجه وقعدت اصور ..
حاولت اصور الخطوات بس الحلى مافيه خطوات هم الا خطوتين لول .. وان شاء الله يعيبكم
والطريقة مثل ماتعودتوا سريعة وسهله والمقادير بعد متوفره وسهله
وحلو للعصرية ويناسب الجو الحار اللي يايينا
وممكن تاكلينه وهو حار او بارد… في الحالتين طعمه حلو
حتى ممكن تعلمين هالسويت للبشكاره او بناتج انه يسونه اذا يحبون الطبخ..
حتى الشباب اللي يحبون يطبخون ( مع اني أشك )
خلنا من الهذرة وندخل في الموضوع
:: المقادير ::
4-5 أكواب حليب
1 كوب شوفان
12 نص كوب سكر ( ممكن تزيدين او تنقصين حسب كيف نسبة الحلى تبين)
3-3 ملاعق ماء ورد ( مثل السكر ممكن تزيدين او تنقصين حسب رغبتج)
1 ملعقة هيل مطحون
1 ملعقة صغيرة قرفة
شوية من الشعيرية الباكستانية ( نسيت اصورها) ( والكمية تعتمد على رغبتج)
المقادير مثل ماقلتلكم سهله ومتوفرة في كل البيوت أعتقد
( وممكن الاستغناء عن القرفة اذا ماتحبون او تحطين فانيليا بدل ماي الورد اذا ماتحبين.. بس ماي الورد نكهته احلى من الفانيليا .. ومثل ماقلت كلن وذوقة)
هاي صورة الشوفان
:: الطريقة ::
تحطين كل المقادير في اليدر وعلى نار هادية وتحركينه لين مايغلظ ويتماسك شوي ..
وهاي صورة الخليط اول ماحطيته عالنار
وخلال هالوقت .. ظهري الملال وغسليها ونشفيها .. وبين فترة وفتره حركي
الخليط لين ماتحسين انه تماسك وغلظ …
ووممكن تسوينه في طبق واحد اذا ماتبين في ملال
هني عقب ماحطيته في الملال .. وفيج تزينينه بالطريقة اللي تبينها
أنا حطيت عليه فستق مبشور
وهني رشيت عليه قرفة مطحونه ولوز مبشور
أتمنى أنه عيبكم السويت… وان شاء الله تيربونه وتدعونلي كالعادة بدعواتكم الطيبة
وفي انتظار تعليقاتكم
يعطيكي العافية
فعلا سهلة و سريعة
نفس طريقتي احب اخلط كل شي وعقب ارفعه ع الضو
بس ما قلتي متى تحطين الكاستر والشعيريه
اترياج
المشاركة الأصلية كتبت بواسطة Farouha 
يعطيكي العافية
فعلا سهلة و سريعة
هالمطلوب انه يكون سهل وسريع .. وماياخذ وقت
واحب انزل مواضيع سريعه أكثر من الأكلات اللي تكون على مراحل
يمكن لاني يوم ادور على اكله ادور على شي سريع
وتسلمين حبوبة عالكلام الطيب
وان شاء الله تيربينه ويعيبج
وتسلمين عالمرور والمشاركة
المشاركة الأصلية كتبت بواسطة عالية الغالية نفس طريقتي احب اخلط كل شي وعقب ارفعه ع الضو
بس ما قلتي متى تحطين الكاستر والشعيريه
اترياج
هلا والله فيج اختي
امممم مافي كاسترد في الاكله بس انا سميتها جي
ماعرفت شو اسميها .. لاني لو قلت حلى او سويت الشوفان بيختلط الاسم بحلى ثاني بنفس الاسم فقلت اسميه كاسترد الشوفان لول
والشعيرية تحطينها مع باقي المقادير في نفس الوقت
يعني كل اللي عندج اخلطيهم ويابعض وحطيهم عالنار وخليه على نار هادية وحركيه بين فترة والثانية عشان مايحترق الحليب وحاسبي لاتخلينه وايد يغلظ مجرد انه يتكاثف
وان شاء الله قدرت اشرحلج الطريقة
واتريا تعليقج عليه
وشاكره مرورج ومشاركتج الحلوة
بنجرب
المشاركة الأصلية كتبت بواسطة غروب11 بنجرب
وانا في انتظار تجربتج ورايج .. وان شاء الله يعيبج
وبالعافية ان شاء الله
وتسلمين على مرورج ومشاركتج الحلوه
فمان الله