اول ما يت كانت نشيطه وشغوله عجبتني
بعدين طلع لسانها طويل اترد علي وعلى ريلي
قويه في تعاملها مع الاولاد حسيت بها شي وما خليت عيالي عندها
خليتها اتودي عيالي مره المدرسة ومن طلعت دايركت على حجرتها لقيت شنطه مقفوله قفلين؟؟؟؟؟
خفت وايد وخليت الموضوع
وبعدين رحنا بيت اهلي ويتني خدامه امي وقالتلي (( مدام جوان _اسم خدامتي_ تصرخ واتفل علينا ))
وبعد فتره طلع عندها تيلفون سمسونج ما اعرف من وين مع ان المكتب عطاني تيلفون تعبان وقالي هذا تيلفونها
ورجعت اوسوس عن الشنطه وشو فيها وليش م قفوله والخدم ما يمدحون خدامتي في تعاملها معاهم
كانت خطوبة اخوي وكنا لاهين ومرتبشين وخليت بنتي عندها لين اتمكيج والبس وفجاه سمعت بنتي تصرخ باعلى صوت واركض عندها وقلتلها حبيبتي شوفيج (بنتي عمرها سنتين ونص) قالتلي: ماماه جوان سوت جيه ( وهي تاشر بيدها ان الخدامه قرصتها على ورجها..
وجن جنوني ورحت اصرخ على الخدامه ومسكتها من يدها بقو وهي تحلف انها ما عملت شي وتمت تبكي بشكل مخيف بدون دموع حسبي الله عليها
وفي الخطوبة ركضت خدامتي عند عمتي تبكي واتقول اني اتبلى عليها . المهم من بكرا رجعتها على المكتب كنت بيت اهلي عشان جيه شنطتها كانت بيتي فما لحقت تاخذها
وعلى طول لغرفة الخدامة اشوف شوفي الشنطه
لانها مقفوله اخذت سكين مطبخ كبيرة وطريتها طرتين وشو لقيت كله مسروقات
سارقه تيلفون جديم عندي و سماعه تيلفون وجرج ومحول كهربا
اقلام ماركه مالات ريلي
بوكي جديد ابا ارده كنت سرقته وانا نسيته
ستيانات (ملابس داخليه
ملابس عيالي جاكيتات )
كنت اطرشها الجمعيه تشتري اغراض البيت وما اشيك على الاغراض من بعدها فكانت تشتري لنفسها عشان تشحنهن
قطع صابون للجسم يمكن 50 حبه وهذا كانت تشتريه بالتدريج
3 كراتين تايد وادوات تنظيف
مخده طبيه للقعده على الكرسي
شراشف
دي في دي ماخذتنه من الجمعيه سعره 100 واشوي
( الغلط الي سويتها ما كنت اشيك على مشترياتها )
والله لوتشوفينها شو سارقة ليشيب شعر راسج على فكرة هي جديده عندي يعني من 3 اشهر ولعبت لعايبها
رجعتها مكتب الزعيم ( الخدامه ما خذتنها من عنده)وقتله هاي سفرها بلادها لا تغش الناس فيها
وبعد فتره جوان كلمت خدامه اختي وقالتلها انه راحت بيت في العين وايد حلو واصور الفله بالفيديو واطرش الصور الها
الخدامات اتكلمن بعد ما رجعتها المكتب وقالن انها كانت تقرص بنتي على بطنها وورجها دايما وكانن يشوفنها واتهددهن الي تخبر علي بذبحها …مريت بحاله نفسية ما يعلم فيها الا الله والحمدلله اني ارتحت منها
والحين بعد ما عرفت بغيت احذر اهل البيت الي جوان عندهم انتبهو منها حسبي الله عليها ولا تخلون عيالكم عندها
ومهما كان لا تاخذون مردوده (اذا فيه خير ما رماه الطير)
المفروض ترفعو عليها قضيه سرقه
وتتسفر برا البﻻد