لبنان ولبنان ولبنان حشرتونا

بصراحه حرام عليه اللي أطلق عليها هالاسم المفروض يسمونها باريس النصب ،، باريس الاحتيال ،،

حجزنا 5 ايام الى لبنان وندمنا ع هالسفره كانت عباره عن سفره ضرايب وتوتر ،، حجرنا في فندق

اسمه "جراند فرساي " 4 ستار ،، خذنا عندهم سويت فيه غرفه بالاضافه الى غرفتين منعزلات أول

ضرابه طبعا كانت عشان السويت المكيف خربان كلمناهم 3 مرات طول اليوم وبالهداويه يا ناس يا

أوادم تعالوا جوفوا سالفة مكيفكم متنا حر ولا كأنج اترمسين ناس كأنج اترمسين جماد لين اليوم الثاني

طبعا اضطروا اللي ف السويت يتوزعون ع الحجرتين واليوم الثاني الصبح نزلتلهم أختي زلزلت الفندق

وجلبته فوق تحت بصريخها ويوا يتراكضون وصلحوه بحزتها ناس متعوده ع التهزيئ شكلهم ،، النصب

الثاني : دورنا سايق ما حصلنا غير واحد طلب منا 250 دولار يعني 915 درهم اماراتي ف اليوم

الواحد وعنده سياره أرمادا عائليه ع قولته ،،طبعا لا جفنا ارمادا ولا هم يحزنون كانت سياره كحيانه

عائليه أونه الأرمادا مكيفها خربان هاي جذبة كل السواقين وسرنا معاه ونسيت أقولكم ترى البنزين ع

حسابنا غير ال 915 ،، اليوم الثاني بالصدفه أختي نازله تحت الفندق وجافه واحد سألها اذا محتاجه

سواق من باب الفضول سألته عن السعر وعنده سياره عائليه أحسن عن الكحيانه مال اليوم اللي قبله

قاللها 130 دولار يعني 477 درهم اماراتي في اليوم ،، وسرنا مع هذا وقالنا حق الثاني خلاص ما نبى

لليوم الثاني وطبعا اتحرطم أونه كيف انتوا خليتوني احجز السياره لليوم الثاني نحن قلناله بنعطيك 250

مال اليوم اللي وصلتنا فيه ما رضى أونه زيدوني 100 عشان حجزت السياره واتجاتلنا وياه وسرنا ويا

اللي طلب منا 130 دولار ،، قبل لا انروح بيوم اتعرفنا ع عائله لبنانيه من بيت ماري اتفاجأوا من

الأسعار اللي نحن دافعينها للفندق وللشوفير اللي هو السايق وقالولنا أصلا السايق لازم ياخذ 50 دولار

183 درهم اماراتي لطول اليوم يلففكم لبنان واذا كان حرامي بياخذ 70 دولار 256 درهم اماراتي.

( اذا اتحبون أكمللكم النصب والاحتيال اللي استوابنا ما عندي مانع )